Editorial - 09.01.2011

ZAI KHAWM LEH CONCERT

Mizo ten ‘kumhlui thlah zan’ kan tih zan khan (khawvel hun chhiar dan chuan 1st January, 2011, zing 12:30 vel a ni tawh zawk awm e) ka room tukverh atang chuan halpuah leh halmawi ri a awm mial em tih ngaichang deuh chungin Zemabawk lam chu ka thlir vang vang a. College veng Field a kum thar lawmna atana Sawrkar meuhin a buatsaih Concert thawm pawh chu chiang takin a hriat theih a. Ka ngaihthlak lai tak chuan PC-a’n "Don’t let me down.." tih hla a sa thawm leh mipui ten an lo zawm ve dual dual thawm pawh chu a hriat theih a. Chung zai dual dual ho chu Kum thar lawmna ruai Fatu tur an ni lem lo turah kan ngai nghal ngawt bawk a. A hmunah hmu chiah lo mah ila an thawm atang chuan za chuang fe an awm ngeiin a rin theih bawk a.

　

Chutih mek lai chuan Mualpui Bethel lam atang paw’n thalai rual zai khawm thawm chu thli in a rawn beng fuh chang chuan chiang takin a hriat theih bawk a. "Chhandamtu min hruai zel rawh, damlai thlaler hmun khawhar ah..." tih hla chu khawhar takin an sa ve that that bawk a, an thawm atang erawh chuan Concert a kal thalai hmun thuma then hmun khat pawh an zat lo tih a chiang hle thung. Mahse, a ri erawh ka beng atang chuan a ringin a mawi danglam hle thung.

Sound System tha tak nena Concert thawm leh Bethel lama Sound system tel miah lo a zai thawm chu ka ngaithla dun reng a. Kum thar hmuaktu, abikin thalai rual ten kan kumthar hmuah dan inang lo lutuk chuan rilru a ti kal thui hle mai a. Thalai tlemte ten he kum thar lo thleng tur hi fimkhur tak leh Pathian tana inpek tharna atana ‘Promise’ an siam thar laiin, thalai rual tam zawk te chuan kan nun a thu tawp neitu leh kum thar min hruai thleng theitu awm chhun chu Pathian chauh a ni tih pawh hre duh lo in khawvel nawmsitbawlna kan um zawk tlat mai a. Kha zan leh he hun pui bawr vel a hmeichhe tleirawl khawlaia an tam zia leh khawlai piah lam hmun fianrialah pawh hmuh tur an tam zia te han ngaihtuah phei chuan he hun pui kan hman liam takah khan tleirawl engzat in nge ‘THIANGHLIMNA (VIRGINITY)’ hlauh ang a, eng zat in nge HIV+ vei thar ang aw??

Thalai ten hei hi i hre thar teh ang u- hunpui boruak chu eng ang pawhin lo hmang liam tawh pawh ni ila hunin a liam pui tawh a, a tha lo lai a awm anih pawhin siam that theih a ni tawh lo. Hun kan la hman tur erawh chu a chhiat leh that pawh thui tak kan kuta awm a nih avang in he kum kan hman chhoh turah hian uluk tak leh Pathian a inhlan thar zelin hun hmang ila, kan thlah kal zel turte hnu chhui tlak kawng zawh chhohna kum niturin bul i tan teh ang u

Bul tan that nan a la tlai chhe love.