09.01.2011 - Thuziak

"BEI NAWN RAWH"

Lehkha ziaktu pakhat chuan heti hian a sawi: "Ka hlawhtling lo reng thin a, mahse keima taksa chhungrilah hian tlawm ve ngai lo laimu a awm a. Bul tan that lehna tur hi ka nei mai a ni" a ti nia.

Bul tan tha leh tura inpeih reng mai chu leh! Nunphung duhawm tak chu a va ni tehlul em ! Bul tan that leha siamthat theih loh leh hneh theih loh hlawhchhamna hi tlemte chauh a awm thin.

Naupang te tak te pakhat, a thiante aia awm nem zawk fea lang hian chuan-tawlh (skates) hi a thiam riau mai a. An chhungkuain awmhmun an han sawn chuan an awmna tharah chuan a thiante’n an lo ngaisang ta khawp mai a. Chu naupang chuan eng danga chhang lovin, "A har lo lutuk. Ka tluk a piangin ka tho leh zel mai alawm," a ti euh mai nia.

Indopui Pahnihna hunlai, April ni 30, 1944 khan France rama Dunkirk chung zawnah thlawhna khalhtu Ed Northern chu an kapthla a. A ruang an hmuh tak lovah leh a chanchin an hriat zui tak lovah chuan a thi ni ngeiin a lang. A lehkha dahkhawm an han hai chuan hetiang thu hi a lo inziak a. A chhiar duh mi tan chuan a ngaihnawm teh a sin.

"Lalpa duhtak, ka damchhung hunah hian tangkaina nei ve turin min tanpui ang che. Hna awlsam ka duh lo. I mi pek zawng zawng hi rulh leh vek che ka duh mai a ni. Min mamawhna hmun apiangah min dah la. Hna harsa min pek chuan keimah min rin avangin lawmthu ka hrilh ang che. Nang leh kein kan sutkian zawh loh eng harsatna mah ka hmachhawn dawn lo tih ka hriatreng theih nan min pui la. Harsatna chu chona anga ngai thei turin min pui la, tlawmna, dodalna leh buaina te hi pumpelh sen a ni lo tih hrethiam turin min tanpui ang che. Chung avanga lawm nachang hre tur chuan min tanpui bawk ang che.

‘Rinawm tak leh dik taka awm turin min pui la, Midang chu eng ang pawhin lo awm se bumna hmang ve lo turin min pui ang che. Lalpa, nikhaw hre lova ka awm emaw, tanpui ngaia ka awm emaw, natna avanga tawnkailo emaw ka lo nih pawhin a pawm dan thiam turin min pui ang che.

‘He hringnun indona hi a lo tawp a, thimnain ro a rel hunah chuan dawt hmanga fakder ka duh lova. I mithmuhah tling takin ka nun ka hmang tih hriat chauh

ka duh a ni.’

He tawngtaina hla aia hnehtu rilru keng chham chhuah a har viau awm e.

- Anonymous