24.04.2011

Thuchah :

Kraws-a Isua thihnaa Ringtute’n

hlawkna kan chante

- Pastor B. Sangthanga

    Khawvel sual chhandam tura Isua Krista thihna hi khawvel tan a hlut em avangin hmasang ata tawh ringtute’n an ngai urhsûn êm êm thin. Easter Sunday hma chawlhkâr ruk leh a chanve (Ni sawmli chhung) hi Lent an ti a. Chu chu Lal Isua’n thlalera ni sâwm li leh zan sâwm li chaw a nghei hriatreng nan leh a tuarna tawmpui ve nan an tih thin a ni. Hemi chhung hian kawng hrang hranga inserhin Lalpa zanriah chan hote, hlim hlawp laka inthiar fihlim te, sa lam chi rêng rêng ei loh leh nikhata chaw vawikhat chauhte eiin an serh thin. Tin, thlarau nun thuk zawk nei turin Pathian pâwlna tam leh zual an insiam bawk thin. Good Friday kar hi Nunna Lal Thianghlim thihna kar anih avangin Kar Thianghlim (Holy Week) an ti a, zah leh urhsûn takin an hmang bawk thin.

Pathian chatuan thinlunga hmangaihna awm reng leh misualte tana tlanna kawng a rawn buatsaih dan hi a makin a ngaihnawm êm êm a, mihringte chhuichhuah phak rual erawh a ni lo; Pu RL. Kamlala’n "Aw, a thukin a va sâng êm, I finna leh i hmangaihna; Thlarau khawvêla rimawite leh van tawngte’n an puang seng lo" a ti hi a ti dik a ni. He hun pawimawh takah hian kan tana Krista thihna hlutzia kan hriat thara, hlawkna thar kan chan beiseiin kawng li chauhin i lo thlirho dâwn teh ang.

Sual tlanna (Redemption) : Tlanna tih hi a tirah chuan indona avanga lung In tangte chunga hman thin a ni. Tangho chu tlanna sum pein an la chhuak thin a. Hun a lo kal zela bawih (Slaves) ho chungchangah an hmang leh a. Tin, Mosia danah chuan Sebâwngin mi a sik hlum chuan denhlum ve tur a ni. A tlana tlan tura sum an tuk erawh chuan an tuk zat chu pein an tlan chhuak thei bawk(Exod. 21:28-30). Mihring hi sual bawihah kan tanga (Joh. 8:34) chu sual man (wages) chu thihna a ni (Rom 6:23).

He rilru atanga kraws kan thlir chuan Kraws-ah Isua’n kan sual man a pe a, tichuan zalen kan lo ni ta! Bible chuan "... a thisen avangin amahah chuan kan tlanna kan nei a ni,’’ tih min hrilh (Eph. 1:7). Hei hian chhandamna tozia, mifel nunna hmanga lei kan ni tih min hrilh.

Thuphachawina (Propitiation) : Hemi awmzia chu thinurna la bo tihna a ni. Pathian thinurna chu misual chungah a awm reng a (Sam 7:11, Kol. 3:6). Chu Pathian thinurna chu Krista thihna chuan la bovin, sual hremna rapthlak tak chu a pumpelh tir ta a. Bible chuan "Ani chu kan sualte thuphachawina a ni; keimahni sual chauh ni lovin, khawvel zawng zawng sual thuphachawina pawh a ni," (I Joh. 2:2) tih min hrilh. Chu kraws chu tlawmin hmuhsitawm hle mahse miin a’n enchianga a hlutzia a hmuhbelh zela, "Aw,chu kraws,khawvel mi hmuhsit leh endawng chu,kei ka lunglai kuaitu a ni a" an lo ti hial thin.

Inremlehna (Reconciliation) : Hei hi thumawi leh ngainatawm tak a ni. Innghirnghona a awm reng rengin a chhan zawn chhuaha chinfel a nih loh chuan inremna tak tak a awm thei ngai lo. Pathian leh mihring kara inremlohna (hostility)/‘intaina’ chu a tisaa tibovin inremlehna kawng a lo inhawng ta a ni.(Eph.2:14).Bible chuan,"Pathian nena lo inrem tawh"(Rom 5:10) kan nih min hrilh.Pathian mi ropui Augustine-a chuan Pathian hnen ata vak bo kan nih leh kan in ngai,Pathian hnen kan thlen leh hma chuan kan thlarau chu chawlhna zawnga tuihala a vah a vah thin thu a sawi.Thlarau vakvaiin siamtu Pathian an hmuh chuan a lawm em ema, ‘Lalpa ka pawlin ka thinlungah,thlamuanna tui a luang;ka thinlunga lawmna ri chu,thatnain a par chhuak’an ti thin a ni.

Thuthlunna (Covenant) : Bible-ah hian thuthlung tam tak kan hmu. A pawimawh leh langsar ber chu Pathian leh a mite kara thlun hi a ni. Pathianin Israel-ho hnenah, "Ka thu in ngaihthlak tak zeta, ka thuthlung hi inpawm chuan khawvel hnam zawng zawng zingah hian ka tan ro thlan bik, ... puithiam chi, hnam thianghlim in ni ang" (Exod.19:5-6) tiin a zawrh a. Israel mipui chu pungkhawmin an han ngaihtuah a (Exod. 19:8) tha an ti hle ni tur a ni, "Lalpa’n a sawi zawng zawngte chu kan ti zêl ang a, mi tihâwih tak kan ni zel ang," (Exod. 24:7) tiin an chhang a. Tichuan, thisen hmangin thuthlung chu tihngheh a ni (Exod. 24:8).

Hun a lo kal zela chu thuthlung chu an bawhchhe chamchi a, Lalpa chuan, " Ngai teh, ... Israel chhûngte leh Juda chhûngte hnênah chuan thuthlung thar ka siam ang" (Jer. 31:31) a ti a. Tin, chu thuthlung thâr chu a hmasa aiin a danglam hle dawn a ni tih pawh a sawi a (Jer. 31:33&34).

Lal Isua’n a zirtirte zanriah hnuhnung a kilpuia no a lak a, an hnêna a pek khan "He no hi ka thisena thuthlung thâr chu a ni," (Lk. 22:20) a rawn ti ta chat a. A taksa chu chaw tak, a thisen chu in tur tak anih thu sawiin, "Tupawh ka tisa eia ka thisen in chuan chatuana nunna a nei tawh, tin, nikin niah chuan ani chu ka kaitho vang"(Joh. 6:54) a ti a ni. Hei hi thuthlung tha lehzual anih thu Hebrai ziaktuin min hrilh a (Heb. 8:6). Hei lo chu thlun nawn a nih tawh dawn loh thu leh ngaihnêp chi a nih lohzia min hrilh bawk (Heb. 10:26-29).

Tum khat chu Aigupta ram Bawih zawrhna hmunah Negro tlangval hmel fel tak hi an zuar tel a, sap pain lei tumin a hel a. Chu Negro tlangval chuan an lei tak tak anga a thiante leh chhungkhat laina hmuh phak lohna hmunah an kalbopui daih ang tih hlauvin a mangang hle a, lei tumtu sap pa chu anchhiate lawhin a vau vel a. Nakinah chuan in leinate ti felin chu Negro tlangval hnenah chuan, "Tunah chuan i bawih nihna ata i chhuak ta e. I bawih nihna atangin ka lei chhuak ta che a, tunah chuan i duh duhin i awm thei ang" a ti ta mai a. Chu Negro tlangval chu a lo danglam ta, sap pa chu a en ta tlawk tlawk a, mittui nena vuanin, "Ka pu, kumkhuain i bawihah ka awm ang e. Khawi hmunah pawh i duhna apiangah min hruai ang che, ka thih hma loh chuan i rawng ka bawl ang e" a ti ta hial a. Miin Lal Isua hmangaihna leh tuarna natzia an hmuhin "Ka vahbosan tawh lo’ng khawvêlah hian, ka hmangaih, ka Lal Chhandamtu; Aw, i thlarau thianghlimin min hruai la, I hmel duhawm chu min hmuhtir rawh" an ti thin.
Thuziak :

ITI VENG PASTOR BIAL INKHAWMPUI VAWI 2-NA

TLUANG TAKA HMAN ZAWH ANI TA

* Bial Chairman Elect atan Upa Kapzauva ruat a ni.

* 2010-2011 inchhiarna tanga a lan danin kan bialah dan zawhkim mi 1833 kan awm

Dt 15-17, April chhung khan Bial Inkhawmpui chu kan Kohhran Biak Inah tluang taka hman zawh a ni ta a , Inrinni(Dt16/4/2011) zing 10:00 atanga tlai dar 5:00 thleng in Palai 138 ten taima takin rorelin Kohhran mipui ten kan hriattur tlangpui han tar lang ila.

I. KUM 2012 BIAL INKHAWMPUI PROGRAMME LEH PUIPA TURTE

A hun : Dt 27-29, April, 2012

A hmun : Mualpui Bethel Kohhran Biak In

Thlarau lam thupui : ‘Nun Krista’ (Phil 1:21)

PUIPA TURTE

Chairman : Upa Kapzauva ITI Vengchhak

Secretary(Sr) : Upa S. Lianchhuma ITI Veng

Secretary(Jr) : Upa Ramngaihzuala Mualpui Bethel

Treasurer(Bial sum) : Upa V. Lalzawmliana ITI Vengchhak

Treasurer

(Synod sum) : Upa K. Lalthakima ITI Veng

II. KUM 2011-2014 CHUNGA SUNDAY SCHOOL SECRETARY TURTE

Secretary : Upa R. Laldingliana ITI Veng

Asst. Secretary : Upa H. Roenga ITI Vengchhak

III. KUM 2011-2012 BIAL SUM AUDITOR TURTE

Upa R. Laldingliana (ITI Veng) Upa R. Lalrinawma (ITI Vengchhak)

IV. KUM 2011-2012 BIAL BUHTHAM ZIAKTU TURTE

Pi R. Lalramliani (ITI Veng) Pi Lalruatmawii (Mualpui Bethel)

V. SUM CHUNGCHANG

1. Sum hmuh zawng zawng : ` 59,933/-
   Sum hman zawng zawng  : ` 52,039/-

   Hman bang :  ` 7,894/-

2. Kum 2010-2011 chhunga Synod-a sum chhun luh zat : 
   ` 41,03,633/-  (Per DZK-` 2,238.75)

3. Kum 2010-2011 chhunga Bial chhung Pathian ram thilpek belhkhawm :
    ` 77,44,188/- ( Per DZK- ` 4,224.87)

Kum 2010-2011 chhunga kan Kohhran bik Pathian ram thilpek:
   ` 40,90,956 (Per DZK-` 6042.77)

4. Kum 2011-2012 bial Budget : ` 1,09,000/-

VI. GENERAL(Agenda pass te):

1. Bial chhung Kohhran tinin vawi khat tal Kristian chhungkaw Campaign neih ni rawh se.

2. Tual Upa, Bial inkhawmpui-in thlan phalna a pekin, a hlawhtlin leh tlin loh Bial ah Report leh thin nise.

3. Bial Standing Committee thuchhuak te bial chhung Kohhran tinah Kohhran Copy sem chhuah thin ni rawh se.

4. Bial huapin Sunday School Training neih ni rawh se.

5. Kan Bial Kohhran te, kan inhmelhriat leh inpumkhatna tha zawk kan neih deuh deuh theihna kawng zawn ni rawh se.

6.Tual Upa thlan anih dawn in a thlanpuitu turte hi Nomination Committee in ruat thin tawh rawh se.

7. Kan Kohhran innei turte Testimonial kan inpek tawn thin ah hian Date of Birth ziah lan thin nise.

8. Bial huapin Upa leh Tual Upa Seminar buatsaih ni rawh se.

9. Masih Jivan Sangh enkawltu tur chu Bial Standing Committee-in a ruat thin ang.

10. Synod Pastoral Ministry kaihhruaina 2006 phek 31-na sub No-4 hi tha taka zawm tura in fuih ni rawh se.( Presbytery-a kal zel tur)

11. Nikum Bial inkhawmpui-in Type Writer lei nise a tih chu lei tur a awm loh avangin lei loh mai nise tih a ni.




Editorial :


    Pathian din Kohhran hi a ropuiin a zahawm a, he Kohhran chhungah hian a duh apiangte chu an leng vek a ni. Mihringin thih hnu lam thlenga thlamuanna a zawnna hmun a nih avangin a nep lo a. Kan hnam kalphungah pawh hmun laili tak a chang zel a ni. He Kohhran ah hian mi chi hrang hrang, inang pakhat mah awm lo kan lawi khawm a. Kan kalphung tur pawh Pathian rawn chungin mihringin kan rel thin.

He Kohhran neitu chu a member zawng zawngte kan nih rualin a khaiding turin peng hrang hrangah chanvo chelh bik an awm thin. Heng mite hi hotu ni lovin hruaitu ni tura chanvo chelhte an ni. A nawlpui hmaah kalin sul sutute an ni. Pathian rawn chunga thlan leh ruatte an nih avangin hruaitu/rawngbawltu-ah kan pawm a. Lawm tlaka rawngbawltute chu Pathianin a mite thinlungah a chawimawi thin.

He rawngbawlna kawngah hian kan thiamna, finna leh theihna kawng hrang kan hmang a. Hmasawn leh thanduan kan tum luatah hian mihring tak hian thahnem hi kan lo ngai fal ang tih hi kan inven reng a ngai thin.Um phak loh lutuk hruaitu chu a hnunga mite tan um reng a har hun a awm thin.

Eng mi pawh lo ni ila, rawngbawltu ka nih chuan tu rawng nge ka bawl le? Ka nitin hnathawh kawng-ah a tirtu emaw an tirh-a emaw pawh lo ni mah ila, chu kan zia chu he rawngbawlnaah hi chuan chhawm luh a rem lo a ni. Kan nitin nunphung leh nihna hi A rawngbawlna kawnga min kaihruaitu atan hmang ta theuh ila, rawngbawltu, nihna inang rau rau hi kan dinhmun a inthlau zung mai lo’ng maw?

-Jt. Editor

Branch Huang :

Nimin, Dt. 23.04.2011 khan ITI Veng Pastor Bial KTP chuan Good Friday denchhenin thisen pek a ni. Ni 21.4.11 (Ningani) VENPUI ZAN zaikhawm ban khan Evangelism Sub-Committee bul tumin World Bank Road-ah Bethel a ni a. Member 18 lai he hunah hian kalin hun an hmang thei a ni.

BETHEL : Ni 21.4.11 (Ningani) VENPUI ZAN zaikhawm ban khan Evangelism Sub-Committee bul tumin World Bank Road-ah Bethel a ni a. Member 18 lai he hunah hian kalin hun an hmang thei a ni.

17.04.2011

Thuchah :

‘A KIN TA’

: Rev. F Lalrinnunga, Director

    "Tin, Isuan uain thur chu a lo inzawh chuan ‘A kin ta’ a ti a. Tin, a lu a kun a, a thlarau a thlah ta a." - Johana 19:30

Kristiante hun hlu ber leh ropui ber mai Good Friday kan lo thleng leh dawn ta. He hun ropui, Lal Isua kan tana a inpekna avanga taksa leh thlarauva chhandamna kan chan hi Pathian Thlarau Thianghlim zarah hlawk taka kan hman theih ngei ka beisei.

Thupui atana kan thlan, ‘A kin ta’ tih hi Lal Isuan Kraws lera hnehna hlado a chham a ni. He thu ropui tak hi han sawi zau ta ila. ‘Tihzawh a ni ta,’ Mihringte chhandamna tura ka tihtur chu ka ti zo ta, Khawvel chhandamna tura ka hna chu ka hlen ta,’ tiin. Lal Isua chu a hmelmaten, ‘Kan hneh a, kan ngam a, kan ti hlum ta," an tihna hmun ngeiah chuan khawvel chhandamna thu a puang chhuak ta. Hla phuahtu, Evan Gwylt (John Rober) chuan, ‘Sawisatu thate a tichak a, amah thinglera khenbeh nan,’ a lo ti a. Khawvel damna turin Isua chu hmelmaten an khengbet a, hmelma/sawisatute tha a la tichak tlat mai hi Pathian hmangaihna thukzia leh makzia tilang chiangtu a ni.

Lal Isua tuarna leh inpekna avangin chhandamna chu chawp leh chilhin a thleng. Misual khenbeh tur Barabba chu a aiah Isua khenbeh a nih avangin chhuah a ni a, a taksa ngeiin chhandamna a chang. Misual thi tlak ngei chuan thiam chantirna a chang nghal mai, a va ropui em! Misual thi mek an khenbeh, Isua dinglama mi khan Isua chhandamna hnathawh, ‘A kin ta’ tih chu a takin a chang a. Thlarau lam damna neiin a chawl ta. Tunah hian nang leh kei ngei pawh hian Lal Isua Krista chhandamna kan chang nghal thei a ni.

Rev. Liangkhaia chuan, "Aw, Ka thlarau chu tlangah chuan, Chhun zanin va leng fo la; I Lalpa Kraws lera awm chu nungin i va hmu ang a, Kalvari tlang chanchin a lo hrilh ang che." a ti a. Lal Isuan Kalvari tlang chanchin min lo hrilh chu, ‘I tuar ai tuarin ka nun ka hlan a. I damnan ka thi a. I thlamuan theihnan ka thlaphang a. I nuih theihnan ka tap a. I hlim theihnan ka lungngai a. I dam theihnan ka na..." tiin min lo hrilh a ni.Unau duhtak, hetiang taka min tuarsaktu tuarna hi a thlawnin a thisen i far tir lovang u. Taksa, thlarau leh rilru tan damna, damna kim Isua-ah i tlu lut ang u. Chhandamna min siam zawhsak tawh hi a tak ngeiin i hmang ang u.

Lal Isua hnehna puanchhuahna hmun hi tuarna hmunah a ni tih hi tarlan loh theih loh a ni. Lal Isua tuarna vawrtawp, a hna a tleitlakna chu mi dangte tana inpek ralnaah a ni. Chawimawina leh Lalna tlangah Isua a ding thin, mahse, a tlansan a, a rawngbawlna hlenna tur hmun. ‘A kin ta’ tia hnehna hlado a chham theihna hmun tur Kraws a pan tlat mai a ni. Lal Isuan chawimawia hming zawng zawnga hming chungnung ber a channa chu Kraws tuarnaah a ni. Hmuhsitna, diriamna, elsenna, sawisakna, tihduhdahna, dawta hekna, dik lo taka rorelsakna, thil tisual lo khenbehna hmunah chawimawina leh ropuina a chang. He hmun thleng tur hian Isua chu tlanchhiatsan a ni a, phatsanin a awm a, riltam dangcharin a awm a, mal ngawih ngawihin, "Ka Pathian, ka Pathian engah nge min kalsan?" tiin a au chhuak hial a ni. Hetiang taka tuarna hmun ngei mai hi keini ringtute kawng zawh ve tur chu a ni ta. Ka Lalpa tuarna kawng hi kan zawh ve peih ang em le? Chu Kraws kawngah ngei mai chuan a ni, chawimawina leh ropuina chu a awm ni. Unau duhtak, chu kawng chu i zawh ve ang u. Tichuan, nang leh kei hian chawimawina leh ropuina dik chu kan chang ve dawn a ni.

Lal Isua hnehna au thawm hian kan mihring hlui, kan thlarau lam nun min titap fo thintu chu a hneh tih hian kan thupui hi titawp ta ila. Tirhkoh Paula chuan, Lal Isua thihna chu a thihna, a sual pu taksa chinralna a nih thu a sawi a. Kraws-ah khan mihring hlui chu a ngaihtuahna sual chawpin khenbeh a nih thu ropui takin a puang chhuak a. Chu Kraws thiltihtheihna chu mihring chhandamna tura Pathian thiltihtheihna a nih thu a tarlang bawk a ni. Hetiang hian han sawi ta ila, kan mihring hlui thlarau lam nun vaw chau thintu chu, ‘A kin ta’ ‘Hnehin a awm ta’ tiin au chhuak ve thei ila, a va ropui dawn em! Lal Isua tuarna leh inpekna avang hian nang leh kei hian sual thihsana felnaa piantharna diktak kan lo chang thei dawn ta a ni. Pathian remruatna fel tak avangin taksa, rilru leh thlarau-a chhandamna chu kan lo chang ta.

Kan Lal Isua hnehna puanchhuah, ‘A kin ta’ tih hian sual laka chhandamna, ropuina leh chawimawina, tuarna phena malsawmna, taksa, rilru leh thlarauva chhandamna kim min siamsak a, a makin a va ropui em! Kan Pathian chu fakin awm rawh se, Amen.


Thuziak :

"NANGMA THIL ROPUITE AN SAWI"

(KHB No. 363)

    He hla hi John Newton- a phuah a ni a, Kohhran phuahna a ni: a chang tlawh chhan chu Sam 17:53 kha a ni. Amah hi mi hmingthang tak mai a ni a, London khawpui a Biak In pakhat St. Mary Woolnoth-ah pawh amah hriatrengna bel a awm a, a chanchin an ziak nasa khawp mai. Tun hmaa ring lo mi a nih te, Lal Isua a lo rina ngaihdamna a hmuh te, thu hril tura ruat a nihzia leh a rawngbawlna hmun te an ziak a ni. Chu chuan a nun dan chanchin a khaikhawm hle mai.

Amah hi lawng lam mi fapa a ni a, amah pawh hi kum 11 mi a nihin kum 1736 khan, a pa lawngah lawng mi hna a thawk tan a, naupang ho tak, che pawlawh tak a ni a, nula rim pawh a hre hma hle. Mary Catlett-i a ngaizawng ta a, ama sawi hmangin "ka rilruah englai mahin a dai ngai lo" a ti hial a ni. A nakin deuhah chuan a che hiar ta deuh hle a ni ang, vuak hrep te pawh a tawk a, chuvangin a thawh pangngai pawh thawk reng ta lovin Africa-a tuipui hrulah sal zuartu hnenah a thawk a, a thawhna pa nupui Negro mi chuan a ti tha lo viau mai lehnghal a, chuti chung chuan ama private-in Latin tawngte leh eng eng emaw te a zir chawp ta a. Tichuan bawih zawrhna lawng Captain-ah a lo tang ta a, bawihho chu a lainat hle mai a, lawng chhiat leh thlipui te a han thawh zauh zauh vang leh Pathian lehkha thu te a zir thin a avang chuan chutia mihring hralh leh tawlh thin chu a Kristian lo hle tih a lo hre chiang ta a. Tichuan kum 40 mi a nih chuan Chanchin Tha puandarh hna thawh a tum ta zawk a, a nupui Mary nen khan Buckinghamshire bial Olney khuaah rawngbawlin kum 1764 khan an lo khawsa ta a ni. Chuta an awmlai chuan kum thum chinah William Cowper-a an tih mi lungngai thin tak mai pawh hian a rawn chen chilh ve ta a ni.

Chumi khuaah chuan John Newton-a hian thu a hril thin a, hlate a phuah a, mi lungngai Cowper-a chu a kaihruai a, tah chuan kum 1780 khan London lam a pansan ta a, chu khawpuiah chuan mi ngaihsan takin rawng a bawl ta a ni.

Mi vawihnih piang hi an awm ngai a nih chuan John Newton-a hi a ni ang, a rinna te chu a nghet ta a - Lalpa Zion khawpuiah chuan,

Khawngaiha min teltir chuan,

Khawvelin min hmusit mah se,

I hming chauh ka chhuang ang e,

a ti thei ta a ni. Amah hi Kristian tluang mawl tha tak mai a ni a, a hun lai hian a lar vak lo. Kum 27 chhung chu Newton-a hi London khuain an bengkhawn lo a ni. Amaherawhchu 1893 khan Newton-a leh a nupui chu an rawngbawl hmasakna Olney khuaah khan an phum tha hnuhnawh leh a, tah chuan an chawl dun ta a ni an ti. He hla hi Rev. Liangkhaia’n mizo tawngin a letling ani.


Editorial :

PRESBYTERIAN KOHHRAN

    Presbyterian tih hi Greek tawnga ‘Presbuteros’ tih atanga lak ani a. A awmzia chu Upa tihna a ni. Heta Upa tih hian kohhran Upa te chauh a kawk lova, Pastor-te, Rawngbawltu (deacon)-te pawh a huap a ni. Chutichuan Presbyterian Kohhran tih awmzia chu Upa te rorelna kohhran tihna ani. A awmzia kan hman dan takah erawh chuan ‘mipui aiawha thlan palaite leh Upa te rorelna’ tihna a ni. Presbyterian kohhran hi tute emaw phuah leh din mai ni lovin tirhkohten Lal Isua thu anga Kohhran an din ruala lo piang chhuak ve nghal kha a ni.

Presbyterian kohhran hi a lo pian chhuah dan te leh kan in awp dan(Administration) that em avangin Pathian zarah lian tham taka phel leh nghing a awm ngai lo a ni. Rorel leh Committee thuchhuak mila kal kan ni a. Kan rorel leh Committee thu chu Pathian thu ah kan pawm hmiah mai thin. Jerusalem Inkhawmpui ah phei kha chuan ‘Thlarau thianghlim leh keinin’ ti ngatin thu an titlu a nih kha.

Chuvangin, he Pathian kohhran kal zel dan tur pawh hi mimal kuta awm a ni lova, rorel/Committee thuchhuak mila kal zel tur a ni a, hei vang tak hian kan rorel/Committee-a tel ten thinlung leh tih takzeta Pathian hnena in kawltir chunga thu kan ngaihtuah thin a pawimawh awm e. Kan upa thenkhat ten Committee hi ‘a thlarau lai tak a ni e’ ti-a an lo sawi thin hi i hre thar fo ang u.


Branch Huang :

WORKCAMP

Dt.11.04.11 (Thawhtan) zan khan ITI Vengchhak Branch leh Prescom, Synod Bookroom nena tangkawpin ‘Literature Night’ chu Kohhran Hall-ah hlawhtling taka hman a ni. Member-te leh Kohhran miten kan hlutin, lehkhabu

 

BETHEL

SUNRISE SERVICES :

A hun : Dt. 24.4.11 (Sun) 6:30 AM

A hmun : Biak In chung zawl

Hruaitu : Pu F Lalrinawma, A.L

Tantu : Nl. Lalbuatsaihi

Thusawitu : Upa V Lalzawmliana

Kohhran Zaipawl

Solo : Nl. C Lalhmingmawii

‘Thingpui leh Artui (Easter Egg) sem a ni ang’

Kohhran mipui zawng zawngte pawh tel turin kan insawm a ni e.

Finance Report :

Hmuh zawng zawng :

Hmanral tawh :

Kuta la awm :

` 1,14,529` 70,746` 43,783: Ni 21.4.11 (Ningani) VENPUI ZAN zaikhawm ban hian Evangelism Sub-Committee bul tumin, Branch pum huapa Bethel, World Bank Road-ah neih tum a ni a. Member a tam thei ang ber kal turin kan insawm a ni.

` 21,652 /- man lai an hralh thei a. A lawmawm hle. : I.T.I Veng Pastor Bial KTP Workcamp chu ni 26/04 - 02/05 chhung hian Saihapui ‘K’ ah neih a ni dawn a. He Workcamp-a kal tumte tan ni 18/04/11 (Thawhtan) zan inkhawm ban thlengin Branch Secretary, Pu R Lalduhawma hnenah hming pekluh theih a ni a. SMTC

10.04.2011

Thuchah :

MI DANGTE TANA NUN

: C. Lalngaihawma

(Luka 19:30-37)

    Ringtu nun hi zin mite chuan chhiarkawp nun a ni an lo ti thin a. Eng nge ni chhiarkawp nun chu tiin kan inzawt a ni mai thei e. Formula dik taka belh leh paih, sem leh puntir te leh a dangte hi a ni kan ti thei ang. Kohhran mite, ringtute chuan kawng hrang hrangah lak belh kan ngaihte lak belh a, kan nuna paih chhuah ngaite paih a, mi dangte tana sem chhuah tur kan neih vete sem chhuak a, kan nuna puntir ngaite, formula dik tak, Krista hmang chung zela puntir zelte hi kan tihdan tur chu niin a lang.

Luka 10:37-a Lal Isua leh dan hretu inbiakna thu atanga he thu hi lo chhuak a ni a. He thu atang hian, ‘Mi dangte tana nun’ tih hi i lo zir teh ang.

He suamhmang tawktu an suamna hmun hi Jerusalem leh Jeriko inkar a ni a. He khua hi Km 30-a inhlat a niin, he kawng hi kawng bumboh leh ralti. "Thisen Kawng" tih a ni thin a. Suamhmangte tan pawh chet lakna remchang tak niin, a kal thinte pawn chhun pelh hram an tum thin. He suamhmang tawk thi lek leka an kalsan, Levia chi te leh Puithiamte pawn an kalsan, Samari rama miin a bawisawm a, khualbuka a hruai, enkawl a ih chungchanga Lal Isuan, " Nangpawh chu ang bawk chuan tanpui ngaite chu kalsan mai lova tanpuiiin, va ti ve rawh," a tih hian mi dangte tana nun pekna chung chang a sawina a ni.

Mi thenkhat chuan Lalpa rawngbawl te, ringtu nioh te hi nun chhung rilah Krista dah lova, nun kaihruaituah pawh Krista hmang si lova kan kal peng ta ni te poawhin a lang. Krista khenbeh nunpuitu ringtu leh rawngbawktu chuan an nun lai puiah an nun hruaitu atan Krista an dah thin a. Mi dangte tan an nun leh an hun te an hmang zawk thin. Chutaianga mi dangt tana nunga rawngbawl tur chuan eng nge pawimawh ta ang le? Kawng thum lekin mi dangte tana kan nun ve theihnana pawimawh chu lo zir ila.

1) KRAWS HMUHCHIAN A NGAI : Mi dangte tana nunga inpe tur chuan Kraws hmuhchian a ngai a. Ral thlir mai lo leh Kraws chu en kan lo a, khenbeh LalIsua ngei chu hmuhchian a ngai a. Kraws-a Lal Isua hmu lo chuan mi dangte tana inpek an tana tawrhte, insen te a har thin. Tunlaiah helam hawi thu tha kan ngaithla tam hle a. Ngaihthlak rikngwt a tawk ta lo. Kraws hmu chianga a tak ram a ngai ta. Kan tihtheih tawkta chu a inang hauh lo ang a. Mahse Kraws hmuchiangte nun a tang chuan mi dangte hriatthiamna te puih leh inpek a ngaihna leh dawh an ngaih hunah te an tan an inhmang a, an lo insengso thin a lo ni. Chutiang chuan Kraws hmuchiangtu leh Kraws-a Lal Isua hmu chiangtu chuan mi dangte hriatthiamna neiin an tan an lo nung thin a nih chu.

2) THIL THLIR DAN DIK A NGAI : Mi dangte tana nung tur chuan kawng hrang hrangin kan thil thlir dante a dik a ngai kan ti thei ang. Kan thil thlir danah kan en-a te leh keimahni ni lovin Krista nun atanga kan thlir a ngai. Tirhkohte 7:56-60 kan en chuan Stephana chu lunga an den mek lai pawhin a dengtute lam a en lova. A tana nun petu Krista lam a en a, van lam a hawi a. An denna turte leh dengtute lam en kanin Kraws-a Lal Isua lam enin, Van inhawng a, Pathian dinglama Pathian fapa (Isua) ngei chu a han hmu a. Chu chauh chu a la ni lo, a dengtute a la dilsak fo tih kan hre thei awm e.

Keini a fa duhtak, Kohhran mite hian kan chunga selna leh zilhnate a lo thlenin, engtin nge chung mi te chu kan thlir ve thin le? Krita chuan mi dangte nun a hriatthiam a, a thlir thiam theihnan lei mihringah lo piangin, chu a hring taksa atang chuan mi dangte thlir dan a lo thiam ta ang khan. Keini pawh hi Krista kaltlangin mi dangte thlir thiam a, kan thlir dante a lo dik theihnan chua kan nunte kan putir fo a ngai ang. Kan puntir chuan mi dangte kan lo hrethiam tawh ang. Chu chu a ni nun tam an lo tih thin chu. Nun tam nei lote chuan kan thil thlir dan a dik mawh a, a ngil thei lo a, hriatthiamna kan tlachham thin. Chuvang chuan midangte tana nung tur chuan kan thlir dan a dik a ngai ta a nih chu.

3) NUN PHEL TET/SAWM A NGAI : mi dangte tana nung tur chuan kan inphel sin a, kan inphel sawm a ngai a ni. Entirnan, thingtum chu a len zawh poh leh a hnawk a, a dip a na ting mai a ni. Chu thing tum chu phel sin a nih chuan thil tangkai leh hmanrua tangkai tak takah a chhuak thei thin.

Ringtu nun chu a tulzia ang zela insem sawm a, kan inphel sin a ngai thin. Kan in paih tet phal loh a, kan inphel sin phal loh chuan mi dangte tan kan tangkai thei lo mai ni lovin, mi hnawksak kan ni thei hial a ni. Mihring nun, mahni hmasial thin, duham em emte hi Kros thiltihtheihnaa tihhlum leh chimral a nih hun hunah kan nun chu phel sina awmin, tihtet leh paih ngaite paih thenin a lo awm ang a. Mi dangte tan kan lo nung ve thei tawh dawn a lo ni.

Chutianga mi dangte tana nun pek chuan eng nge a hlawkna kan ti mai thei e? Mi dangte tana nun petu chuan an hloh chu an tan hlawkna a lo ni thin. Mihring thil leh thlarau lamah malsawmna an dawng let thin a. Chu chauh chu ni lovin an thih hnuah pawh hriatreng an halwh thin. Nun nei lote nun min pe a, kan tana inpe zo, Kan Lal Isua te, rinna pa Abrahama te,Estheri te, Mother Teressa te pawh mi dangte tana an nun an pekna chu tihoin a awm mai lo a, an thih hnuah pawh hriatreng an hlawh thin a ni.

Mi dangte tana nungtura inpe tur chuan Kros hmuhchian te, kan thil thlir dan dikte a ngai a. Kan nu chapo leh hnawk te phel sawm/tet a ngai a. Mi dangte hre thiam turin kan nun puntir te a ngai a nih chu. Mi dangte tana nun hajn chu mahnui tan bawk a hlawk a, thih hnu thlengin hriatreng an hlawh thin.

Tin, Lal Isua zuitute mawhphurhna a niin, kan lallukhum tichhhahtu a nih mai bakah, nun tiseitu leh malsawm dawnna a ni bawk a ni.

Chutiang taka mi dangte nun pek chu hlu leh rropuia nih si chuan amah ringtute, Kohhranhoten kan chhunzawm zel theihnan leh Lal Isua hnung kan zuina a ni tih hria a kan chhunzawm zel theihnan Lalpan malsawm rawh se, Amen


Thuziak :

    Kan thlir dan hi... Vawikhat chu thian dun pahnih hi an ram vak a. Ngaw chhunga thingkung lian tak hnuaiah chuan an chawl dun a. Chutih lai chuan thlipui leh ruah hi a rawn thawk thut mai a. Chutah le! an awmna bul lawka thing zar ro chu chhem tliakin, a pakhat zawk chu a rawn tlak thuai fua mai! Tlak fuh hlauh se zawng dam khawchhuah beiseiawm leh ngamna chi a ni lo.

A thianpa chuan, ‘ I va han vannei kher em! Tlem a tlemah i thi lo chauh a nih kha...’ a rawn ti mawlh mawlh mai a. Ani chuan, ‘Heti khawpa thlabar leh hlaua awm, vanduai teuh zawk vannei min ti a nih chuan, nang, thing zarina a tlak teuh ve miah lo phei chu kei aiin i vannei fe zawk a nih chu.’ a lo ti a. Ngauhtuah dan hi chu a inang lo thei khawp mai. Kan hringnunah hian eng chin hi nge vanneihna hi kan huam tir dawn le? Vanduaina tem lova pumpelhtute hi vannei kan ti thin. Kan chhehvela vanduaina a tang hian kan vanneihna hi kan chhut thiam em le?

Khawvelah hi chuan lungawi a har a ni!!! Mite hlawhtlinna kan hmu a, kan awtin hlawhtlin ve kan chak thin. An hlawhtlinna chu vanneihna vangah kan puhsak a. Engvanga hlawhtling nge an nih tih lam chhutpui phak loh chang a awm thin. Kan chungah pawh lo thleng ve mai thei turin beiseina rilru kan neih phah a. Suangtuahna atthlak tak chuan kan dinhmun min phet thin. Nun hahdamna pawimawh tak mai chu ‘Lungawina’ hi a ni. Kan dinhmun kan en a lungawi har kan ti a. Mi dang kan thlir a lungawi lohna belhchhahtuah kan la hmang zui a. Tunhma deuha Mizo Comic lar tak pakhat a tawngkam kha, fiamthu mah ni se ngaihtuah chian chuan a dik ang reng fu si. "Lawmte chu lawmpui ula, tapte chu tahpui rawh u’ tih hi ka zawm thei lo Tapte chu ka tahpui thei a, Lawmte chu ka lawmpui thei lo, ka it zel," a tih kha. Mahni tan hian mi dang hi kan thlir vek ringawt ang tih hi a hlauhawm

Kalsan theih loh... He khawvelah hian kan famkim lo a, tlin lohna lai leh fel hlelhna lai kan nei theuh tih hi chu kan inhre hlawm vek awm e. Mahse heti chung pawh hian mahni tawkah leh nih ang angah hian kan chapo/indahsang hlawm hle lawi si. He kan ze mak tak mai hi a tha lam leh tha lo lamah pawh kan nih ang bak min nih tirtu a ni thin. Fak hlawh kan nih phah theih laiin mi nuih zat pawh kan nih phah thei bawk. A tha lo te hi chu mi dangin hre ve kher lo se kan tih tluk hian a tha lam hi chu lo hre ve se tihna rilru hi kan pu theuh hlawm awm e.

Mihring chapona rilru zawng zawng hi kan rawngbawlnaah hian kan chhawm lut ang tih hi a hlauhawm a ni. Pathian hnen atanga malsawmna kan dawn te, kan vanneihna te hi kan ngaihtuah chiang ngai em le? A tha lam zawnga hun danglam leh thil danglam kan tawh leh kan dawnte chauh hi Pathian malsawmnaah chhiar mai a awl thin. Kan chunga a that em avang hian mi hring nunphung pangngai emaw tiin ngaiah kan neih lek lek tawh zawk ni mai te hian a lang thin. - Lalrinkima

Editorial :

Bial Inkhawmpui

Kan Biak inah hian mipui 380 bawr vel kan leng a, Bial Inkhawmpui ah hian Palai nisa leh palai thlan te belhkawm in mi 140 vel an ni a. Palai te chauh inkhawm ta se kan Biak in thutna chanve pawh an luah khat zo dawnlo tihna ani a. Palai te tan bika hun hman tur hi chu Inrinni nileng a ni mai a, a bak zawng zirtawp zan atanga a tawp zan thleng hian Kohhran mipui te kan zavaia inkhawm theih a ni a, a tam thei ang ber inkhawm tur pawhin inbuatsaih lawk a tul awm e. Inthlahrunna chi a ni lo tih pawh hre thar leh ila.

Inkhawm kan chhiat thin viau chuan a thengtu Kohhran mualphona ani tih pawh kan hriat a pawimawh. A tan zan (zirtawp zan) atang in thlarau lama kan hlimna te langchhuak tura Kohhran mipui ten tan kan lak a ngai dawn a ni. He kan Bial Inkhawmpui hi a hlawhtlinna bul chu Pathian a ni tih hre rengin kan tawngtainaah bang lova kan telh a pawimawh awm e. Tin, rorel palai te pawh dan zawhkim 20 ai awh zo ngei tura thahnemngai taka kan tel a tul awm e.

Branch Huang :

BRANCH HNATLANG

　

Literature Night Synod Bookroom nena tang kawpin Literature Night, ni 11.04.11(Thawhtan) zan a kan neih tur atan hian hmun hma siam a ngaih avangin naktuk chawhnu dar 1:00 pm hian Branch Committee Member-te Biak In ah hnatlan tur a ni. Kim takahnatlang tura beisei kan ni e. Nimin Ni 9.4.2011(Inrinni) nileng khan Falkawn Referal Hospital chhuat tifaiaa hnatlang neih a ni a. Member thawk chhuak an tha in inhlawhna siamsaktu Pu R. Lalromawia leh thawk chhuak zawng zawngte chungah Branch Committee chuan lawmthu a sawi a ni    ITI Veng Pastor Bial Inkhawnpui Vawi 2-na chu tunkar zirtawp zan atangin kan Kohhran Biak In ah neih a ni dawn ta a, inbuatsaihna lamaphak ang tawka tha in kalpui mek zel ani a, Pathian zarah khawmpui boruak nuam tak, hlawkthlak tak kan nei turah ngai ila.

Thuchah :

RAWNGBAWLNA

Asst. Leader

 

    "Amahah chuan lungrem hrang theuhte,rem taka chuktuahin, Lalpaah chuan biak in thianghlimah a chang zel thin a; nangni pawh amah ah chuan Thlarauva, pathian awmna tura remkhawm in ni." - Ephesi 2:21-22

Pathian hruainain kum 2011 kan lo hmang leh ta reng mai, kan fel vangte a he hun hi thleng tur ni ila, thleng zo tur hian ka inring em? Pathian khawngaihna, min hruaina leh malsawmna kan dawn zawng zawngte chhut let kim vek thei tawh lo pawh ni ila, kan Pathian min hruaina ah hian vuina tur reng kan nei awm love.

Kum 2010 kan hman ral taah khan kan rawngbawlna/Pathian tana kan thiltih theuhte han chhui let ila. Tin, a malsawmna kan dawn han chhut let ila, a buk chu a rit hlei hle awm e. Heti taka min hmangaihtu kan thatna tura kawng engkima min thawhsaktu tan hian kum 2011 hian engtia hun hman nge ka tum mahni theuh in zawt ila? Programme a nih avanga kal mai nge ka nih a? Amah hmangaih letna avanga kal ka nih inngaihtuah ila.

Kum a thar angin rawngbawlna peng hrang hrangah Kohhran kaltlangin chanvo chi hrang hrang siam leh mawhphurtu ruat a ni a. Chanvo zawng zawngah kan tel kim vek thei lova, kan hun leh kum leh nihna pawh in daidan chin a nei. He rawngbawlna peng hrang hranga chnvo neitu leh roreltu te hi Pathian ruat, Kohhran kaltlangin an ni a. Heng mawhphurhna hrang hranga chanvo neitute hian Pathian hriatpui leh rawn chungin pawl thatna turin rorel kan nei thin a. Hengte hmang hian malsawmna, pawlin a dawngin tun thlengin hlimna lawmna, hmasawnna a chang ve zel a, chutih rual chuan kan hawi zawng leh kan ngaimawh zawng pawl hrang hrangah chuan a in an loh chang a awm thin.

Kan pathian thu in, amahah chuan lungrem hrang theuhte, rem taka chuktuah in, Lalpaah chuan Biakin thianghlimah a chang zel thin a, tih kan hmuh ang hian peng hrang hrang a rawng kan bawl ho naah hian a khawngaih rawngbawl hna kan thawh hian, Krista rilru pu chungin siam thar leh sim tur kan neih kawng hrang hrangah a awm ngei ang.

Hmasawn tum ran chunga rawngbawl zelin kan hma a intlansiakna awm hi hmachhawn in Lalpa min hmangaihna rilru a ngaihtuah chung zelin he kumtharah hian bul kan tan a, kan nun kan thiltih te midang tana malsawmna a ni em? tih mahni in zawt chung zelin Pathian tan inhlan thar ila. Tichuan he khawngaih rawngbawl hna hrang hrang kan ko a Lalpan a Kohhran kal tlang a min pek hi thawk ila, tichuan midang tana malsawmna kan ni ngei ang. A duh zawng kan tih apiangin mal min sawm fo thin tih hre chungin, thlarauva awmna tura remkhawm kan nih theih nan Lalpan malsawm rawh se.

Thuziak :

Thalaite mamawh Isua

: Lalbuatsaihi

    Thalaite hi Pathian hman tlak kan nih a pawimawh a. Tin, nun tlo leh nghet kan neih hi a tul bawk a, chutiang mi chu Lalpa hian a zawng a ni. Kan phur chang leh tui chang chauh nilova, phur vak loh leh tui vakloh chang pawh a Lal Isua tana hmantlak kan nih a pawimawh a ni. KTP te hi kan rawngbawlna a fakawm em em rual hian hmasawn zel tur kan ni a. Mi thenkhat ten kan fellowship naah te nuih hum humna tur a awm loh chuan ho riau a ngai thin te kan awm a, KTP hi mahni intihlim tura din a nilova, thil ti atan, Pathian hman theih tur a Thalai rualte kan intuai thar nana din a ni a. Mahni intihhlim hunte pawh a awm tur a ni a, han nuih hum hum changte pawh a awm tur a ni. Amaherawh chu, mi thenkhatin KTP kan hmelhriat dan hi chu a dik chiah tawh lo niin a lang. Thalaite hi Lalpa tana dopui tura sipai a insiam kan nih zia hi hrethar leh ila.

Thuhriltu bung 12-ah khan, ‘I vanglai hian i siamtu hre reng rawh’ tih kan hmu a. Ngati nge ‘I vanglai hian’ a tih kher- kum 90 kan pelh tawhah chuan, "Lalpa, i duh duh naah min hmang rawh" ti mah ila Pathian tan hman tlak tak tak kan ni thei tawh dawnlo a ni. Chuvangin, hmantlak kan la nih lai ngei hian, kan siamtu, Pathian tan nun tum ila.

Mi thenkhatin ‘khawvel ka la chen duh’ an ti thin a, Kohhran Programme a tel ai chuan, khawvel thilahte an kal leh mai thin a ni. Hetiang mite hian khawvel hi an chen lova. Thalai piangthar, KTP Active Member, Lal Isua tana hmantheih apiangte hi khawvel chentu diktak chu an ni zawk a ni. Kan nun zawng zawng hi Pathian tan hlan ila, chu chu Bible pawh hian min phut a ni.

Mihringte hian kan mamawh hi kan zawng a ni. Ruihhlo bawi a tang mekte pawh hi an thiam lo hulhual chuang lo, dem lutuk tur pawh an ni lo a, mamawh neiin an inhria a, chu an mamawh chu thahnemngai takin an zawng a, an mamawh a awm dawn emaw an tihna hmunah khan a lo awm leh si lo a, an khawngaihthlak zawk a ni.Mi tupawh hian mamawh kan nei a, chu kan mamawh chu he khawvel thilah hian a awm lova, kan mamawh chhanna chu Lal Isua chauh hi a lo ni.

A tawp berah chuan, Thalai rualte hi Pathian leh Setana’n kan vanglai tha hi an duh a, min dil ve ve a ni. Tu hnenah nge kan pek dawn tih chu kan duhthlanna a ni. Thalaiten a kan mamawh chu Isua ni tih hre reng chung a kan duhthlanna kan siam a pawimawh a ni.Engtik hunah pawh Pathian tana rinawm a, a rawngbawl tur a kei ka awm kan tih theuh theih nan Lalpa’n a thu malsawm rawh se.


Editorial :

Crusade

　　

    Ni 4-10 April, chhung a Crusade kan neih tur hi thlirin; Kumhlui Camping boruak leh thlarau hnathawhin min la chenchilh avangin Kohhran mipuiten kan nghakhlel hlawm theuh in a rinawm. Chutihlaiin tam tak hnungtawlh leh tawh mahse nun tak chhara vuan dingtute hmel hmuh hian Kohhran tana hlimna leh lawmna tur a lo lang thin a. Chhandamna Camping a lut zawng zawng an tha hlen vek lo tih chu kan hre theuh ang a, nun tak neih phah tlemte avang erawh chuan Kohhranin malsawmna a hmu a, Kohhran a nunga, a lo chak thin a ni.

Tun kan Crusade neih tur atan pawh hian Kohhran mipuiten rilru inhawng taka kan inbuatsaih a pawimawh hle a. A boruak hlim hlawp a tal buai mai lovin, a rawng kan bawl sak atan hian theih tawp kan chhuah a pawimawh hle a ni.

Tin, naupang te te ten Pathian faka Inkhawm chakin tun crusade hi an thlir ve mek a, tuna an dinhmun hi Kohhran mipui te pawhin kan thlir thiam a pawimawhin, rinna puitlinna kawng an zawh mekah hian kawng dik kan kawhhmuh thiam a pawimawh hle a ni.

    Kan hma lawkah Good Friday leh Easter-te kan la hmang dawn a ni a. Kohhran mipui ten thinlung taka Krista thihna leh thawhlehna kan tawmpui a, Pathian hnathawh a lan theih na turin tun kan crusade neih tur pawh hi inbuatsaihna atan hmang ila. Chu chu Kohhran duhdan leh he crusade kan neih tur a buatsaih chhan pawh a ni awm e. -Rca(News Editor)

Branch Huang :

Sum dinhmun

( Jan - March, 2011)

Hmuh zawng zawng :

Hman ral tawh :

Kuta la awm :

 

BIAL BUDGET : Bial Budget atan

 

JOINT SERVICE : May thla chhung hian Zonuam Branch KTP tlawh tum a ni.

Literature Night : Synod Bookroom nen tang kawpin Literature Night chu ni 11.04.11 (Thawhtan) zan hian hman tum a ni a. He hunah hian lehkhabu an rawn kente hi 10% discount-a lei theih a ni dawn a ni.

 



` 20.000.00 pek tum a ni a. ` 9,000.00 kan la bak a ni.

:` 1,13,253.00` 58,845.00` 54,408.00  

: F. Lalrinawma

Thuchah :

PATHIAN HNENA LAWMTHU SAWI

Pastor K. Lalpiangthara

Thil dang zawng aia hriat leh dawnsawn nuam zawk fo thin chu lawmthu sawina tawngkam hi a ni. Lawmthu sawi chungchang hi kan Bible-ah hian vawi 80 zet kan hmu a. Kan Lal Isua pawh khan lawmthu sawi hi a ngai pawimawh hle. Jerusalem-a a kal dawnin phar sawm a tidam a, pakhat chauhin lawmthu a sawi a. "Pakuate kha khawiah nge?" tiin a zawt hial a nih kha. (Luka 17:11-18) Pathian hnena lawmthu sawi chungchangah hian sawi tur tam tak a awm thei ang. Sawi kim sen ni lo mah se hetiang hian tawi te tein han tarlang thliah thliah ila:

1. Lawm nachang hriat a pawimawh : Tirhkoh Paula’n Kolossa khua mite hnenah, "Lawm nachang hre bawk rawh u,"(3:15) a tih ang hian Pathian chungah leh kan mihring puite chunga lawm nachang hriat hi kan tihtur pawimawh tak niin a lang. Mizote hian kan chunga that chhuahtute hnena lawmthu han sawi leh fak phute han fakte hi harsa kan ti fo thin. Hetiang lam hi kan insiam thatna tur zinga mi niin a hriat. Lawm nachang hriate hi chan tawka lungawi ching mi an ni fo thin. Pathian pawh hian ama chunga lwm nachang hriate chu malsawmna tam takin a vur thin niin a lang. Kan tih theih tlemzia leh Pathian min tihsak tamzia leh ropuiziate hi ngaihtuah fo ila, lawm nachang hre tura min duh ang ngei hian lawm nachang i hria ang u.

2. Lawmthu kan sawina turte : Thessalonika Kohhrante hnenah Paula chuan, "Engkimah lawmthu sawi fo rawh u, chu chu nangmamhni lam thuah Krista Isuaah chuan Pathian duhzawng a ni si a," a ti a. (I Thes. 5:16) Keinin lawmthu sawina awm leh awm lote kan thliar laiin Tirhkoh Paula chuan ‘Engkimah’ a ti tawp mai a ni. Pathian hnena lawmthu sawina tur hi a tam em avangin sawi sen chi a ni lovang. Kan tawngtaina thu hi ngun taka ngaihthlak chuan zaa sawm (10%) vel chauh hi Pathian hnena lawmthu sawina a ni a, a bak hi chu dilna lam deuh hlir niin a lang. Min hmangaihna leh minenkawlna, a malsawmna kan awnte hi ngaihtuah chiang ila chuan hei ai hi chuan lawmthu hi sawi tam zawk awm tak kan ni.

3. Lawmzia entirnana thilpek : Sam 116-na phuahtu rilru hi kan put ve a pawimawh hle mai. "Ka chunga a thiltih that zawng zawng avang hian Lalpa chu eng nge ka pek ve thung ang? ..." a ti chul mai a ni. Isaac Watts pawh han mi sualte tana ropuina lal meuh Kraws-a mualpho taka khenbe an hmuh meuh chuan khawvel thila hlawkna leh a lo chapo thinna zawng zawngte pawh engmah loah a ngai ta a. Hei mai pawh duhtawk lo hian, "Engkim mai hi ka ta ni se. Pathian pekah a tawk lova..." a ti hial a ni. Pathian hmangaihna leh kan tana a inpekna ropuizia hre chiang apiang an lawm a, Pathian tan an inphal thin. Pathiana lawm inti, thilpek lama engmah ni mang si lo kan nih chuan ringtu ngaihtuahawm tak kan ni ang.

4. Lawm zel nun neih : Zawlnei Habakuka chuan, "Theipui thing par vul lovin, grep hrui rah dawn hek suh se’ng,..... ka lawm zel

ang Lalpa ah chuan, ka chhandamna Pathianah chuan ka lawm cheu dawn," a ti a (3:17-18). Tirhkoh Paula pawhin Rom khua mite hnena lehkhathawnah chuan, "Tin, chuti chauh chu ni lovin, kakn hrehawmnaah pawh lawmin i awm ang u, hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam tih kan hre si a," tiin min hrilh a ni (5:3-4). Kan duh leh beiseia hlawhtlinna kan hmuh avang chauhva lawm tur kan ni lova, kan beisei loh zawng leh kan duh loh zawngah pawh lawm zel thei nun kan neih a pawimawh. Mihring kan nih chhungin kan duh danin thil a thleng vek dawn lo. Kan nunna leh taksaah ngei pawh hian thu kan nei lo a ni tih kan inhre tlat tur a ni. Eng pawh lo thleng se ‘lawm zel nun’ nei turin i inbuatsaih ang u.

5. Lalpaa kan lawmna chu kan chakna a ni: Zawlnei Nehemia chuan, "Lalpaa lawmna chu in chakna a ni si a," a ti a. (8:10) Kum 1990 kum bul lam khan ka fanu thla nga mi mit a na a. Damdawi chi hrang hrang kan hnawih bakah min tihdam sak turin Pathian hnenah a nu nen kan tawngtai thin. A dam hleihtheih loh avangin kan tawngtai dan her danglam a ngaiin kan hre ta a. Kan fanu mit nat vang chuan Pathian hnenah lawmthu kan sawi ta zawk a. Kan buaipui zui ngai miah lovin Lalpan min tihdamsak ta a ni. Lalpa hnena lawmthu sawi hi Lalpa kut chettirna awlsam tak niin ka hria. Min tidam tur leh mahni nawmsakna tur lam hawizawng ringawt hi chuan Pathian kut hi chettir a lo har dawn khawp mai. Jakoba chuan, "In dil a, in dil dik loh avangin in hmu lo, in nawmsak nan hman in tum si a," a ti a (4:3) Engkima lawmthu hril zel tur leh kan duhnate ama hnena thlen zel turin min duh a ni (Phil 4:6-7). Pathiana lawmna neih hi Lalpa ngaiha rilru dika putu nihna a ni a. A ;lam rilru diktak putute chunga a chakzia tilang tura a chakzia tilang tura khawvel zawng zawnga a mit len ruai thintu Pathian chuan, amaha lawm zel nun neite hnenah a chakzia a lantir zel dawn a ni. (II Chro. 16:9)

"In thiltih apiang chu thusawiah emaw thil tihah emaw ama zarah Pa Pathian hnena lawmthu sawi hril chungin Lal Isua hmingin ti vek rawh u" (Kol. 3:17)

Thuziak :

Hmeichhe nemngheh(Ordained)

: Lalremliana

Kohhran Hmeichhe Inkhawmpui Lian, Dt 4-6 March-a Kawnnpuia neih zawh tak ah khan, Inkhawmpui Rorel chuan, "Hmeichhe Pathian thu zirte hi Pastor/Minister atan a awm leh phute chu nemngheh(Ordained) theih ni rawh se"{Resolution No 10(7)} tih Ramhlun Bial atanga lut chu kal zel turin a Pass a. He thu hi Synod Executive Committee(SEC) in tha a tih chuan Synod Inkhawmpui ngaihtuah a ni dawn a ni. Kum dang ah pawh he thu hi vawi khat chu Pass tawh thin niin ngaihtuah a ni tawh a, Synod Executive Committee (SEC)-in ‘Kan kalphung pangngai hi a la tha rih e’ a tih avangin Synod Agenda atan chhawp chhuah a la ni ngai lo a.

Inkhawmpui Lian Chairman-in ‘Kawngkhar chu kik thiang a lawm, i han kik leh phawt teh ang u’ ti a he Agenda a tlipna tawngkam hi a mawi hle mai. Kumin hian he thu hi eng ang takin kal zel ang maw? SEC a kaltlang zo leh dawnlo nge Synod Inkhawmpui Agenda atan a chhawpchhuak ve tawh dawn? Synod Agenda atana chhawpchhuah pawh nise Synod Inkhawmpui rorelna ah palai ten engtin nge an ngaih ang? He thu lut hi hlawhtling tur chuan paltlang tur a la ngah hle mai. A harsa zawnga thlir phei chuan SEC ah hian mipa hlang deuh thaw an thu a, Synod Inkhawmpui ah pawh hian Department aiawh atang bak chuan hmeichhia palai an awm meuh lo bawk a,mipa rual rorel hian hmeichhe nemngheh(Ordained) hi eng ang takin ngai ang maw?

Tun hnai ah Baptist Church Of Mizoram(BCM) pawh in AICS Principal chu Ordained turin Aizawl West Area ABC(Area Baptist Council- keinin Prebytery khawmpui kan tih ang hi) leh Lunglei South Area ABC khawmpui chuan a rawt a, he thu pawh hi Lunglei Rahsi venga neih zawh tak BCM Assembly(Keini kohhran in Synod Inkhawmpui kan tih ang hi) Agenda a thlen hma in Secret balot hmanga Assembly Executive Committee lamin an buk hmasak hnu ah 2/3 vote a hmuh tlin loh avangin chhawpchhuah rih loh an la ti tlu ve bawk a. Mahse, BCM Planing Commission(Kum 10 chhung a BCM kalphung tur duangtu) chuan ‘Hmeichhe Theologian, a awm leh phu te chu Pastor atan Ordained theih ni tawh rawh se’ tiin a rel a, he thu hi Assembly chuan a pawmpui nghe nghe a, reilo te ah hmeichhe Pastor an nei mai turah han ngai ila.

Tunah hian hmeichhe Pathian thu zir zo(B.Th, B.D, M.Th) hi 120 vel lai an lo awm ta a, kan Kohhran hnuai ah hian tunah hian Pathian thu zir zo tawh hi thawktu atan ATC ah mi 4, Synod Ofice ah mi 4, leh Missionary ah mi 2, an vaiin mi 10 vel chu tangkai tak in chhawr zui an ni a. Hmeichhia a awm leh phu te hi nemngheh(Ordained) lo ni ve ta se bial an vawng ve ngei ang tih lam pawh a la ni lutuk chuang lo a, an tih tur lam chu fel taka rel a ni mai dawn a.

He thu hi rawt a ni ta zeuh zeuh mai hi eng angin Kohhran hian a ngaih tih chu a la lang mai dawn a. Hmeichhia te hian an an hmeichhiat pui te ngei Pastor nih tir ve hrim hrim an duhna vanga he rawtna hi piang a nih a rinawm loh a. Mizo hmeichhia te hi Minister/Pastor ah pawh tling leh tlak an lo awm ve ta ti ang zawng pawhin a ngaih theih tawh awm e. Kan pi pu ten ‘Hmeichhe finin tuikhur ral a kai lo’ an lo tih thinna khawvel atang kha chuan tun kan dinhmun hi a inthlau in kan hmeichhiate hmasawnna duhawm tak lang chhuak hi a lawmawm tak zet a ni. He thu hi tun dinhmunah la kal tlang chiah lo mahse engtik ah emaw chuan hetiang zela kan hmneichhia ten hma an sawn zel a nih chuan mipa te hian Pastor ‘Puan bih’ tur kan la leisak ngei a rinawm tlat a ni.

Kohhran huang pawn, hmeichhia leh mipa tihtur thliar lohna ah phei chuan hmeichhia te hian sang tak tak an chelh nual tawh a, a hranpaa hmeichhe dinhmun hi chawisan ngai chuang miahlo in a tha leh tling te chu tumah dal phak lo in dinhmun sang tak, mipa tam tak te pawh in an thlen phak loh tur dinhmun an luah mek a ni, ‘Kan pi’ tih tawngkam hi Sawrkar Office tam tak ah chuan a tlanglawn viau tawh nghe nghe.

Kan thu tawpna atan chuan eng ang dinhmun pawh kan hmeichhia te hian lo chelh chho pawh nise, Kohhran mipui ten ka hun tawn ang zela kan rilru kan inbuatsaih thiam a pawimawh ang. A hunin min la rawn nang dawn tho avangin an tlinga an tha a nih chuan hmeichhia pawh kan en hniam loh a tul ang. Heti tak maia kan hmeichhia ten hma an lo sawn a dinhmun pawimawh tak tak kan Sorkar Office thleng pawha hmun tam zawk luahtu an lo nihna chhan hi kan Kristianna vang a ni chiang a, a lawmawm tak zet mai. Chutih rualin mipa te pawh heti tak maia hmeichhia dinhmun sanga an din theihna chhan hi engvang nge tih ngaihtuah thara, thawhrimna leh tumruhna kawngah pawh mipa te hian hmeichhia tluklohna kan nei ta nual mai, mipa ten tan lak ngaihna laiah tan lak thar atul hle awm e. ‘Mipa lu chu hmeichhia a ni, hmeichhe lu chu Krista a ni kan tih hun a thleng palh ang e’.

Editorial :

BUL TAN THAT...

"A bul tan that chu a chanve zo tluk a ni," He thu hi kan hre theuh awm e. Zirlai kan nih lai chuan Sikul luh tirha infuihna thu lar tak a ni a. Beiseina nei thei tur leh hlawhtlinna nei thei tura in kawhhmuhna a ni. Taima tak leh theihtawp chhuaha bul tan hian phurna leh tha-thona nen kan hmabak kan thlir theih phah thin.

Zirna kawngah leh thil dang tam takah chuan a bul tan that hian a hnu leh zel atan nghawng tha tak nei thei zel mah se, kan rinna kawng atan hi chuan bul tan that ringawt hi a tawk lem lo. Nitina bul kan tan hi keimahni tan zel a lo ni zawk niin a lang. Hma lam hun kan hre lo hi thenkhat tan chuan chhuanlam tling tak a ni. Tlu thei, tipalh thei kan ni theuh a. Famkim bik hi tu nge awm ang le?

Noida-a Company pakhat Office bangah chuan he thu hi a intar a. "Tlakchhiat loh hi thil tih ropui tak a tling lo. Thil tih ropui tak zawk chu tluk hnu-a dinchhuah leh zawk hi a ni." He thu hi kan hringnun atana thil pawimawh tak a ni a. Kan thlarau nun atan pawh hian a tangkai hle ang.

Kan tlu a nih pawhin bul tan tha leh tura kan beih leh ngam hi a pawimawh. Kan tlukna hmunah chuan tang reng lo mah ila, kan awmna ngai tal pawha let leh ngam lo a kan awm a nih chuan hmelmapa kan la tilungawi zel tho mai. Inchhirna leh ngaihdamna hi ngai min awh tir leh thei tur khawpa thil ropui an ni si a. "Aw ka hmelma, min diriam mai suh; ka tluk hun chuan ka tho leh ang;"

Branch Huang :

Ni 20.3.2011 (Pathianni) zan inkhawm ban khan March thla Faith Promise hawna ni a, Rs.15,700/- a lut a ni. February thla a Faith Promise chu Rs.785/- in khum a ni.

Nimin nileng khan Armed Veng ah PHE Pipe phumna tur laia inhlawh ani a, Member thawkchhuak kan tha in kan hlim tlang hle a. Inhlawhna min siamsaktu Tv Lalromawia chungah Branch Committee chuan lawmthu a sawi a ni.

Dt 21/2/2011(Thawhtan) zan khan Branch Calender-a ruahmanna awm ang in Evangelism Night chu hman ani a, Member inkhawm kan tha in hlawkthlak kan ti hle. 

Thuchah :

CHANCHINTHA HI I HRIL ZEL ANG U

: H. Lalfakawma

(Marka 16 :15-18 ; II Tim. 1:11)

Chanchin tha chu eng nge ni? Kan Bible-ah chuan hetiang hian kawng hrang hrangin a sawi a :- Pathian ram chanchin tha, chhandamna chanchintha, khawngaihna, remna, sual ngaihdamna, nunna chanchin tha tih leh a dang dangtein a sawi a ni.

Chanchintha chu engvanga hril tur nge kan nih? Kan Bible thu tarlan atang khan a chiang mai awm e. Kan Lal Isua thupek a nih avangin chanchintha hi kan hril mai tur a ni.

Chanchintha chu engtia hril tur nge? Chanchintha hril dan hi chi hrang hrang a awm. Kohran leh mi malin kan hril duh dan leh kan kalpui dan pawh a inang lo a ni. Kan remchan dan ang angin chanchintha hi kan hril thei a ni. Mahni ngei kal chhuaha hril te, thusawi, chetzia, zirtir, tihdamna, thilpek rawngbawlnate hi chanchin tha hrilna langsar zualte chu a ni.

He awmhmun rawngbawlna, chanchintha hrilna hi tlem han umzui ila. Heng thilpek rawngbawlna te, tawngtaipuina te, nun leh cetzia hmanga rawngbawlna te hi awmhmun atanga chanchintha kan hrilna langsar zualte chu a ni.

Kan Kohhran mite, rawngbawltute hi he leia Krista aia Palai, puithiam kan ni a. Kan nun kan chetzia te hian Krista aia palai kan nih a tarlang em? tih han inzawt ila, keimahniah a chiang ber ang.

Engti mi pawh ka ni thei e, nitin kut hnathawka eizawng ka ni mai thei e, office lam hnathawk mi ka ni emaw, zirlai emaw pawh ka ni thei e. Ka hnathawhnaah ka thawhpuiten eng hmuhin nge min hmuh?

Ka hnathawhin belhchian a dawl em? Ka office hnate hi rawngbawlna hian a pawtbuai fo em? Ka hna avang hian ka thawhpuiten harsatna an tawk fo em? Keimahah chanchintha an hmu em? Ka zirlaiah mi dangte fuihna khawp emaw mi dangte entawn tlak rah tha ka chhuah ngai em? Kan nu leh pa, kan chhungte hian, zirlai ka nihnaah hian chanchintha, result tha, nungchang tha an hmu ngai em? Kan tihtur theuh kan tihna ah hian miten eng nge an hmuh ang le?

Kan nu leh pa, pi leh pu, chhungten a engemaw pawipang a awm changa an tirh kal zawh loh, mu lai kaihthawh ngam loh thalai/rawngbawltu ka ni em? In chhung khura ka awmdanah hian ka chenpuite hian ka bulah thu chhia/tha an sawi ngamin, ka bulah an tlangnel em? Thiante zinga inhawng tak, in chhung khura biak nuam lem lo ka nih chuan ka in chhung khurah chanchintha ka thlen ngai lovang.

Matthaia 5:14-16 ah chuan, "Khawvel eng in ni e, tlangchhipa awm chu thuhruk theih a ni lo. Miin khawnvar halin hrai hnuaiah an dah ngai lo, a dahnaah an dah zawk thin. Chutiang bawkin in eng chu mi mit hmuhin eng rawh se. Chuti chuan in Pa vana mi chu in chawimawi thei ang," tih kan hmu a. Lal Isua chanchintha hrilin khawvel, kan ram leh hnam ti-tha a, ti-mawia tieng tur kan ni. Tlang chhipa khaw awm chu a langsar a, hmuh a awl thin. Keimaha chanchintha awm hi ka nunah hian a langsar ve em? He chanchintha hian hliahtu a nei ang tih a hlauhawm hle a ni. Khawnvar chu an khuh bo daih ngai lo. A eng hmang tangkai turin a dahnaah an dah zawk thin. Ka nunah hian chanchintha khawnvar chu a eng chhuak ve em? Mi dang tan tangkaiin he nun chanchintha hi a eng chhuak ve tur a ni.

Mathaia 5:13-ah chuan lei chi kan nih thu leh lei chi da tawh tangkai loh thu kan hmu a. Khawvelin a mamawh chanchintha thlentu lei chi kan ni a. A chhia siamtha a tithatu tur, mite Lal Isua hnena hruaithlengtu tur kan nih lai hian a tidartu, tihlatu kan ni ang tih a hlauhawm a ni.Chi chu a burah chauh lo pawh a al a, chi a ni reng angin lawmna thar, hlimna thar, siamtharna ka chang a ni mai thei. Mahse, khawvela awm kan nih miau avangin engpawh hmachhawn thei ka ni. Ka lawm reng thei lovang, ka hlim reng thei lovang; zuai rawih rawih chang pawh a awm ang. Mahse ka rinna erawh engtiklai pawhin a nghet tur a ni. Biak In chhunga ringtu tha chu Biak In pawnah pawh ringtu tha a ni reng tur a ni.

Chanchintha hril tur hian chawhpawlh nun a rem lo. Kan lum leh kan lum ang a, kan vawh leh kan vawt law law tur a ni. Hmelmapa chet dan kan en a tul lo. Hruaitu ropui Mosia leh Josua khan an hmelma lam an en lo. Lalpan tihtur a tih chu an ti mai a ni. Pathian duhzawng nia kan hriat avanga mi dang tibuai khawp leh mi dang leng lo khawpa nunpui erawh a hlauhawm thin. Peih lo chung chung pawha kan tih hram hram hian chanchintha kan hril tel a ni. Duh chuan eng kawngah pawh hian chhuanlam a awm thei vek.

Jakoba lehkhathawn-a kan hmuh angin, he dam chhung rei lo teah hian kan tihtur chanchintha hi kan hril zel tur a ni. Rawng kan bawl tawhna te han chhui kir ila, hrehawm leh harsatna eng nge ka tawh ve tawh le? Harsatna aia langsar zawk chu malsawmna leh chawimawina, hmingthatna a ni zawk ngei ang. Theihtawpa chanchintha kan hril a, rawng ka bawl hian ka tan leh Pathian tan a lo ni zawk a ni.

Mathaia 18:7-ah chuan, tlukna leh tlukna siamtu chungpik turzia te, a tihdan tur te kan hmu a ni.He ka chanchintha hrilna tihmelhemtu keimahah a awm a nih chuan ka paih bo a ngai a ni. Ka tawngkam te hian mi dangte a lo hliam palh thei. Thahnem ngaih lutuk avang hian mi dang pawi ka sawiin ka phut lutuk em? tihte hi kan ngaihtuah fo a ngai a ni. Keimahah siamthat ngai, paih tur a awm chuan ka insiamthat a tul a ni.

Lal Isuan Baptistu Johana hnenah, "Heng felna zawng zawng hlenchhuah hi ka tan a mawi a ni," a ti a. Ani ang hi chuan kan hlen ve thei kher lovang. Mahse theihtawp chhuahin rawng kan bawl tur a ni. Pathian thu hi kan zawm tlat chuan Kohhran, KTP, YMA, ram, khua leh tui, tha tak kan ni ngei ang le. Pathian mithmuha mawi hi he lei danah pawh a mawi tlat. Heng felna zawng zawng kan hlen hian chanchintha kan hril a ni.

Lal Isua Jerusalem-a lal anga a luh naah khan mipuiten amah lawmin an au rual a. Lehkha ziaktute leh Pharisai ten mipui ngawihtir turin an ti a. Mahse Lal Isua chuan, "Heng ho hi an au loh chuan lung te tal an au tur a ni," a ti a. Kan tihtur ti lova khawvar kan nghah chuan hrem kan tuar ngei ang.

Kan awmdante hi Krista chanchintha nen in mawi phawt se la chanchintha kan hril zel ang. "Kan tihtur chanchintha puandarh; A thlawna pe chhuak turin, Khawvel ram zawng zawng hi, Lalpa ram a nih hma chuan, Chanchitha hi i hril zel ang u."

Thuziak :

KTP Rorel Inkhawm Reports & Minute

A hmun: Bethlehem Veng Kohhran Biak in

A hun:Dt 11-13, March, 2011

REPORTS(2010 March-2011 February):

(‘+’ hi kum 2009 khumna a ni a, ‘-’ hi kum 2009 phak lohna a ni)

1. INCHHIARNA:

` 1,30,33,905/-(+ ` 25,07,995/-)` 8,83,01,423/-(+ `1,58,74,322/-): ` 2,08,45,416/-(+` 25,57,505/-)` 32,11,376/-` 7,45,064/-` 24,66,312/-

ROREL:

1. Palai kal zat : 748

2. Kum 2013 Rorel inkhawm chungchang:

A hmun : Chanmari Kohhran Biak in, Lunglei

Thlengtu tur : Chanmari Bial leh Venglai Bial, Lunglei.

3. Thurel Pass-te(General):

I. KTP Member Biak In thleng phak lote pualin ram pum huapa chawngheia tawngtai ni rawh se.

II. Ram pum huapin Career Awareness Kristianna nena inmilin neih ni rawh se.

III. Krismas leh kumthar vuakvet thianghlim zawka hmang tura inzirtirna kalpui leh ni rawh se.

IV Hmeichhe humsual daite pualin Central KTP-in Gospel Camping/chhanchhuahna Camping buatsaih leh rawh se.

V. Biak In hawnga innei pun zel theih nan CKTP in hma la rawh se.

VI. Central KTP-in HIV/AIDS chungchang inzirtirna turin hma la rawh se.

VII. Central KTP Committee-in Biak KTP hruaitute training neih pui rawh se.

VIII. Kum 2012-13 kumpuan thupui atan ‘LAL ISUA NEN’ tih pawm a ni.

IX. KUM 2011-’12 BUDGET

` 10,30,000/- pawm a ni.( Kan Bial Budget atan

* KTP Rorel inkhawm hi tum li(4) neih tawh a ni a, hetiang hi neih tawh dan leh kan Branch atang palai tawh te an ni:

Kum 2005(Khatla)- Pu H. Laltlanthanga

kum 2007( Armed Veng)- Pu F. Lalrinawma

Kum 2009(Chawlhmun)- Tv Lalremliana

Kum 2011(Bethlehem)- Pu R. Lalduhawma

Editorial :

Rorel inkhawm

 

    KTP rorel inkhawm chu Dt 11-13, March khan hman zawh a ni ta . He rorel inkhawm hi Bethlehem Veng Presbyterian Kohhran Biak In-ah neih a ni a. Thlengtu(Bethlehem Branch KTP) te inbuatsaihna a ropuiin, hmunhma an sawngbawl dan pawh a nuam hle a, sum pawh Rs 3,22,122/- sen ral a ni. Thlengtu tanpuina atan hian Rs 20,000/- tling lo deuh hmuh a ni a, a bak zawng hi chu thlengtu Kohhran leh KTP te sen ral a ni.

    Kan hriat theuh angin KTP te hian a hautak thin em avang in kum 2004 General Conference kan hman hnu atang kha chuan kum tinin Generel Conference hi neih a ni tawh ngai lova, kum khat danah neih thin a ni tawh a. General Conference neih loh kum hian Rorel inkhawm neih thin a ni ta a. Tin, nikum atang khan Synod ruahmanna in General Conference neih loh kum bawk hian Presbytery KTP meet neih a lo ni ta bawk a, inkaihhruaina danah pawh telh a lo ni ta a.

     Rorel inkhawm hi a thlengtu apiangten, ‘tun bak chu kan thleng leh tawh awm si lo a chuvangin a tha thei ang ber in inbuatsaih ila’ an ti zel a. Tin, kumina kan hman leh tur Presbytery KTP Meet pawh hi a senso a hautak leh viau turah han ngai ila. Heng zawng zawng han thlir hian General Conference neih loh kuma rorel inkhawm leh Presbytery    KTP Meet thlengtu hrang hrangten kan sum senral belhkawm chu General Conference a sum sen ral aiin a tam fe dawn tihna a nih chu. Mahse, sum sengtu erawh bial/Branch mal an ni lo thung a. Thalai te hian thil kan duh changkang in kan duh tha hle tawh a, hmasawnna pawh a nihna lai a awm; Mahse, senso tlem leh hautak lo zawk, tha tho si a thil buatsaih kan zir thar pawh a pawimawh viau awm e.

Branch Huang :

KTP Keyboard:

Blanket suk:

Nimin nileng khan Biak In hmunah Blanket suk hnatlang neih a ni a, Member thawkchhuak kan tha hle. Tin, Blanket suk tur min siamsaktu Kohhran chhungkuate chung ah Branch Committee chuan lawmthu a sawi a ni.Branch Committee-in a lo rel tawh angin Keyboard hlui zawk Yamaha PSR 1000 chu mi mal in lama inzir dih tan hawhcchuah theih a ni a. Hawh duh chuan Branch Secretary hnenah ziakin dilna thehluh theih a ni ang.

` 8,000/- tuk kan ni , kan bial din ruala ding ve Zonuam Bial Budget atan ` 7,500/- tuk a ni bawk)

Bial awm zat : 161(+4)

Branch awm zat : 770(-4)

Member(Mipa) : 78,737

Member(Hmeichhia): 46,015

TOTAL : 1,24,752

Member thi zat : 354(+10)

Kristian Thalai la zat : 24,321(+2860)

2. INNEI CHUNGCHANG:

Nupui pasal innei zat : 4491

Biak in hawnga innei : 1822(40.57%)

Hmun danga innei : 2669(59.43%)

3. SUM DINHMUN

1.Bial sum hmuh belhkhawm :

2. Branch sum hmuh belhkhawm :

3. Kohhrana sum chhun luh belhkhawm

4. MISSIONARY CHAWM CHUNGCHANG:

1. Bial hminga Missioanary chawm zat : 224(+14)

2. Branch hminga Missionary chawm zat : 905(+127)

5. INKHAWM DINHMUN:

Ram pum thawhtan zan inkhawm zat : 29%

6. SUM DINHMUN:

* Total Receipt :

* Total Expenditure :

* Sum hman bang :

Thuchah :

LALPA RAWNGBAWL

 Rawngbawlna tih hi ringtute tana thil pawimawh tak mai a ni a, kawng hrang hranga sawi pawh a hlawh hle a ni. Kan sawi thukin kan chhui zau vak dawn lova, tualchhunga kan rawngbawlna, kan ban phak tawk atangin Lalpa rawngbawl pawimawhzia tarlan kan tum dawn a ni. Rawngbawlna tih hian thuthlungthar-a Greek tawngah chuan Diakonia tih a ni a. Tirhkohte Thiltihnleh Paula lahkhathawn-ahte kan hmunhnem hle a. Rawngbawl tih chu Krista tana hnathawk tih lehKohhrana mi dangte thawhsak/rawngbawlsak tih te a ni.

Lalpa rawngbawl tih chu hetiang hian han thlir ho dawn ila :-

1) Lalpa rawngbawl tur chuan engtin nge kan awm/khawsak ang? : Rawngbawltu kan nih chuan mi zahawm tak leh ni rinawm tak nih hi a tul hle a ni. Ni tin kan khawsaknaah suala tluk phahna tur tam tak he khawvelah hian a tam hle a. Hlemhletna te, ruihhlo leh mipat hmeichhiatnate leh mi mal nunah pawh harsatna tam tak a thleng thei a ni. Hengah hian kann inthiafihlim a kan fimkhur a tul hle a ni. Chuvangin kan rawngbawlna peng hrang hrangah mi sawisel loh leh mi dem a kan awm loh a, mi dang mit tlung taka kan thawh a, Pathian thlarau hruaia kan awm reng hi a tul tak zet a ni. Tin, rawngbawltu kan nih chuan Pathian biak inkhawm hi kan thlahthlam a rem lo. Pathian kan pawlna te, amha kan fak leh kan chawimawina te a nih avangin ringturten kan ngaih pawimawh a, kan tihmakkawh a ni.

3) Engtin nge Lalpa rawng chu kan bawl ve ang? : He khawvelah mi sual, nun nei lo, boral mai tur kan nih laiin, Lal isuan a thisenin min tlan a. Kan thih ai leh kan tawrh ai zawng zawng a lo tuar zo vek tawh a. Tichuan, nun nei lo khan nun kan lo neih phah ta a ni. A ropui hle mai. Tichuan eng titurin nge min chhandam kan tih chuan a rawngbawlna chanchintha hril turin tih hi kan hriatreng a tul hle. Kan Lal Isua pawh kha he khawvela a lenlai pawh khan Pa rawngbawlin a hun zawng zawng a hmangral a. Rawng a bawl tan dawnin thlalerah ni 40 leh zan 40 tawngtai turin a kal tih pawh kan hria a ni. Tichuan, keini ringtute pawh rawng kan bawlna kawng hrang hrangah tawngtaia kan inhlanthar hmasak a tul takzet a ni. Tin, Kohhran leh KTP-ah te nihna/chanvo hrang hrang neiin rawng kan bawl thin a. Hengah hian Pathian ropuinan leh mi dangte tana malsawmna ni thei tura kan tahwh hi a pawimawh hle a ni. Tin, a dang lehah chuan kan member-pui, ksn thian te, Biak In thleng pha lote, sualin a phuar beh te hi kan vei a tulin, an tan kan tawngtai a, kan lenchilh a, kan kawm tlangnel hi kna rawngbawlnaa tul leh pawimawh tak ber a ni thei hial awm e. Tan kan lak a tul hle a ni. Kan rawngbawlna tur pawimawh tak dang lehah chuan thilpeka rawngbawl hi a ni. Malsawmna tam tak kan dawng theuh a, hengah hian kan dawn ang zela sawma pakhat kan hlan ve hi kan tihtur a ni. Pek na chang hre lo leh pek tul ti lo an awm fo thin. Kan pek avangin kan chan dawn lo a, kan pek tam poh leh a malsawmnain min vur let zel dawn a ni tih pawh hi kan hriatreng a pawimawh a ni.

3) Lalpa rawngbawl tlattu chanvo : Lalpa rawngbawl hlamchhiah a tlanchhe thinte chan han tarlang hmasa ila. Bible-ah Jona chanchin kan hria. Lalpan rawngbawla chanchintha hril turin Ninevi khuaah a tir a. Tahchuan kal duh lovin Tursis lam pan lawngah a kal tih kan hria. Tahchuan a chungah Pathian hremna eng nge lo thleng? Sawi vek lo mai ila... Tin, Lal Saula chanchinah pawh Israel lal ropui tak a ni a. Mahse ama duh dan leh hamthatna tur a duh avangin Pathian duh loh zawng thil a lo ti a. Pathianin a kalsan tih kan hria. Chuvangin kan rawngbawlna hi Pathian kohna a ni tih hriain, min kohna apiangah rinawm taka kan thawh a tul hle. Keimahni duhdan te, lansarh duh vang te, fak hlawh duh avang te leh kan peih tawk chauha a nuam leh a hlimawm lai chauha rawng kan bawl mai a nih chuan Jona leh Lal Saula chanchin kan sawi ang khan Pathian hremna kan tawkin , min kalsan ve mai ang tih a hlauhawm hle a ni. Chuvangin kan chantawkah, kan hmaa tihtur awm apiangah rinawm tak leh chhel taka a rawng kan bawl tlat chuan he leiah leh kan thih hnu thlengin chawimawiin kan awm dawn a ni. (Johana 12:26) Tahchuan, rawng kan bawlnaah chauh chang ni te pawh nei thin mah ila thlarauin min tichak thar zelin, a malsawmna kan dawng zel thin dawn a ni.

A tawp berah chuan Josua 24:14-16 a kan chhiar ang khan, Lalpa kan tih takzet a, kan taksa leh kan hun zawng zawng kan hlan a, Lal dang rawng bawl lova lal rawng chauh rinawm taka kan bawl zel theih nan Lalpan malsawm rawh se. Amen

Thuziak :

KTP tak hi chu aw !!!!!!!!

: Zathangliana

Kan Editorin thu ziak turin mi sawm ve mauh mai !! Kawng hrang hrangin engvang a mi sawm ngawt nge ni ang aw !! tih ka ngaihtuah a. Hruaitu hlui zahna lantir vang ti dawn ila, ka ni bawk si lo, thuziak thiam vang tih lah in a teuh lo leh zual bawk si, a tawp a ka rindan ta ber chu, hmun awl hnawhkhah nan ni ta berin ka hria, a enga pawh chu nise ka han ziak ve poh a ni ang chu, Pathian thu em em pawh ziah ka tum chuang lo, Kohhran chanchinbu a nih avang hian sermon lam hlir chhuah tur pawh hi a ni ber em aw ? Kan hun kal tawh lamte ka ngaihtuah a, ziah tur chu tam tak a awm, mahse hmun a chep riauin ka hria a, tawi te ka han ziak ve ang e.

Midangte thlazar hnuaiah ka thatlai hun tam zawk KTP ah hian ka lo hman ve thin avangin KTP hi chu ka ral thlir ngawt thei lo a ni, eng ti peih tawh lo mah ila, an chhiat an that hi chu ka ngaihven ve reng thin, rilruah hian an chhiat chu ka lo phal bik awzawng lo mai, ka rilruah hian a cham reng a ni. Tunah hian engvang teh kher emaw ni, ka rilru hi a chawl ta tlat mai a, thenkhat chu lungawi loh vangte, kumin a nawr chhuah vangte etc. a ni hlawm a, kei chu engvang mah a ni lo, a chhan chu ka peih tawh lo a ni berin ka hria, tin kan bula awm hi thalai naupang zawk hian nuam an lo ti mang tawh hlek lo mai a. Fellowship-ahte kan han tel ve a, "Tap chungin kraws kawng ka zawh zel ang" tih hla te an han sa a, keini chuan "Hebrai mi sal thingthi kha i hmu em? tih te kha kan rilru kuai zawng a lo ni a, thangtharte’n tui taka sak ngaihna an hre tawh lo, a thlangtu hmaizah avangin hmuiphunin an sa chhuak ve mai mai a ni. Tawngtai rual thupui kan han thawh ve lah hian sawifiah kan tum lutukna lamah kan sawi buai zo a, hmangchang hriaa kan in ngaih laiin min lo ning a, tawngkam hnih khat leka tunlai thangthar zawkte chuan a lo man thiam mai a, a sawitu zawk kha a chiang lo ber chu ka lo ni leh thin.

Mite angin chanchin sawi tur ngah lem lo mah ila, ka tawn chin hi chu sawi nuam ka ti ve khawp mai, chuvangin tawn hriat ngah hi chu a hlu em a ni, tawn hriat ngah tur chuan tel tam erawh a ngai thung a ni.General Conference kalte hi a va hlawkthlak tak em, Kolasib a Pu Mamawia Vawksa ei thei lo ni a thlenin ten an ngaih a sa duh ber a lo nih si te kha chu amah leh thlen in te khan mak chu an ti e, Ratu khawmpui kha chu kumkhaw sawi a tling ngei ang, thlen inte’n Vawksa an rep teuh mai a, hmun danga chaw eia kan chhuah tlai ber kher a an lo siam daih kha chu ka ngai thiam thei ngang lo a ni e, a bak chu Maipawl bai a ni mai, kan then mai mai emaw kan tih lai hian kan rilruah chuan thu lut engemaw zat chu a lo awm tho mai. Work Camp kalte hlei hlei hi a hlawk thlak, Salem Boarding a Krismas kan hman tum a Pu Buanga’n Krismas tuk tak maia inkhawm lova Ui a talh tak mai mai te kha chu sawi fo tlak pawh a ni lem lo, zanah pulpit chu a lawn leh ang lawi a, kan haw lam 407 truck-ah kan chuang haw a, kan tawtzia kha, kha tih laia kan Leader Tv Zawma’n a mal tlawhtu na a ti tawh si a, a tih ngaihna hre lo a han sik vak mai a, ama ke veilam a sik lek a ni si a, tunah hi chuan hmanlai chang tawh mah se a hun lai kha chuan hreawm ve tak chu a ni, ka hlawkpui pawh ka hre love kan in tih lai hian, ramthim a rawngbawl hautakzia te kan hriatphah a, rilru-ah hian a lo cham reng thin.

Hruaitu kalchhuak tur ang ziazangin memberte thuchah duhte chu ka la nei lehnghal a, zawm tak hlawm ang i maw !!!! In piangthar emaw, thar lo emaw, KTP-ah hian phur takin tel zel mai rawh u, kum 4/5 hnuah zawng a tak in pawh em em ang, nun kawng dik zawh nan KTP tluk a pawl tha hi a awm lo, Pathian hnen atanga kan lawmman dawn tur lam chu thu hran nise, khawvel thil tak pawhin a hlawk hrim hrim a ni.Pawl tenau pawh han din dawn ila, hruaitu invuah chawp ngaiah pawh hian KTP-a lo tel hrep tawh hi chu mi hian min hmehbel nghalin hruaitu han nih mai pawh hi kan inhmeh nghal a, kan awm bik nghal vang mai a ni. Chutih hunah chuan, "Ka hming a chuang tawh em" tia in zawt lovin, "Tunah a par rimtui ka tem ve ta" tiin fak hla kan rem tawh zawk ang a. Thlamuang taka chawl turin ama hnenah kan nunna kan hlan tawh zawk ang, kan nunna pawh lo tawpin he khawvel kan chhuahsan hun pawh lo thleng mahse, mite’n, "A O.D. a ni" an ti lovang a,

"Lalpa hnenah a chawl ta

"Leiah thiante then mah ila,Vanah kan intawk ang"

tiin min thlah liam zawk ngei ang.

Chutih lai chuan KTP memberte hi kan nun hi mite’n min chhiar a, min thlir reng a ni tih hi kan hriatreng a pawimawh, Zu rui thle mai mai kan tih ho ai hian rui lo hailo hian min thlir uluk zawk tih hi hriatreng tur a ni. "Hawilopar Krista ka thliak ta" titu KTP te hian, Khawpui Thianghlim, Lalpa ram kan luh hmain ‘Midangte tana nung tur’ kan ni tih hi i theihnghilh lovang u.

"KTP member chu..... Zirtir theih, Inzir peih, Kohhran ngaisang, Inpekna sang, Peih lo nei lo, Mamawh ngah lo, Chhia leh tha hria, Hun leh hmun hria, In lama tangkai, Pawn lama tlawmngai, Mawhphurhna pek tlak, Thiante entawn tlak, Pawn lam lan dan mawl, Rilru belhchian dawl,Fakna chapopui lo, Sawiselna tlukpui si lo, Tisa lam nun hlim, Thlarau lam nun him, Zei(Over si lo), Intizei ni bawk si lo, Fel, Inti fel ni si lo, A tul huna mengrei thei" ni turah ka ngai.

Editorial :

     Court-a a nupui Gladys Staines tawngkam erawh hi chuan Khawvel mak tih a hlawh thung... "Lalpa Pathian chu ka kawng min hruai turin ka hnenah a awm reng a, Graham-a hnathawh kha ka chhunzawm zel theihna turin mi pui reng bawk a ni. Nimahse a chang chuan hetiang hian ka ngaihtuah thin; engvangin nge Graham kha thah a nih? eng rilru puin nge khatianga rawng taka January ni 22, 1999 zan khan an tihhlum ni? Mahse kawng dangah chuan ka pasal leh ka fate tualthih chung changa mawhphurtute chunga hremna thleng ve tur chuan ka ngaihtuah ngai lo. An thiltihsual avanga an inlamlet a, siamthat a an awm hi ka duhthusam ber a ni." tiin...

     Orissa hi Kristian tihduhdah hluarna state a ni a. Kum 2006 khan an ram khawpui pakhat, Cuttack-ah hian kan kal ve a. Kristiante chunga thil thleng thin avangin rilru chu a muang zan lo a ni. Zing karah ka thian pakhat nen phul hmun-ah kan leng kual a, Naupang leh puitling ho hian Cricket an khel sup sup a. A sira thutnaah chuan thuin kan thlir a. Naupang kum 10 mi vel chuan kan bula ball lum rawn chhar pah chuan, khawi atanga kal nge kan nih min rawn zawt a. ‘Mizoram’ a ni tih kan hrilh chuan tlangnel tak mai hian, ‘Kristian in ni ang ti raw? Keipawh Kristian ka ni a sin. Sawlai deuhah sawn Roman Catholic Church a awm a, induh chuan ka kawhhmuh thei ang che u" a ti ta reuh a....

     Hmun ralti-a awmte hian engangin nge min lo ngaih ang? Ralmuang taka kristian-te hi hmun ralti-ah eng nge kan dinhmun ni ang le? Tun thleng hian kha naupang te avang khan zawhna tam tak ka inzawt thin!!! -

Branch Huang :

Blanket suk:

Single:

Medium:

Double:

Foreign rizai etc:

Rorel Inkhawm:Nizan inkhawm khan kan Bial Zaipawl te pawh in zaia rawngbawlna an nei a ni Ni 11.3.2011 (Zirtawpni) zan atang khan Bethlehem Kohhran Biak Inah Central KTP Rorel Inkhawm chu neih tan a ni a. He Rorel Inkhawm hian zanin thleng a awh dawn a. . Kan Branch atangin Pu R. Lalduhawma, Branch Secretary chu Branch aiawh in Rorel Inkhawmah hian a palai a ni. ` 80` 100` 120A len dan azirNi 19.3.2011 (Inrinni) khian Blanket su a Branch hnatlang Biak In compound ah neih tur a ni a. Kohhran chhungkaw tinte hnenah tun kar chho hian Blanket etc., suk tur an rawn zawng dawn a. Kohhran chhungkaw tinte suk tir theuh turin min ngen a ni. Rate hetiang in siam a ni:

Jt. Editor       January ni 22, 1999 khan Orissa rama Keonjhar District-a thingtlang khua Manoharpur-ah chuan Australian Missionary, Dr. Graham Stuart Staines leh a fapate pahnih, Philip leh Taylor te chu an chuanna motor-ah mipui pungkhawm chuan an hal khung a. Rawng taka tihhlum an ni. Kha thil thleng khan Zoram Kristian-te pawh min thawngin, a titute kan dem hle a ni. " an tih rualin,  : PC. Lalrinenga