24.10,2010 - Sermon

ZALENNA

: R.Lalduhawma

     Mihring tupawhin a kan thlakhlelh thalai te lek phei chuan kan mamawh leh beisei tlat chu Zalenna hi a ni awm e. Tuma awp beh na hnuaia awm hi kan thlahlel in kan duhthusam ni berin a lang. Ram rorelna huang pawh daia chi leh chi inkar ah pawh bu a khuar bawk a, Kohhran huang chhung thleng pawhin zalenna tha leh dik hi kan beisei leh kan duh leh mamawh ber a ni reng a ni.

    Tunlai zoram khawvel ah ngei pawh rampum leh hnam zalenna chu sawi loh mimal zalenna thlengin kan sawi vawng ta hle mai. Mahni dikna chanvo leh kan zalenna buaipuiin mi tam tak kan hmanhlel ve mek a, mahse kan zalenna leh dikna chanvo kan hriat ang hian midangte chanvo leh dikna hmu thiam ila chuan kan nunhona hi a nuam leh zual ngei ang.

     Zalenna kan duh luat ah hian Kristian ringtu inti te meuh pawh hian dikna hi kan hmu tha duh lo tlat a, kan dik lohnaah pawh dik anga din tlat tum na khawvelah kan chuangkai tlat tawh niin a lang. Caro-a chuan " Mi a dikna ah pawh a ngawih reng theih chuan Pathian a hnaih hle a ni" a ti, Keini hi kan nive em le?

     Kum 1834 khan an ramchhunga Bawi awm zawng zawngte chu an chhuah zalen ta a, America ramah erawh chuan hun rei tak chhung Bawi an nei zel thunga, chutih lai chuan America hmar lam ram Canada chu British kuta awm an ni a, Bawihte chuan zalen nih an duh avang chuan Hmar lam Canada chu a rukin an pan thin a. Bawih tlanchhuak te chuan "Hmalamah Bawih chhuahna a awm e, hnunglam ah Bawih tanna" Bawih neihna ram hnunglam hawi tawh lovin, Hmar lam pan ru, Canada fak rawh u. He hmun hian min ti thar a, Bawih tan kan hlau tawh lovang, British puanzar a phe e, en ru!Zalenna ram a ni" tiin hlim takin an zai a. Lawnglengin an in kar liam suau suau thin anih chu.

     Khawvel kan nun chhung hian Zalenna hi chu a hlu alo ni. Kan thlarau nun zelna tur ngaihtuah thleng lo tan pawh Zalenna hi a hlu a kan buaipui ber pawh a ni mek reng a ni hi. Hetiang khawpa khawvel zalenna pawh kan hlut chuan chatuana kan zalenna tur hi kan ngaihthah ngawt thei dawn em ni? Evi leh Adama bawhchhiatna avangin Setana bawiah kan lo awm tawh a, mahni ngawt chuan kan zalen thei lo a ni tih min siamtu Pathian chuan hriain kan zalenna dar vaw tur in a fapa Isua Krista he khawvelah a rawn tir ta!

     British puanzar phe pawh thlahlel ngawih ngawih tu mihang bawihte zalenna aia ropui leh huapzo Kalvari hnehna puanzar chu mi zawng zawng tan a lo phe ta, a duh apiang tan zalenna pek kan ni ta, a va ropui em! Pathianin zalenna min pek dan hi a mak ngawt nia, a fapa kaltlangin min zalen tir a, chu kan zalenna chu min laksak leh dawn lo reng reng. Amah hmangaih tur leh a rawngbawl tur pawhin min nawr lui lem lo niin a lang. Kan hmangaih let ve a phut a, mahse min nawr lui turin kan nunah a rawn inrawlh chuang hauh si lo.Duhthlang turin min dah zalen mai a ni. Kan duh phawt chuan a duh zawng kalh hlir pawhin kan kal thei a, dik lo nia kan hriat pawh kan thlang thei. Mahse, kan sual mawhphurtu chu Pathian a ni kan ti thei hauh lovang. Pathian chuan sual awm theihna khawvel a siam a. Pathian chuan mihring thlarauvin zalen taka a thlan a, inpawhna zalen tak neih chu a duh ber a ni. Vansangah ni leh arsi te an awmna hmun tur theuhah a dah a. Rannungte pawh an nihphung pangngai angin a siam a. Sakei pawh sakei pangngai piang hmasa ber ang tho an la ni reng a, mahse mihringah erawh chuan thil danglam tak a dah tlat a ni. Chu chu duhthlan theihna min pek hi a ni. Mahse he kan duhthlanna zau tak Pathian min pek hi hmang dik lovin thalaiten thlan loh zawk tur kan thlang fo mai hi kan inenfiah a ngai tak zet a ni.

     Ni e, Pathianin zalenna min pek hi a zauh em avangin kan hmang sual reng a Petera chuan, "Zalenna chu sual khuh nan hmang lo tur leh Pathian bawia awm zawk turin" min hrilh a, sual lama zalen turin Pathianin min chhandam lova, zalen nimah ila Pathian min chhandam dan hian keimahni thu thu a awm turin min ti zalen lo.

     Zalenna dik tak Lal Isua thisen avanga kan chan hi sual rawngbawl san mai mai chi ani lova, a duh zawnga rawng kan bawl theih nan zalenna min pe ani zawk, hei hi kan hmuhfiah a tul tak zet a, sual lak atangin zalenna min pek avangin a rawng chauh bawl tur kan lo nih chu.

     A tawp berah chuan eng bawihah nge tang ni a kan in hriat le? Eng atangin nge zalen kan mamawh le-Khawvel ropuina ,sum leh pai, changkanna bawi atang em ni? Zu leh sa ruihhlo leh nulat tlangval kawngah em ni kan tan zawk le? Chapona leh fing intih riau na bawihah em ni zawk, nge? Thatchhiatna bawih atangin ? Setana hnathawh nun beidawnna leh khawvel mit chakna hrang hrang bawihah zawk em ni le? Heng zawng zawng atang hian Pathian chuan a fapa Isua Krista atangin zalenna min pe tawh a, Galatia Bung 5:1 ah chuan " Bawih nilo turin Krista ah chuan min chhuah tir kha, chutichuan ding nghet ula, Bawih nghawngkawlah chuan tang leh tawh suh u". Kan nun min sal bet tu sual zawng zawng hi min hlih sak vek tawh a ni. Chumi lo rin mai chu nang leh keia duhthlanna tur a ni a, nang leh kei hi pawimawh ber chu kan ni. Kan zalenna atan engkim peih fel a ni tawh a, chuvangin sual zawng zawng laka ta min tlanchhuaktu lam hawi in a rawng chauh hi bawl sauh sauh zawk mai tur kan lo ni e.