Thuchah :

KRISTIAN CHHUNGKUA

:Upa C. Ngurthantluanga

     Ziaktu pakhat chuan, "A huhova kan sawi a, kan buaipui luai luai, a hmun dik taka kan buaipui peih si loh a awm a, chu chu ‘Kristian Chhungkaw chungchang hi a ni," a ti a. A ni tak a, ‘Kristian Ram’ tia inchhalna ramah hian Kristian Chhungkaw Campaign leh kum puan a la ngai reng mai erawh hi chu ngaihtuah a ti tam thin teh zawng a nih hi! Kristian ram chu Kristian chhungkua dinna ram ni mai awm tak a nih laia kan hlawhchham tlat mai thin hi eng vang nge ni ang? Chhungkaw awmzia kan hriat loh vang a ni thei ang em?

Chhungkua : Mi thiamte chuan, ‘Pathian hian chhungkua hi a ngai pawimawh em em mai a, Bible-a bu hmasa ber Genesis chu chhungkua in a tan a, a bu tawp ber Thupuan pawh hi chhungkua bawkin a khar leh a ni," an ti. Tin, Isua pawh chhungkuaah a lo piang a, chhungkuaah a lo seilian a, Pathian ropina tura thilmak a tih tanna pawh kha chhungkaw bul tanna, inneihna a nih kha...

Chhungkua dik tak ah chuan, remna, hmangaihna, thlamuanna, hahchawlhna leh thlarau lama thiltihtheihna leh zirtirna tha a awm thin. Chutah chuan nu berin Grape hrui angin rah a chhuah a, Pa ber chawimawiin a awm a, fate chu dawhkan velah chuan Olive tiak angin duhawm takin an awm thin. (Sam 128:1-6) Chhiartu duhtak, in inah khan Chhungkua a awm em le?

Chhungkua chu :

1. Kohhran bul ber a ni.

2. Sikul hmasa ber a ni.

3) Damdawiin hnai ber a ni.

4) Sawrkar te ber a ni.

Pathianin chhungkua a din chhan :

a) Amah ngaihsaka chi thlah nei turin;

b) A pawl turin;

c) Pathian duhzawng, dikna, rinawmna leh thutak tihlanna hmanrua atan;

d) Chhungkua chu anmahni aatan chauh ni lovin, an thih aia thi atan leh mi dangte tana malsawmna thlentu ni turin Pathianin a din a ni.

Kristian Chhungkua chu ‘Lal Isua ringa, a chhandamna changtute leh Lal Isua ring a, a chhandamna changtute leh Lal Isua lal berna chhungkua’ tiin sawi ila a dik thei tho awm e. Amaherawh chu, mahni theuh kan inbihchian theih nan hetiang hian zawhna han siam ta ila, avaia chhanna atan LAL ISUA kan hmang thei a nih chuan Krisian Chhungkaw ropui tak kan din a ni ngei ang.

1) I chhungkua kha tu din nge?

2) Tu nge a neitu?

3) Tu nge lal ber leh roreltu?

4) Eng nge a rohlu ber?

5) Eng nge a rinpui ber?

6) Eng nge a hlimna ber?

7) Tu nge a mamawh leh a rawn ber thin?

8) Tu nge a tih ber?

Heng zawhna zawng zawg chhanna hi in chhungkuaah ‘Lal Isua’ a ni thei ang em? Chu chu Kristian Chhungkua chu a ni.

Kristian Chhungkua mamawhna a sang :

Garber Murphy chuan, "Khawvel hi engtianga awm nge a nih tih mai pawh ni lo, tun hnaiah leh nakina a awm dan tur enna khawl chu Chhungkua hi a ni." a ti a. Kan ram leh khawtlang awm zel dan tur hi tuna kan chhungkua hian a hril avangin Kristian chhungkua dik tak kan din theuh a va pawimawh tak em!

Pa thian hre lo ram, khawtlang, chhungkua hi he khawvelah pawh hian an dingchang tak tak thei lo. Russia ram leh Communist ram thenkhat an lo tluchhe ta. Krista lungpui chungah an innghah loh vang a ni ngei ang. Mizote hi kan hnam a la naupan avang leh Kristian kan nihna la rei loh avangin chhuan (generation) inchhui tham kan la awm lova; chuvang chuan tunlaiin, hlawkna emaw ti kan tam mai; mahse chhuan hnih chhuan thum a lo ral hun chuan Pathian leh dikna palzut a, tuna chhungkaw hausa leh ropui nia inngaite thlah hi chhuingam loh khawpa chhia a la ni dawn. Miin a tuh apiang chumi vek chu a seng dawn bawk si a.,

"Aw, fing se la chuan he’ng hi an hrethiam ang a, an tun hnu lam an ngaihtuah tur. " (Deut. 32:29)

Unau duhtak, in chhungkua kha kan ram, kan khawtlang, kan Kohhran hian a mamawh tak zet che u a sin. Kristian chhungkua, chhungkaw lungrual, Lal Isua lalna chhungkua in nih ngei theihnan i hma zawna i tihtur chu hlen turin inbuatsaih nghal ang che aw.

Thuziak :

CHAPONA KARAH PAWH SAYING ‘SORRY’

- R Lalduhawma, Secretary Br. KTP

     Chapona leh intihveina hian kan hringnun zinkawng hi a chinglet nasa thin hle mai. Kan ban phak tur leh kan chuankai ve theihna tur atang ngei pawh hian min paihthla a, mi dangte tan pawha ninawm leh hmantlak lovah min siam tlat a ni. Ni e, hringnun hi zawng, ‘Sorry’ tih pawh tum ila kan hriat loh hlan hian rilru chapo hi kan mihringah hian a lo bet nghet tawh em a ni, a lo langchhuak leh tlat thin.

Kawng hrang hrangah kan theihna engemaw kan lanchhuah tir vena kawngah pawh chapona bawkin min umzui var thin ti raw? Infiamna lama mi chhuanawm te, Zirna lam mi hlawhtling te, Mi hausa leh mi hnuaihnung berah pawh a bang chuang lo, Thu thiam, Pathian thu sawithiam Pathian chhawrte ngeiah pawh bu a khuar tho tho !!! Sermon thu ropui tak tak thinlungah a lo luh rual chiah hian, ngaihtuahna lehlamah thu ropui dawng theia ka awm bik hi tiin, ropui bik intihna a lo lang nghal, Min petu lam mangnghilh thakin keimahni kan inchawimawi mai thin a ni ti raw ?? Ropui taka Pathianin min puanchhuahtir mek lai pawh hian ngaithlatute fakna awka kan dawnte hmang in sual Setana’n kan rilruah chapona a tuh leh tlat thin.

Tin, kan mihringpuite nena inkhaikhinna hian rawngbawlhona kawngah rah tha a chhuah lo hle mai. Rilru sualah min hnuk lut tlat thin. Mi aia that falna chhe te leh chungnung hreta min min ngaihna te hi chetsualnan leh chaponan kan hmang fo em? Ngaihtuah tham tak a ni. Pathian fakna atana hmang lovin mahni inngaih ropuina hmanrua atan Setana’n min hmansak mek a nih hi.

Infiam mi hmingtha kan ni emaw, Zirna kawnga mi hlawhtling kan ni emaw, Sumdawnna kawnga mi ropui kan ni emaw, Eizawnna kawnga mi chungchuang kan ni emaw, mi pangai keima ni tawka hlawhtling inti ve tak pawh ni ila, ‘I hlawhtlina thuruk chu eng nge?’ tih zawhna kan dawn hi engtin nge kan chhan ang le? Kan hlawhtlinna hi Pathian hnenah hlan mai ila, kan hlawhtlinna zawng zawngte hi kan chapo pui thei lovang; "Pathian min tanpuina vang liau liau a ni" tiin kan chhang thei ang. Tin, Pathian rawngbawltu chhuanawm leh fak hlawh, thusawi thiam pawh ni ila Pat Robertson chuan " Nang chu thusawitu ni lovin, thusawina hmanrua chauh i ni tih in hre rengin, I thusawi turte Lalpa hnenah hlan let leh thin ang che" a ti.

Tin, Kan tlin lohna leh fel lohna te laihlana a awm hian rilru chapo takin kan hmachhawn fo thin; Ka thiam loh a ni tih mai aiin mahni dik ve nia kan inhriatna te chapo takin puanzar kan duh tlat. Hei hian boruak nu a hring chhuak a, chu ai chuan a hun leh a hmun takah " Ka thiam loh a ni" tih ngam a tul. He tawngkam hi chhungkuaah, Kohhranah a lian ber atanga a te ber, a pawimawh ber atanga pawimawh lo ber thleng pawhin kan mamawh, ngawih bova theihnghilh zui atana dah ai pawhin a hlu zawk. (Sorry)

Editorial :

"Pres.."

Kan tleirawl chhuah tan tirh, nikhua kan hriat chhoh ve tantirh lai vel khan, "Eng Kohhran nge i nih?" tia min zawh hian ‘Pres..’ tiin kan chhang mai thin a. Khang hun lai khan kan Kohhran sawina atan hian ‘Pres’ tih emaw ‘Mission’ tih hi hmang kan tam hle mai. Tun thleng hian ‘Kei chu Pres ka ni’ la ti tawk hi kan la awm nual mai. Kohhran pawl dang phei chuan tun thleng hian ‘Pres’ tia min sawi hi an la awm nual bawk. Kan Kohhran hian hming phel kan nei lo a, ‘Presbyterian’ kan ni. Mizoramah hian mipui 8,88,573 kan awm a, heng zing ah hian kan Kohhran member hi mi 550,560 kan ni a. Mizoram mipui hmun thuma thena hmun hnih dawn hi Presbyterian kan ni a, chuvangin kan Kohhhran in a hawi lam hi a pawimawh viau zel a.

Kohhran mipui, a nawlpui te hia chuan kan Kohhran inkaihhruaina, kan kalhmang leh dan te hi hre vek seng lo mahila, rawngbawltu chin tal hi chu he lama hriatna nei tur hian kan inzir a tul viau awm e.

Tin, Kohhran active member te pawhin mahni tualchhung Kohhran chanchin tlangpui hi chu hre tura tan lak thar pawh kan ngai hle in a lang. Kohhrana awm mawl tawp loa mahni phak ang tawka he lama hriatna nei tura kan inzir zel hi kan tihtur pawimawh tak a ni awm e.


Branch Huang ;

     Ni 31.02.11 (Thawhtan)

     Documentation Sub-Comittee chuan Branch KTP hminga Website siam an rel a. Hei hi Branch Committee chuan rem tihsakin Branch hmingin Website kan nei ve dawn ta a ni

     Hun remchangah Branch sumtuakna atan Blanket su a inhlawh tum a ni a. Kohhran mipuite kan inhriattir rualin inhlawhna min siamsak theuh turin kan inngen lawk nghal bwk a ni e.

    Tun kum chhung hian Fellowship hunah Group-te intihsiakna neih leh thin tur a ni a. Lawmman atan Rs. 100 ruahman a ni  Branch Committe chuan Branch Committee tawngtairual hun chu thawhtan vawi li (4)-na zan inkhawm banah nei thin turin a rel. zan khan KTP inkhawm chu Pastor B Sangthanga, Bialtu Pastor hoin Kohhran Hall-ah neih a ni a. He hunah hian Sermon mai bakah Zawhna leh chhanna hun siam a ni a. Member inkhawmten kan hlawkpui hle a. Hetiang hun kan Pastor-in ruahmanna siama min rawn hman pui hi lawmawm kan ti hle.Pathian hmaah ngei pawh thiamthu sawi tlak kan ni lova, chhuan tur dang reng kan nei hek lo, chapo pui tlak pawh kan nei hauh lovang; kan chhuantur awmchhun leh kan chapo pui tur awmchhun chu Krista chauh hi alo ni.Tunlai khawvel kan thlir chuan ram leh khawtlang, mi mal nun pawh sualna khurah kan pil thuk tial tial niin a lang. Hetiang zela a kal chuan kan khawvel hi chenna tlak loh, chenna ngam loh a ni mai ang tih a hlauhawm hle a ni. He’ng nun tlakchhiatna tungding tur leh siam tha tur hian Kristian chhungkua dik tak mamawhna a sang hle a ni.