Article 17.10.2010

PORNOGRAPHY AND SEX VIDEO : THE PRESENT SCENARIO

: Vanlalrema Vantawl & Laltlansangi Fanai

     Pornography leh Sex Video hi Mizoramah a mikhual lo hle a, bu a khuar nghet tawh hle a ni. Tun hmain ‘Mi hur bu’ tiin chhiar tur hmuh tur a awm fo va. 80’s chhoah Video Casette a rawn lar a, en theihin a awm leh a. Tunah phei chuan Information Technology a than nasat avangin Pornography pawh hi nasa takin a thang a, CD, pendrive leh Mobile phone hmangtein kan inpe chhwng zung zung thei ta a, hei vang hian a darh chak hle. Internet lamah pawh kum hnihkhat kalta lek atang khan pornology source chu duh tawka ngah theihnasite a tam ta. Pornography en chin hian mahni phak tawka sex video lo siam ve mai duhna a thlen thei a ni.

Christianity leh Pornography :

Pornography in Puitling a nghawng dante : Hmeichhiate hi inkhualtelemna atana hmanraw tha tak niin mihringah ngaihtuahna a siam thei a. Pornography hian mihring zahawmna a tibawrhbang a. A bik takin hmeichhiate hi thil, nunna nei lo, duhdan ang anga sawisak kual tur angin a lantir thin a ni. Mihring hlutna a tibo nasa hle. Sum leh hun khawhralna a ni a, ruihtheih thil ang bawka addict theih a ni. Ngaihtuahna leh awmdan, chetzia thlengin min hruai sual thei. Hmeichhia hlutna chu an taksa it awmnaah a innghat niin mihringah ngaihdan a siam thei. Uirena a tihluar bawk. Naupang kum tling lo khawih duhna a thlen a. Tharum thawha dan bawhchhiatna, pawngsualna leh pornography hi a inzawm nghet hle bawk.

Pornography in Naupang a nghawng dante : Naupan laia porn film/mi lem en thin hian Sex hman khawlohna leh kum tling lo a fa neihna a thlen fo thin. An taksa than rual hian an tisa chakna lam pawh hi a thang ve zel a, zirtirna tha leh dik hmuh leh hmuh loh hian Sex hman dik leh dik lohnaah thui tak a hril a ni. An Sexual Orientation atana zirtirna an dawn hian an thanlen chhoh hnua an ngaihdan nasa takin a kaihruai a. Naupan lai atanga hetiang lo en ching chuan mipat hmeichhiatna kawngah duh/kham khawp a hmu lo thei.

Mizoram Dinhmun : Pornography leh Sex Video chungchangah hian research tihtham mumal tak kan ngah lo hle. Sex Video hi engzat chiah nge awm tih finfiah a har hle. Mizo telna ngeia hriat hmuh theih ang ang 70 (Sawmsarih) lai lakkhawm a ni a. Commercial Sex Worker (KS) 36 hmaichhanah kawm a ni bawk. SHALOM chuan kum 2008-2009 khan Sex and Sexuality’ tih hmangin Baseline Survey mi 1813 hnen atangin zirchianna felfai tak an lo nei tawh a. ZALEN chanchinbu chuan August, 2004 khan ‘Internet-ah zahmawh a zalen’ tiin survey an lo nei tawh bawk. Changkanna kawng hrang hranga hmuh theih tur leh kan hmaa a inchhawp chhuah mek lai hian a that lohna lam leh inzirtirna kawngah erwh chuan kan hnufum hle tih a lang thei awm e.

HIV/AIDS case Mizoram-ah a pung nasa hle. January - July 2010 chhunga thisen enchhin 22,507 zingah 757 (3.43%) chuan HIV/AIDS an pai tih hmunhchhuah a ni a. Heng zinga 68.42% chu Sex atanga kai an ni. 1990-2010 chhunga thisen test 1,16,607 zinga 4,846 (4.15%) chu an positive bawk. HIV/AIDS case hi 1% aia a san chuan a tamna hmuna ngaih a ni a, tun dinhmunah chuan kan pel chiang hle.

Khaikhawmna leh Rawtna :

1) Mizo thalaite hi Sex-ah kan inthlahdah sawt hle niin a lang, anmahni bakah zirtirtute lam pawhin an pawm.

2) Sex Video a lan danah thenkhat hi chu hmeichhia tihmualpho tumna rawngkai ni theiin a lang a, fimkhur loh vanga putru a awm bawk.

3) Thalaite hian mumal takin Sex chungchangah hrilhhriatna an dawng lova, a tam berin information Media atangin Sex chungchang hi an hria a ni.

4) Sex chungchang hrilh hre tur hian thalaite hian an nu leh pate tha an ti/an ring ber a. Chutih laiin Kohhran lama inhmangte, lecturer-te chuan mithiam (Professionals) an ring zawk thung.

5) Nu leh pa tam zawk hian an fate hi Sex chungchang sawipui tha ti mah se an sawipui ngam lo.

6) Platform tha tak kan nei a, mhse kan chhawr tangkai tawk lo. Eg. School Curriculum te, Sunday School zirlaiah te etc inzirtir ni se la.

7) Thalaite leh tleirawl/rawlthar rualte tan Sex chungchangah zirtirna mumal kan tlachham hle a. Pathian thu behchhana inzirtirna leh zirtirtu tur kan mamawh hle.

8) Nu leh pa tan Kohhran hian Seminar/workshop buatsaih thin se. Mobile phone, computer leh internet etc, hman chungchangte pawh uar lehzualin inzirtir thin ni se.

9) HIV/AIDS case tam ta lutuk hi a ngaimawh awm hle a. Pornology-in a hrinchhuah zingah a telh loh theih lova. He natna do tur hian Kohhran hian tunlai thalai awmzia(reality) a hre tawk lovin a hriat a, hre tur pawhin a la hmin tawk lo niin a lang. Platform kan neih that ang huin thalaite rilru-a intuh tak tak turin Kohhran hian hmalakna a mamawh.

10) Nu leh pa pawh IT lamah hmasawn tum a tul. Computer dahna hi a ualau lai berah ni thei sela, tichuan sual rawngbawlnan hman a har deuh ang.

11) Pornography entute hi tupawh an ni thei a, anmahni ah pawh nghawng nasa tak a nei thei a ni. Mi hriat hlawh vak lo an ni thei a, Kohhran/khawtlang rawngbawltu an ni thei bawk.

(Mizoram Synod Social Front in dt.26.8.2010, a a buatsaih Seminar cum Workshop on Sex Video & Pornography Paper zir siamrem a chhuah chhawn a ni.)

Pathian thu atanga kaihhruaina kan dawnah chuan SEX hi nupa kara hman tura min pek, nupa nun tinghet tur leh inhmangaihna tipung tur, thianghlim taka hman tura duan a ni a. Pornography erawh chuan tisa chakna phuhruk hi kan dikna leh chanvo niin a lantir a. Inhmangaihna, inlaichinna leh sex hi thil thuhmun angin a lantir a, Kristian kaihhruaina nen chuan a inkalh a ni.