LEGAL IMPLICATIONS OF SEX AND PORNOGRAPHY
: C. Lalramzauva Advocate
Mipa leh hmeichhia te hi in ang lo tak a siam ni mah ila kan ram danpui Article 15 leh 16 na leh dan dang reng rengah pawh hmeichhe nih vang emaw mipa nih vang emaw inenhranna hi khap tlat a ni a. Hetih rual hian hmeichhia hi chak lo leh derthawng zawk an nih avangin an chunga sualna chi hrang hrang laka venhim an nih theih nan Dan a hungna chi hrang hrang siam a ni . Chungte chu Indian Penal Code(IPC) lam atangin lo chhui hmasa ila.
i) Pawngsual(Rape) : IPC Section 375-ah hian ‘Rape’ chung chang sawifiah a ni a.Mipa in hmeichhia kum 16 hnuailam chu a duh ve reng vang pawh nise ‘Sex’ a hman pui chuan ‘rape’ ani nghal tawp.Kum 16 chin chunglam a nih erawh chuan chu hmeichhia chuan a remtihna anga Sex a lo hmanpui a nih chuan rape ani lo.Amaherawhchu vauzamna vang emaw, a pasal ni lovin pasal anga a inlantir vang emaw rilru chiangkuanlohna vang emaw a ma duhthu reng vang ni lova ruihtheih thilin a tihbuai vanga thiltih chu hriatfiahna nei lova a awmlaiin emaw chu remtihna denchhena sex lo hman pui a nih chuan rape a ni tho a ni.Rape hi sualna rapthlak tak, tualthahna dawttu hial a ngaih anih avangin a hremna pawh a naa kum 7 aia tlem lo, kum 10 thleng emaw damchhung emaw lungin tan theihna a ni.
ii) Adultery (Uirena) : IPC Section 497-ah chuan hmeichhia, mi nupui a ni tih hre reng chunga a pasal remtihna ni silova chu hmeichhe remtihna ngei pawhin a lo mut pui a nih chuan, chu mi chuan Uirena sual a ti a ni. Kan Mizo Hnam Danah chuan hmeichhia kha a uire a, mahse IPC hnuaiah chuan mipa a uire thung. Uire chu kum 5 thleng lungin tantir emaw chawitir emaw a pahniha inkawp hremna pek theih a ni. A hmeichhia zawk hremna erawhchu a awm lo thung.
iii) Unnatural Offence : IPC Section 377-ah chuan mipa leh mipa, hmeichhia leh hmeichhia inkawpa nupa anga awmte hrem nan hman thin a ni. Tin, ran nena inpawl pawh a khap bawk. He Dan bawhchhetu chu kum 10 thleng lungin tan tir theihna a ni.
iv) Pornography : Pornography awmzia chu nawhchi zuar/zawrhna tarlanna a tih theih awm e. IPC Sections 292,293leh 294 te hian he lam pang hawi, tisa chakna tichhuak thei zawng tur ang chi thu ziak chuanna lehkhabu, milem bu, pamphlet, milem-thlalak emaw milem ziah leh a kaihhnawih chi reng reng chuanna/awmna hralh emaw, sem darh leh mipui vantlang ban phak tura dah emaw hralh tura dah emaw, hralh tur emaw, hawh tur emaw, hawh theih emaw, mahni kawl tura lo neih emaw, ram dang ataga lak luh leh ram pawna thawn chhuah emaw, mahni mimal sumdawnna atan lo hman emaw, mipui vantlang hriat/hmuh theih tura a lo puanzar leh theh darh zawnga hmalak emaw thehdarh tir emawte chu a khap bura. Hemi dan hnuaia thiamloh chantir an nih chuan - vawikhat tih sualah kum 2 thleng lungin tan leh Rs.2000/- thleng chawi tir theih a ni a, chumi hnua a ti sual leh a nih chuan kum 5 thleng lungin tan leh pawisa fai Rs.5000/- thleng chawi tir theih a ni. Tin, he thil hi mi tupawhin kum 21 la tling lote hnenah a ti a nih chuan vawikhat tihsualah kum 2 thleng lungin tan leh Rs.2000/- thleng chawitir theih a ni a, chumi hnuah a tisual leh a nih chuan kum 7 thleng lungin tan tir leh Rs.5000/- thleng chawitir theih a ni.Nawhchizawrh chung changa khuahkhirhna chi hrang hrang leh chung dan te chu bawh chhiat a nih a hremna chi hrang hrangte chu, miin a in leh hmunte nawhchizawrhna tur atana lo hmantir/luahtir a nih chuan Sec-3 in a sawi angin tum khatnaah kum khat aia tlem lo leh kum thum thleng tantir Rs.2000/- thlenga chawitir theih a ni a, a vawi hnihna atang chum kum hnih aia tlem lo leh kum nga thleng tantir leh Rs.2000/- thlenga chawitir theih a ni bawk. Tin, Sec-4 ah chuan mi kum 18 chunglam, nawhchi zawrhna atanga sum hmuh a ni tih hre reng chunga, chu sum chu inenkawlna atana hmang leh khawsa a nih chuan kum 7 aia tlem lo leh kum 10 thleng lungin tan tir theih a ni. Section 5-ah hian mi tupawhin mi dang, ama remtihna emaw duh thu vang ni lo pawha nawhchizuar tura a hruai emaw, hruai a tum emaw, chutiang ti tur chuan a fuih emaw anih chuan kum 3 aia tlem lo leh kum 7 thleng lungin-a tan tir leh Rs.2000/- thlenga chawitir theih a ni. Tin, ama duh thu ni lova a lo hruai lui anih chuan kum 14 thlenga tan tir theih a ni ang. Section 6-naah phei chuan tupawh nawhchizuar tura midang ama duh thu emaw duh thu lo pawha nawhchizawrhna in/hmun a lo awm tir tu chu kum 7 aia tlem lo leh dam chhung emaw kum 10 thleng emawa tan tir theih a ni.
(Mizoram Synod Social Front in dt.26.8.2010, a a buatsaih Seminar cum Workshop on Sex Video & Pornography Paper zir siamrem a chhuah chhawn a ni.)
No comments:
Post a Comment