PATHIAN DUHZAWNG TIH
: K. Mangchhuana
"A mithmuha a lawm zawng ang apiang Isua Krista zarah keimahniah thawkin, a duhzawng ti turin thil ha tinreng kawngah tifamkim che u rawh se." Hebrai 13:21
"I ram lo thleng rawh se. I duh zawng vana an tih angin lei a min ti rawh se." Mathaia 6:10
Kristian chuan Pathian duh zawng tih a chak tur a ni. Chu a duhzawng tih chakna nei thei tur chuan heng a hnuaia kan tarlan atangte hian kan zir a, kan chan ve a ngai a ni.
1) Pathian nena lendun
2) Pathian-a ro khawl khawm
3) Pathian lam en
4) Pathianin min hmangaih anga hmangaih let ve.
1. Pathian nena lendun : "Mathusela a neih hnu chuan Enoka chu kum 300 chhung zawng Pathian nen an leng dun thin a, fanu leh fapate a nei leh hlawm a." Genesis 5:22
Kristian tak tak hian kan kut pakhat chauhin Kross vawn kan tum a, lehlamin khawvel. Inrinni zanah tlemin kan kristian deuh a, Chawlhni chawhma zawng kan kristian em em a, chawhnu lamah tlemin kan tla hniam leh tawh a. Zanah chuan a rim kan la nam chang chang a. Chuta tang chuan a rim nam chang changin Thawhtanni atanga Inrinni thleng nun kan hmang zui ta thin a ni. Lalpa chuan kan taksa peng te te ah te chauh hian innghah a duh lova, kan taksa pumah hian hmun khuar a duh. Chuvang chuan amah nen chauha leng dun tur chuan Lalpa hian kan taksa puma kan inhlan a phut tlat a ni. Lalpa duhzawng titute chauh lo chu Lalpa nen an leng dun thei lovang.
"Lalpa, Lalpa mi ti na zawng chu Vanramah an lut lovang. Ka pa, vana mi duh zawng titu erawh chu an lut ang." (Mathaia 7:21)
Pathian nena lengdun tur chuan amah kan tihlawm a ngai a. Bang lovin a thu kan ngaihven a, kan tawngtai a, amah kan pawl reng a ngai a ni. "Bang lovin tawngtai ula, engkimah lawmthu hril fo rawh u. Chu chu nangmahni lam thu-ah Krista Isua-ah chuan Pathian duh zwng a ni si a." (I Thes 5:17)
2. Pathian-a ro khawlkhawm : "Vanah sulrul leh tuiekin a eichhiat lohnaah, rukruten an reh pawh theih lohnaah chuan in tan rote khawl khawm zawk rawh u." (Mathaia 6:20)
He khawvela mihring chhiar sen lohte hian khawvela an chen chhungin tisa thilah an inchhek khawm ruih ruih a, sum leh pai, ro tam tak an khawl khawm a. Malsawmtu leh a petu Pathian lam an ngaihthah leh si a. Khawvelah an nun zawng zawngin an tlan a. Chuvang chuan pathian nen an leng dun thei lova, a duh zawng pawh an ti thei ngai lo a ni. Pathian duh zawg titur chuan kan nun zawng zawngah hian amah kan dah pawimawh ber a ngai fo thin.
"A ram leh a felna zawng hmasa zawk rawh u. Tichuan chung zawng zawng chu a pek belhchhah dawn che u a ni." (Mathaia 6:33)
3. Pathian lam en : "Tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u. Ani chuan a hmaa hlimna awm avang chuan mualphona chu ngainepin kraws chu a tuar a, Pathian lalthutphah ding lamah khian a han thu ta a." (Hebrai12:2)
Ringtu Kristian inti thenkhatte hian Chunglam Pathian thu aiin dinhmun sang te, nawmsakna te, thiltihtheihnate kan en nasa hle a. Kan rinna siamtu Isua en lo hian, savawm khuai la an sawi ang maiin, maimichhing chungin a thlum tha tha kan hui duak duak a. Duhamna rilru nen kan nitin nun kan hmang ral a. Chhun eng pawh pawi sa zo tawh lovinmahni hmasialna leh duhamnaten kan mit a tidel thin.
Pathian duhzawng titur erawh chuan Isua Krista kan thlir reng tur a ni. Amahah chuan kan innghat tur a ni. Mihring thutiam a hlawhchham thei aSum leh paite pawhin ral hun a nei thin. He lei ro leh ropuinate pawh hian bo hun leh chuai hun an nei thin. Isua Krista chauh hi boral lova, chatuana awmtur chu a ni. Chuvangin kan hmaa intlansiakna awmah hian chhel takin i tlan ang u.
Kan awmna ;leh kan dinna atang theuh hian Lalpa lam i hawi ang u. Khawvel kan en chuan sualna leh beidawnna kan hmu a. Mihring chak lo leh fel lokan hmu a, tlin lohna leh sualna kan inhmuh siak thin a ni. Lalpa lam kan en erawh chuan ngaihdamna leh beiseina nung kan hmu zel thin a ni.
4. Pathian min hmangaih anga hmangaih let ve : "Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni; tin, tunah tisaa ka nung hi rinnaa nung ka ni – Pathian Fapa, mi hmangaiha ka aia inpetu rinnaah chuan." (Galatia 2:20)
Kristian tam takte kan hlawhchhamna lian tak pakhat chu Pathian leh mi dangte hmangaihna kawngah hian a ni. Mahni hmasial tak leh duham tak kan awm fo thin a ni. Pathian chu kan thinlung zawng zawngin, kan chakna zawng zawngin kan hmangaih tur a ni. Keimahni kan inhmangaih angin kan vengte pawh kan hmangaih tur a ni.
Pathian duh zawng ti tur chuan amah nena len dun a ngai a, a hnena ro kan khawl khawm a ngai a, amah kan en reng a ngai a, a hmangaih anga hmangaih ve a ngai a ni.
Pathian min duhna anga vengte hmangaih a, rawngbawlna peng hrang hranga rawng kan bawl hi ringtten kan tihtur reng a ni. Pathian hnena thilpek pek thin pawh hi kan rawngbawlna a ni a, kan tihtur kan ti a ni. Min hmangaih avang hian thilpek tam tak min pe thin si a.
Pathian leh a thil siamte leh kan mihring pui ngeite hi kan hmangaih tak meuh em? Hmangaihna hi mi dangte thinlung hnehna tha ber a ni. Lalpan a thu malsawm rawh se, Amen.
No comments:
Post a Comment