KAN MAMAWH BER ISUA
(Amosa 8:11, Johana 4:13)
Tun tuma kan thupui zirho atan chuan "Kan mamawh ber Isua" tih hi ka’n thlang a. Rilrua awm ang leh chhiartute mamawh tur zawngin kan sawi fuh lovang tih erawh a hlauhawm hle mai. Engpawh nise pakhat talin hlawkna kan chhar chuan a hlawhtlingah kan ngai a niang chu.
Aw le, Amosa 8:11 kan chhiar chuan, ‘Tam ka tir ang a, chaw tamna ni lovin, tui tamna ni hek lovin, Lalpa thu hriatna tamna zawk chu,’ tih kan hmu a. Kan khawvel nun han chhut hian kan nun theuh hi engemaw ti tak hi chuan a tam a ni. Tichuan kan tamna avang chuan kan nunah hian indo a awm a, keimahni hi indona field chu kan ni a. Kan thian pakhatin a tia lawm, ‘Kan mihring nun hi a der, a lem a ni a, kan hming nen lam hian a der a ni e,’ a ti a.
Kan ngaihtuah chiang a, dik hmel riau a hriatna kan nei a, Mahmi hming pu zo hi kan awm ang em le? Chutiang ang mihringte kan nih avangin, kan thupui hi a pawimawh ngawtin ka hria a, Isua hi kan mamawh tak meuh a ni. Han hawi zau deuh phei chuan, ram leh ramin remna an zawng a, remna duh ve ve kha a tak ramah chuan an indo rup rup reng a ni. Pathian thu kan en chuan, remna chu dawhkan a sawirem chi nilovin, ke a bun tur a ni. Ke a bun tih awmzia chu remna chu a rah a rah dik tur tihna niawm tak a ni.
Tichuan, engkim mai hi a mamawhtute tana hlu a ni a, kan thupui a kan hman "Kan mamawhber Isua" tih pawh hi a mamawh lo tute tan chuan a hlu chuang lo. Khawvel hian Isua a mamawh a, mihring hian Isua hi a mamawh tak zet a ni. Kan mamwah loh zawng chu kan thlauhthla thin. Juda Iskariota pawh khan a zirtirtu Isua kha a fawp a, a hmangaih hmel khawp mai, mahse a mantir daih a nih kha, engvang nge? atan a hlu lo tihna a ni.
Chutiang chuan kan Lal Isua ngei pawh kha, he khawvela a len lai pawh khan mi zawng zawng tan khan a hlu chuang lo asin! A ni pawh kha a mamawhtute tan chauh a hlu a ni! A mamawhtute kha tute nge an nih? Mitdelte, Kebaite, Piangsualte natna tinreng tuar tue kha an ni asin! Kan mamawh ber Isua hmufiah thei khawp a Mitdel, Isua pan thei tawh lo khawp a Kebai nasate kan nih kan inhria em? Kan piansualnate kan inhria em le? Isua hi kan mamawh tak zet em le?
Kan inhriatna danah leh kan in hmuhna dan atang chuan kan mit a del lova, kan ke pawh a bai lovin kan piangsual lo a ni thei e. Unaute u i inhriatna dan leh i inhmuhna dan kha, Lalpa’n a pawmpui che ang em le? Mi thenkhatin Isua kan mamawh ni a kan inhriat dan hi chu ngaihtuah chian a ngai khawpin ka lo hre ve thin. Kan fate kan duh anga an awm theihnan leh, kan nupui/Pasal, kan tu leh fate kan duh dan a an awm theih nan te, mamawh in kan inhre tlangpui thin. Tin, chumai ni lovin mihring a kan la awm chhungin, hrisel lohna leh bawrhsawmnate, harsatna leh buaina kan tawk thin. Chutiang atanga min chhanchhuak tur tein kan mamawh niin kan hre thin! A bak hi chu kan ngaihtuah tam pui lutuk lo ni te hian ka lo hre ve thin a, a dikna tak erawh chu mimalah a chiang ber ang.
Tumah hi kan sual hrim hrim ringawt in a lang lo, mamawh kan nei a, chu kan mamawh chu kan zawnna kawng erawh chu a inang lo hle a ni. A thenin zu ah kan zawng a, a thenin Drug-ah kan zawng bawk. Khang zawng zawng kha an sual hrim hrim vanga ti an ni chuang lo. An nunin mamawh neiin an hria a, chu chu an zawng a ni. Kawng hrang hrangin kan zawng thin.
Mihringte hian mamawh chu kan nei tih kan inhre theuh a, mamawh ni a kan inhriat erawh chu a inang lo hle thung a ni. Hlimna atana zu leh Drug mamawh ni a inhriate chu OD in an thi mek a. Tin, nulat tlangvalna kawnga mamawh zawngte pawh AIDS veiin an thi mek bawk tih kan hre theuh awm e. Mithiamte chuan, tun thlenga kan mihring nunin mamawh a zawnna chhan hi ‘Eden sual zungzam vang a ni e,’ an ti a. A dik hmel hle mai.
Mithiamte chuan, khawvel a tuihal a thi tam berte chu Thlaler mite ni lovin Tuipui chunga cheng lawng mite an ni e, an tih tlat chu! Engvangin nge tui hal a an thih? Hun rei tak tuipui chungah an awm a, tui thianghlim in tur an tlachham a, tuipui tui an in lo thei lova, tuipui tui chu a lo al si a, an tuihal a tizual a, an in zel lo thei si lo. Tichuan, an in zel a, an tui hal a zual zel a, tui hal huam huam chungin an thi mai thin a ni an ti. Unaute u, he khawvelah hian khawvel thlahlela thi an tam ber a, khawvel thlahlela chen duhte hi khawvelah duhtawk hmu lova thi vek tur an ni. Lawng mite tuihala an thi tam ber angin, Drug tih ching te chu Drug chakin an thi tam ber dawn a. Chutiang zelin thil dangah pawh..
Kan nun hian tuihalna engemaw tak a nei theuh a. Kan tuihal rehna tur kan zawn dan leh kan zawnna hmun hi a dik loh avangin kan ram, kan khawtlang, chhungkua leh mimal nun thleng pawh in a rum mek a. Unaute u, nang leh kei hian khawvelah hian Lal Isua tel lo chuan tuihal rehna hi kan hmu dawn lo. Tuihal reh a hnekin tuihal zual zelna bak chu hmuh tur kan nei dawn lo. Kan mamawh hi i ngaihtuah chiang ang u. Kan mamawh ber chu Isua a ni a, Isua nilovin thildanga mamawh kan zawn chuan, fak hla siamtuin a sawi "Aw Lalpa, khawvel a tuikhur chawi turin ka tlan a, mahse a tui ka in thei lo, thihna tur a lo ni" a tih kha kan chan tur chu a ni.
Tunah hian kan thupui hi ngaihpawimawh loin kan inngaihtuah tha duh lo pawh a ni mai thei. Kan hnukchah dawn darkarah chuan he thupui pawimawhna hi chu kan chiang tawh ngawt ang. Mahse maw! a tlai ang tih ava hlauhawm em. Tunah hian kan mamawh ber Isua’n min kohna leh sawmna hi kan hlamchhiah a nih ngat chuan koh luihna ri kan la hre dawn tho si, kan tlai palh ang e.
I han in enchiang teh ang aw, he khawvelah hian hlimna leh nawmchenna tur a awm emaw kan ti a, kawng hrang hrangin chu’ng chu kan mamawh emaw tiin kan dap a, kan um fo thin. Mahse he’ng hian atawpah thlamuanna min pe em? Thihna kut vawt in min man hunah min chhan thei ang em le? I belh khawvel parmawina leh hlimpui em em ni a i hriat thin khan i rilru hahna leh manganna lakah a chhawk thei che in, i hnuk chah dawn darkarah a tanpui thei chein, i thlamuanpui tak meuh em? Ngaihtuah chiang rawh. A chhanna awm chhun chu "THEI LO" tih hi a ni. A chhanna dang kan hria em le? I hre lo a nih chuan eng nge i mamawh nia i hriat ngaihtuah chiang ang u. Kan mamawh ber Isua pan thei hun kan la neih lai hian, kan tuihal rehna leh tamna rehna dik tak tur Isua hi i pan ang u. Kan pan a, kan lo nei tawh a nih pawhin hnaih lehzual turin i inbuatsaih thar ang u. Isua chauh hi a ni tuihal rehna leh kan mamawh chhanna diktak chu. Kan mamawh ber Isua kan pan a kan neih a, mite tana malsawmna kan nih vek theihnan. Lalpa’n a thu mal sawm rawh se, Amen
No comments:
Post a Comment