Thuchah :

BEISEINA

 

: Rev. C. Lalsangliana,

 

Kan Lalpa Isua Krista hmingin Chibai ka buk a che u a, he hun lawmawm lo thlengah hian Lalpa malsawmna a thara dawng turin duhsakna ka hlan a che u. Engangin nge kum thar lo thleng hi kan nghah a, kan lo hmuah le? Mi tam tak chuan ni thar dang ang bawk a ni. a danglamna a awm lo ve. Ni a lo chhuak a, tlai lamah a tla leh ang a, danglamna reng a awm lo ve, an ti a ni mai thei. Zep nak emaw, hun thuhmunah cheng mah ila, a then lawma vanduai tih ang maiin he hun tharah hian kan boruak tawn leh hman dan a inang lo hle dawn a ni. A lawmawm zawng emaw, a beidawnthlak zawng emawa thlirtute pawh kan awm ngei ang. Hlim leh lawm taka beiseina thar nena he hun hmuak mektu; zirna kawngah emaw, thlawhhma lamah emaw, eizawnna lama hlawhtlinna thar avanga hlim taka he hun thar chuangkaite kan awm a nih pawhin kan lawmpui che u a. Duhsakna kan hlan che u a ni.

Chutihlai chuan vanduaina chi hrang hrangin a chenchilh leh a tlakbuak avanga lungngai tam takte pawh kan awm ang. Heng mi chi hnihte hnena ka sawi duh chu beiseina a ni. ‘Pathian lam hawi la, beisei tlat la, lawm rawh,’ tiin kan infuih duh a ni. Tuna i hun tawn meka kha i awm hlen dan tur a ni lo. Vanduaina i chungah a thleng emaw, lawmna nen hun i hmang mek a nih pawhin, kha kha kumkhuaa i chan hlen tur a ni lo. Nipui, fur, favang leh thlasikte a inthlak zel ang hian mihringah lungngaih ni leh tah ni-te awm thin mah se, lawm ni leh hlim ni-te a lo inherchhuak leh thin. Khawi zawk emaw chauh pawh hi thlangin auh din tum mah ila, kan au ding zo dawn chuang lo. Chuvang chuan hei hi i hria ang u - Engkim in ta a ni si a, titu Pathian chuan kan lawm pawhin, kan lungngaih pawhin kan tan heng hun hi a thlentir a, fel taka buk dik sain kan chungah hian a thlentir a ni tih hi i hre reng ang u.

Hla siamtu chuan, "I chungah khua lo durin ringhlel suh la, Pathianin engkim chungah ro a rel a, Khaw dur, khaw thiang nen lei a lo tha si. Mihring siamthat nan khaw dur a ngai a ni"
a lo ti a, Vanduaina nia kan hriat kan chunga a lo thlen pawhin kan thatna tur a ni tiin ngai ila, Pathianin min theihngilh ngai lo a ni tih Isaia 49:14-in a sawi angin Pathianin a mite min theihnghilh ngai lo tih chiang takin kan hmu a ni. Beidawnna hi Setana hmanraw hlauhawm ber a ni thin a, Mi beidawngte hi an khawngaihthlak a, mahni nunna lak duh hialte pawh an lo awm tawh thin a ni. Setana buma awmte tan rah tha chhuak tur a awm lo. Chuvangin beiseina kan neih hi a pawimawh tak meuh meuh a ni. Pathian beisei rawh. Lalpa lam hawi la, beiseinaah lawm rawh tih hi kumthar thuchaha kan infuih duhna chu a ni. "Nimahsela, nang chuan ka kut dinglam hi i lo chelh thin a, Nangin i remruatnain min hruai ang a, chumi hnuah chuan ropuinaah khian mi lawm ang." tiin Pathiana beiseina nghah hlutzia Bible-in min hriattir a, Chuvangin lungngaih manganna kan chungah a lo thleng emaw, malsawmna kan chunga a lo thlen lai emaw, hlim leh lawm taka he Kum Thar hi hmuak mek kan nih pawhin, lawm chungin Lalpa rawng i bawl ang u.

He kumthar hi engang boruak pawhin lo hmachhawn ila, kan thatna tura Pathianin min thawhsak a ni tih i hre thar zel ang u.

Kan awm dan tur Lalpa chungah nghat ila, beiseinaa inchhem alh tawnin kan kianga lungngai mangang leh hrehawm tuarte pawh, hei hi in awm hlen dan tur a ni lo, Lalpa chuan a la kai harh leh dawn che a ni, tiin i thlamuan ang u. He kum thar bul kan tan mekah hian kan dinhmun chu engang pawh ni rawh se, kum thar min hruai thlengtu kan Pathian hian chakna thar min pein min tiharh ang a, lawmna thar min siamsak thei a ni. He hun thar lawmawm hi beiseina thar nen, Lalpaa rinna nghet tak nei chungin i chhiar tan ang u. He khawvelah chauh ni lo, khawvel lo la awm leh turah pawh beiseina nung hmu turin min hring a, chu beiseina nung nen chuan kan hmalam i thlir zawk ang u. Lalpan a thute mal min sawmsak rawh se. Amen

(Synod Moderator in a Sermon ‘Kumthar thuchah’ chhuah min phal sak avang in lawmawm kan ti hle a, Kohhran mipui ten kan hlawkpui ngei kan beisei. Tin, Sermon leh Article chhuah duh nei te, inthlahrung lova rawn ziak zel turin kan insawm nghal a ni e. -Editor)

Thuziak :

K.T.P HO VE HI CHU AW

- Zawmsanga Sailo 

1) KTP huang chhunga tling lo leh fel lo tak chunga a phekpui keu phaka kum sawmhnih dawn ka tal khuk ve laih laih lai kha ka hringnun chhiar tura a buchhah lai ber chu a ni dawnin ka hria. Khang hunah te kha chuan thu chhia/thu thaah kan pan lam lam chu kan nawr chak peih hle thin a, KTP ngat phei chu a kawlpui vuantu kan nih ve miau thin avangin khawdang hawi thei lek lovin kan hmangaih ve tuk mai thin a ni. Chutih lai chuan KTP mawi lohna sawi duhtu han tawn chang a awm ve fo va, chutiang mite han tawn changa tihpatawp engphiara chhuang sen hlarh hlarh khawpa kan tan thin zia te kha ka ngaihtuah let hian ‘ Engkim tana hun ruat’ a lo nihzia thu hi ka hrefiah sawt thin.

2) A thangthat la leh mawi tawk lam ngaihtuah reng reng lova KTP hmalakna a nih tawh phawt chuan kei ber emaw inti ang mai a kan han chet tak tak chuan kan sawi tam a, kan ngaihtuah tam a, kan thawk tam hle thin bawk. Thalai rilru leh taksa a chak vanglai kan ni bawk a, Kohhran thluak burho lu kan tihhai changte hi a awm ve chawk a ni. Mahse, heti khawpa kan lo beih vena hi ka dem lova, fakna tur tam tak ka hmuh belh ta zel zawk a ni. KTP ho te hian kan theih ang tawka tha leh zung kan lo sen thinnaah hian kan dil hauh loh malsawmna lianpui pui hengah te hian kan lo dawng tlat thin a nih chu! Democracy, Socialogy, Phylosophy, Psychology etc. te hi kan nunah kan lo zirchhuak teuh zel nia. Hengte avang hian ‘ KTP ho ve hi chu aw’ min ti thintu te pawh hian an hruaitu atan anmahni aiin min ring zawk leh tlat thin. ‘Lalpa tih hi finna bul’ a lo nihzia chu KTP atang pawh hian a lo hmuh theih reng a lo ni.

3) KTP a rawngbawlnaah hian kum bithliah a awm miau avangin hnahhluite tila hnahtharte an rawn chawrno zel a ngai a, lenlai rual loh pawizia pawh he huang chhungah ngei hian a lo tawn theih reng mai a lo ni. Chutihrual chuan kei ngat phei chu ka kumin min nawr chhuah hmain ka rilruin min nawr chhuak hman hial a. Upa deuh tawh riauva inhriatna pawi tak kara rilru puitling thei si lo vanduaina ka tawk a ni deuh ber mai. Mi te chuan a hun dik takah ngai ngawih ngawihin KTP an chhuahsan a, kei erawh chuan ka ngai hrih lem lo. Mahse, ka thatlai hun zawng zawng deuhthaw ka lo hmanral ve-na a nih miau avangin KTP zunleng hian min phuar reng tawh dawn a, a thatna hre phak khawpa khawngaihna avanga ka lo inhmang ve hi ka damchhung nun tling lo tak hruaingiltu erawh a ni fo ang. ‘Thil hlui te chu a rala ngaiteh a lo thar leh ta’

Editorial :

"Kohhran Upa kan mamawh belh lo?’’

 

Khaw pakhata ka zinna- ah chuan Kohhran Upa an lo thlang dawn a. Pa valai tak pakhat hian, "Kohhran Upa kan mamawh belh lo a sin maw le, tuna kan Upa neih zat hi an la tawk ka ti rih e" tiin a sawi a. Tuna kan Kohhran dinhmun thlir hian he pa tawngkam ang hi hmang ve thei kan ni em le? Kohhran Upa kan thlang dawn hnai a, Upa hi kan mamawh belh nge tuna kan neih hi tawk kan la ti? A chhanna chu mimal tinin kan nei nghal theuh awm e.

Tunah hian Kohhran Dan zawhkim hi 677 kan ni a, Upa 5 kan nei a, Kohhran Upa pakhat hian Danzawhkim 135 theuh chang ang in a chhut theih. Bial chhung Kohhran dang bakah chhak lama kan hnaih ber Kohhran, Republic Vengthlang Kohhran dinhmun han thlir dawn ila- ITI Kohhran-ah dan zawhkim 861 an awm a, Upa 8 an nei a, upa pkat in member 107 chang ang an ni . Bethel Kohhran ah dan zawhkim 265 an awm a, Upa 6 an nei a, Upa pakhat in member 44 chang ang an ni a. Republic Vengthlang Kohhran ah dan zawhkim 1069 an awm a, Upa 9 an nei a, upa pakhat in member 118 vel chang ang an ni bawk a. Heng Kohhran dang dinhmun kan thlir hian Upa kan mamawh zia alang thei awm e, Tin, tuna kan Kohhran Upa 5 neih te zinga 3 te hi kum lamah pawh Upa lam pawl tawh an lo ni ve ta a, Upa kan mamawh belh zia hi chu a lang hle awm e. Kan Kohhran hian Upa vawi thum kan thlang tawh a, tum khat kan hlawhchham a, tum hnih dangah pakhat veve kan thlang chhuak thei hram a nih kha. Upa thlan hlawh chham te, dil zat ang thlan tlin loh te hi a chhan kawng hnih in an sawi thin- Mi tha tam lutuk vanga vote darh leh Kohhran in lungrual loh vang te in.

Eng vanga lo hlawhchham tawh nge kan nih tih chu dah tha ta ila, tunah hian Kohhran in kan mamawh a, chuvangin lungrual tlang taka kan dil zat thlang chhuak thei ngei turin tun atanga kan rilru kan sen lawk a tul awm e. Kan mi duhthusam kan hmu lo a nih pawh a dawttu tal kan zawn thiam a tul ang. Tun atang in kohhran member tin te he kan Upa thlan tur pual hian tawngtaina nena tang chungin Pathian mi ruat thlang chhuak thei ngei turin inbuatsaih lawk ang u.

Branch Huang :

Kohhran Zaipawl member thar ruat a ni ta a, naktuk thawhtan zan inkhawm banah hla zir hmasa ber leh inhmuhkhawm neih tur a ni. Bial Kohhran Hmeichhe inkhawmpuia February thla tir ah zai nghal a ngaih dawn avangin member te thahnemngai taka hla zir nghal turin kan in sawm a ni e.

Bial KTP Conference chu tluang taka hman chhoh mek a ni a, member kan tam loh avang in Branch member te thahnemngai taka inkhawm thin turin kan in sawm a

Rorel Palai ni sa leh ruatte phei chu rorel ni chauha kal lova harsatna bik kan nei a nih loh chuan Programme apianga tel ziah tur kan ni tih i hre thar leh ang u.

January thla Faith Promise lakkhawm chu hawn a ni a, ` 15790 hmuh a ni.Nikum January Faith Promise kan khumna hi ` 3400 a ni a, Member te inpekna ah Branch Committee chuan lawmthu a sawi a ni.

Moderator, Mizoram Synod