SOCIAL GOSPEL
: Upa R. Lalthankunga
Chairman, Kohhran Committee
“Mi hausa leh mi rethei an awm za a, an vaia siamtu LALPA a ni.” : Thufingte 22:2
Nikum 2010 kumthar Thupui leh Thuchahah khan America President Barak Obama dungzuiiin CHange kan hmanga a, kumin kumthar 2011 atan chuan “Social Reform” in bul tan leh ila a tha awm e. “Social Reform” hi tawng dang ni mah sela, Mizotawng tluka kan hman lar ve pakhat zingah a tel awm e. Hrilhfiah loh pawhin a awmzia kan chiang tlang in a rinawm.
Mihring hi a huhova cheng (Social animal) kan ni a, Mizo thufing chuan ‘Lungpui pawh lungte in a kamki loh chuan a awm thei lo’ an lo tih angin, mihring tumah hi mahni a ding thei leh awm thei kan ni lo. Kan Pathian thu chuan, ‘Mihausa leh rethei an awm za a, an vaia siamtu chu Lalpa a ni” Thufingte 22:2 a a tih angin, mi tupawh hi inkamki tawn theuh kan ni a, mihring kan nih miau avangin, Pathianin angkhat vekin min siam a, kan neih (pianzia-ah) a in ang vek a ni. He kan Thupui pawh hi a huam chin a zauh em avangin thlur bing deuh neiin a tlangpui chauh kan sawi dawn a ni.
Kan thupui hian, Pathian in lei leh van inkar zawnga a siam hi a huap thei, mihring leh thil dang zawng zawng a huap a, chutih lai erawh chuan, hriatna nei, a tha leh mawi, dik leh dik lo, fel leh fel lo dinhmun inchen lo, mihringte kan nunhona thlenga, kan hmachhawn mek chungchangah zir tur erawh a tam em avanga, a bik taka Ringtute hmasawnna lam hawi tarlan a ni dawn a ni.
Mi tumah thlei bik lova, a lian a te, rethei leh hausa te, kan khawsak tlanna khawvelah hian kan lo in thlau thei hle mai a lo ni. Pathian thu a kan hmuh angin, Kristaah chuan mipa leh hmeichhia a awm theih loh (Galatia 3:28) Chanchin Tha Lal Isua chanchin hi mi zawng zawng tan a ni kan tih rualin, mi rethei tan te, mi mawl zawk nia inhria te chuan, mi hausa leh awm thei te dinhmun ang phak loh ni a inhriatna a lo lian thei hle mai. Mi neih ang nei pha lo, in leh lo pawh nei mumal lo, khawsakna pawh hniam ve tak ni a in hria te tan, khawvelah hian chungpik taka rilru leh ngaihtuahna te hmanga, zalen ve lo riauva inhriatna te hian nih tur ang nih phak lohnaah mi a hruai thin. Chu chuan, kan nunhonaah an in thlahrung a, a in kiltawih a, tling ve lo leh tlak ve lo ni a inhriatna chuan hniam takah mi a hruai thin. Retheihna leh pachhiatna avangte, bawrhsawmna hrang hrang avangte in mi a nih tur ang a ni lo fo thin.
He dinhmun in anglo tak hi a ni Social Gospel kan tih chuan rual tak a mi a hrut tum chu ni. Kan Lal Isua kha rawng a bawl chhung a, a hun hman tamna pakhat ni a lang chu, mi hnuaihnung miten engmaha an ngaih loh, an hmuhsit leh na chi hrang hrang nei dam lo te leh mi retheite hnenah niin a lang. A hnapui leh ngaih pawimawh pakhat chu mi rethei leh chanhaite a ni.
Lei mihringte chunga lo thleng fo thin retheihna leh harsatna hrang hrang laka mi te chhanchhuahna hna hi kan Lal Isua thil tum ropui tak, chhunzawm chu nungdama la awm te mawhphurhna a ni ta ni. Kum 2011 lo thar hian a hranpain rilru thar a pianpui ngawt lo. Keimahni zawkin rilru thar kan put leh put lovah a innghat zawk a ni. Kan chenna khawvela kan bul hnaia awmte harsatna hrang hrang neite ngaihsak leh tanpui te hi a ni Pathian Hmangaihte Hmangaih puitu retheihna hrang hranga rethei te lah harsatna hrang hrang a harsatna neite hi Social Gospel thil tum a ni e. Tunlai hunah pawh Kohhran leh tlawmngai pawlte, mimal leh NGO te pawhin hei hi kan hmalakna a nih mek lai hian tun aia hmasawn hi i tum tlang ang u. Hei hi kum kalta a “Change” kan thupui chhunzawmna zel a ni e. Kum thar hmalaknaah i nei theuh ang u.
No comments:
Post a Comment