30.01.2011

Thuchah :

I RAM LO THLENG RAWH SE

(Matthaia 6 : 9-15)

                                                                                                          : Lalremtluanga Varte

Pathian Ram tih chu Pathian Lalna leh rorelna hmun emaw, Pathian duhzawng tihna hmun apiang tiin kan sawi thei ang. Chu ram chu he khawvel lalram ang a hmuh theih leh inthlak thin ang a ni lova. Pathian mite hnenah, an thinlungah a thleng zawk thin a ni. Vana Pathian duhzawng an tih anga Pathian duh zawng an tihna hmun apiangah chu Pathian ram thlenna hmun chu a ni.

Bible chang kan tarlanah hian, "Kan Pa Vana mi, I hming zahawm rawh se’ tia kan chhiar dawt chiah ah hian "I ram lo thleng rawh se" tih in a zui nghal a . Vana mite’n an tih anga he leia mite pawhin Pathian duhzawng chu ti tur kan ni tih bakah hian, nitina kan ei khawp chauh va chaw min pe turin min zirtir bawk a. Kan Pathian hian ni khat tla tur lek ni lo, kan damchhung daih tur hi min pe thei em em a ni. Mahse A mah chauh chu ring a, A hnena in nghat ngam turin min duh vang a ni ang ti rawh u. Vawi khat chan duh tawk pui mai lova, nitin a thar zel dawng turin, nitina keimahni nunah ‘a ram a lo thlen zel theih nan’ min zirtir niin kan hre thin. Chutiangin a dang pawh hi chhut zel ta ila, he tawngtaina thu min zirtir hi keimahni-a A ram a lo din a, a lo thlen theih zelna turin min lo zirtir a lo ni ta-in a lang a ni. Lalpa Tawngtaina hi kan sawi fo tawh thin a, mahse vawiin atang chuan uluk zawkin i ngaihtuah thar teh ang u tiin kan in ngen hmasa a ni.

Pathian Ram chu khawiah te nge a lo thlen thin tih hi i han ngaihtuah ho dawn teh ang :-

1). Kan mimal nunah hian Pathian ram a thleng em ?

Tunkar chhunga i hun hman tawh zawng zawng kha ngaihtuah kir la. I hun hman tawh ah khan Pathian duh danin hun i hmang em ? Zing thawh atanga zan mut hun inkar zawng zawnga i hun hmanah khan Pathian duh zawngin i nung lo a nih chuan Pathian ram hi nangmahah a thleng lo tihna a ni. Kumtin mai a KTP Report a lang thin chu Biak In a Innei aia Hall leh Vestry lama Innei an tam ziah mai hi a ni. Hei hi enge a chhan ni ang ? A chhan bul pui ber chu kan inngaihzawnna ah hian Pathian Ram a leng lova, Pathian Ram a thlen phak loh vang a ni. Kan inngaihzawnna ah pawh hian hawh u, Pathian Ram hi i thlen tir ngam ang u. Tin, a fala kan awm hunah pawh A ram hi thleng rawh se. Mi thenkhat chu khawhar ngai thei lo tlat, a fala awm a zu leh ruihtheih thil tih duh tlat mai te, thil tha lo lam awn ta tlat mai te kan awm thin. Chu chuan kan Thlarau boralna kawngah a hruai fo a ni. Chuvang chuan, a fala kan awm pawhin Pathian ram hi kan hnenah thleng rawh se. Kan hnena Pathian ram thlenna tur daltu a awm i phal suh ang u.

Tin, ‘Kan pawi sawitute laka kan rilru put hmangah hian Pathian Ram hi a thleng phak em ? Pathianin kan sualte a ngai dam ang tak khan kan pawi sawitute hi kan ngaidam em ? Chuvangin vawiinah hian I ngaihtuah teh ang u, kan pawi sawitute chunga kan rilru put dan hi. Phuba lak let duhna thinlung kan la nei em ? Kan la nei a nih chuan i ban san ang u. Chatuan hremhmuna kal mai tur mi sual nung tlak lo te pawh kan Pathian hian min ngaidam duh a nih si chuan keini phei hi chu ngai dam ve mai tur kan ni dawn lawm ni ? Chutianga kan tih chuan A ram chu keimahni ah hian dinin a lo awm dawn a ni. Chumi ah ngei chuan Pathian ram a lo thleng dawn a ni.

2). Kan chhungkua-ah Pathian Ram a thleng em ?

Tunlai natna pakhat chu ‘chhungkaw buai’ a ni. Tuk chhuak a tam chuan engemaw changa thu inbah palh te chu a awm thei teh meuh ang. Amaherawh chu chhungkaw tlakranna leh mualphona thleng khawp thil a lo awm a nih chuan kan chhungkua-ah Pathian ram a thleng lo tihna a ni ang. Pathian ram thlenna chhungkua-ah chuan inremnate, ngaihdamnate, inhriatthiam tawnna te a awm thin. Keini ho hian i ngaihtuah teh ang u. Kan chhungkua-a remna thlen tirtu nge kan nih innghirnghona ? Chhungkua kan hlim loh chuan kan khawvel a thim hle ang. Chutiang khawvela chengte chuan ‘hremhmun pa te’ an tem lawk a ni ringawt mai a ni. Chuvangin KTP member fel tak takte hian kan chhungkua-ah rem len tir ila, a ngaidamtu ah tang zel zawk ila, tlawm a ngaih hun apiangah tlawm ngam ila. Ti buaitu ni lovin remna thlentu ni i la. Chutianga kan tih phawt chuan kan chhungkua-ah, kan unau zingah Pathian Ram a lo thleng ang.

3) Kohhran/KTP a rawngbawlna chanvo kan chelhna-ah hian Pathian Ram a thleng em ?

Rawngbawlna chanvo hrang hrang a awm a. Kan phak ang tawk leh tlin ang tawk zelah Pathianin min hung a ni. Chu rawngbawl hna kan ko-a nghah chu kan tlin vang leh fel vang te, kan fin em bik vangte, kan neih nun vangte, kan hausak vangte a ni lo, Khawngaihna avanga kan chan ve mai a ni. Amaherawh chu sual Setana hian hmanrua a ngah em em mai a. Rawngbawlna kan tih huang chhungah pawh hian chet a thulh chuang hauh lo tih i hria ang u. Vawiin ni-a ka chanvo chelh mekah hian ka lungawi em ? Mi dang chanvo chelhte hi ka itsik em ? Mahni chanvo aia mi dang chanvo kan hmu lian a nih chuan keimah ah Pathian ram a thleng lo tihna a va ni awm ve ? I inngaihtuah chiang ang u. Pathianin min hunna apiang hi lawm takin i pawm mai ang u. Chutiang ni lova neuh neuh leh thu nawi kan nei fo mai a nih chuan he Pathian Ram hi keimahah a thleng lo a ni. Chuvang chuan Pathian Ram thlenna dal theitu reng reng chu i dah bo zel mai ang u.

Pathian Ram thlenna hmunah chuan itsikna, innghirnghona, elrelna, duhamnaten hmun a chang tawh lova, mi dangte mahni aia tha a ngaihna leh dahna te, ka chan ai hi mi dangin chang se tihte a lo ri chhuak tawh zawk thin a ni. Pathian Ram a lo thlen chuan sualin hmun a chang tawh lova, Pathian fakna leh chawimawina aw a lo ri chhuak tawh thin. Mi hnuaihnung leh tawmkai lo te pawh nise, amahah Pathian Ram a lo thlen chuan thup theih a ni lova. Mite hriat tham loh khan mi hriat a lo hlawh tawh zawk mai thin. Pathian Ram thlenna hmun chu zep leh thup rual a ni lova, inthup tum mahse miin an hre tho thin a ni. Chawimawi beisei miah lote khan chawimawi an lo hlawh tawh thin a ni.

Chutiang chuan vawiinni-ah, nang leh kei ah hian Pathian Ram a thleng em ? Keimahni-ah hian mite’n Pathian Ram an hmu em ? Kan mimal nunahte, kan chhungkua-ahte, kan khawtlang nunah te hian Pathian Ram a lo thlen theihna tur chuan sual hnathawh lo lang thinte hi Pathian ralthuam hmangin hmet mit zel ila. He kan damlai hunah ngei hian Pathian Ram/Vanram chu a lo thleng dawn a ni.

Chutianga Pathian Ram a lo thlen theihna tur chuan kan thu sawite Lalpa’n kan za atan mal sawm rawh se. Amen

Thuziak :

ITI VENG PASTOR BIAL KTP CONFERENCE VAWI 2 - NA REPORT

:R. Lalduhawma, Secretary

Pathianni kal ta hmangin ITI Kohhranah a vawihnihna atan Kristian Thalai pawl ITI Pastor bial ten Conferencekan hmang a nih kha, Pathian kaihhruaina a vang liau liau in hun duan lawk te, chanvo ruahman sa, a hlawhtlinna kan hmu a, Bial chhung thalai ten Taksa leh Thlarau lamah pawh kan hlawk tlang hle mai. Kohhran mipuite tan, hriattur tul awm te tarlang ta ila.

Ni 22.1.2011(Inrinni) chawhma khan Rorel leh Inthlan a hun hman a ni a, Rorel Palai tel zawng hi 129 kan ni a, kan Branch atangin Palai 37 ah 36 kan tel thei a lawmawm kan ti hle. Kum 2011-2012 chhunga hmalakna tura pawmte chu :

1) Kum 2011 chhungin Bial KTP intawhkhawm neih ni rawh se.

2) Bial huapin Ramthar (Home mission)-ah Workcamp neih ni rawh se.

3) Bial KTP hmingin Good Friday denchhenin Thisen pek ni rawh se.

4) Bial KTP hmingin Recreation centre-ah chhawmdawkna pek ni rawh se.

5) Youth Recreation centre atana Special Budget central KTP in bial a min rawn tuk thin hi a hranpa khawn ngai tawh lovin Budget-ah khung ni tawh rawh se.( Hei hi Central KTP Com mittee-ah thlen a ni ang)

6) Missionary 1(Pakhat) kan chawm lai hi a chanve a tihpun ni rawh se.

7) Bial pum huapin Bible exam neih ni rawh se.

8) Kum 2011 chhung hian Half Year Meet neih ni rawh se.

Kum 2011-2012 ITI Pastor Bial KTP hruaitu turte: Leader : Pu Lalremruata Ralte ITI VengchhakAsst Leader : Pu Vanlalthlamuana Mualpui BethelSecretary : Pu K Lalremsanga ITI VengAsst Secretary : Pu K Lalropara Mualpui BethelTreasurer : Pu R Lalduhawma
Fin.Secretary : Pu Lalniliana Hauhnar ITI Veng

Ex-Officio

1. Bialtu Pastor 2. Bial Chairman 3. Bial Secretary (Sr)

Commitee member

1. Pu Zochhingpuia, ITI Veng 2. Pu Vanmawia, ITI Veng

3. Pu Zoliana, ITI Veng 4. Nl Vanlaldingliani, Sailo, ITI

5. Pu F Lalrinawma, ITI VC 6. Pu PC Lalrinenga ITI VC

7. Pu TC Ramdinmawia, ITI VC 8. Nl Zodinsangi, ITI VC

9. Pu Joseph Laltanpuia, Bethel 10. Tv Lalremsiama, Bethel

11.Nl K Lalngurliani, Bethel

Editorial :

Kohhran Upa atan tu nge i thlan dawn?

Kan Kohhran chuan 6th February-ah Kohhran Upa kan thlang dawn ta a. "Tunge kan thlan ang le?"

He zawhna hi a pawimawh khawp mai. Kohhran Upa hi Term nei an nih loh avang in an dam chhung a Upa tawh tur an ni a, chuvang tak chuan uluk taka kan ngaihtuah a ngai hle awm e. Duhtui luat avanga thlan tlin neih loh pawh a awm thei tho awm e. Abik takin kan Kohhran hian kan inthlan tawh dan thlirletin Upa kan duhtui viau ni pawh in a lang a, a lawmawm hle. Mahse,hei erawh hi hriat tel a tha ang; mihring pakhatah kan mi duhthusam ang kan hmu kim dawn lo a, mi tha leh mi fel famkim kan duh ang thlap kan hmu lo a nih paw’n a dawttu kan zawn thiam a pawimawh ang.Upa atana han thlan chhuah takah chuan mi tha tak tak tur erawh kan Kohhranah hian an awm nual thei ang.

Kan Kohhran in kan mamawhna hre reng chung in thalai lam te paw’n mahni thalai pui ngei lo chu ti tlat lovin. Tin, kum upa lam pawh in mahni aia naupang thlan duh miah loh ang chi, veng thenkhata awm thin ang awm loin lungrual tak leh thu inhmu taka kan ngaihtuah tlan a tha ang. Tuna kan hlawhchham leh a nih chuan, "Pathian in tul a la ti lo a ni ang e," tia inhnem ngawt a har tawh mai thei.

Nu leh pa te pawh in kan fate thil la hrethiam lutuk lo tur, Kohhran dan zawhkim tawh si, Upa thlang ve thei tawh tur te kan nei a nih pawh in uluk taka thlan chhuah tur hrilh hmasak a tha ang. Mi dangin min thlanpui theih ngei tur ngaihtuah chungin. Pathian hnena dil pah zelin Pathian mi ruat thlang chhuak ngei turin Kohhran mipuite tih takzetin kan rilru seng tlang ila, chutianga kan tih chun Pathianin kan mamawh min pe ngei ang.

 

: ITI Vengchhak -