TU TE NGE ENTAWN TUR
: RC Vanlalhluna
Lalpa zanriah an sem pawhin a bula mi tihdan ang chiah chiah chuan a ti ve zel a.Inkhawm laia Pastor thusawi pawh engmah a hrethiam lo a, mahse a bula thu pa pakhat awmdan ang ang chuan a awm ve zel a. Nakinah chuan, Pastor chuan thupuan eng emaw hi a nei niin a hria a. Mipuite chuan kut an beng dur dur a,a bula thu chu a va en a, a kut a lo ben ve avang chuan a beng ve a. Pastor chuan thu engemaw a hriatthiam loh chu a sawi leh a, a bula mi chu a ding ta a. Missionary tlangval chu a ding ve thuai a. Chu veleh chuan mipuiho chu an phu mur mur a, an phun ta sep sep mai a. Tlangval chu a han hawi kual a, tumah an lo ding ve hauh lo mai tih a hmuh chuan a thu ta a.
Inkhawm ban chuan, Pastor chu kawngkhar bulah lo dingin inkhawmhote chu a lo chibai den den a. Missionary tlangval chuan a va chibai ve chuan Pastor chuan sap tawngin " Vala, Spanish tawng i thiam lo tiraw?" a ti a. Chu tlangval chuan, "Ka thiam lo tih a hriat theih em ni?" tiin a zawt let ve leh a. Chutah Pastor chuan, "Aw hriat e, thu ka puan khan Acosta chhungkuaah nau piang thar a awm a, naute pa chu lo ding chhuak turin ka sawm a ni," a ti ta a.
Pathian mi, mi ropui tak takte, mi hmingthang tak tak te tihdan entawn hi a that hle rualin, tute nge kan entawn tur tih te, eng chenin nge kan entawn ang tih te kan hriat a tul. Tirhkoh Paula pawh khan, "Mi zirtute ni rawh u, kei pawh Krista zirtu ka ni ang bawk hian "(1Kor 11:1) a ti a ni.Kan entawn tur leh kan nun innghahna ber tur chu Isua Krista a ni a, Amahah chauh kan innghah loh chuan mi zawng zawng an thut laiin kan lo ding bik hlauh palh ang e.
PATHIAN TAN I HLU A, I MAWI A NI
Thusawitupa chuan, "Vawiinah hian he dollar 20 hi in zinga mi pakhat hnenah ka pe dawn a ni. Mahse, thil pakhat ka tih phawt a ngai a," tiin chu pawisa note chu a hmer tawm a, a tham chuar vak a. "Tunge he dollar 20 hi duh le?" a han ti a, mipui chuan an ban an phar suau mai a.Tichuan, a pawisa hmer khawr hrep tawh hnu chu chhuatah a paih a, vutah chuan a pheikhawk keartui chuan a rap hrual nawk nawk a, a zawrin a bal ta hle mai a. "A nih leh, tunah he Dollar 20 hi tunge duh in awm em?" a han ti leh a. Mipui engemaw zah chuan kut an la phar fur mai a.
Thusawitupa chuan ti hian a ti ta a, "Unaute u, vawiinah hian thu pawimawh tak in zir thar a ni. He Dollar 20 note hi engtin pawh tihmelhemin tibal mah ila, a hlutna a bo miau loh avangin in duh a, in iai lo a ni, pawisa a la nih tho avangin. Dollar 20 note thar nen a hlutna a la inzah reng tih in hriat avangin. Kan nitin nunah pawh hian, kan duhthlanna hman sual avang te, kan thuthlukna diklo avangte, leh kan hun tawnin a zir loh avangte in kan nun a hlim lova, a hmelhem a, thlauhthlak leh rahbehin kan awm thin a ni thei e. Amaherawhchu engpawh thlengin eng anga hrualin awm thin mah ila, Pathian mithmuhah chuan kan hlu in kan mawi a ni. Kan fai emaw, kan fel lo emaw, kan zur emaw kan mam emaw pawh ni sela, Pathian mithmuhah chuan ang khat, a thilsiam hlu tak te, a en a, tha a tih em em a te kan ni. Sam 78 - ah pawh khan Pathian chuan ‘A mit naute angin min vawng’ tih kan hmuh kha. Chuvangin, kan thiltih that avanga hlu kan ni lova, Pathianin a bik taka a siam, mihringte kan nih avangin a mithmuhah kan hlu em em vek a ni. Pathian tan I hlu a, I mawi a ni tih hi theihnghilh ngai suh ang che." a ti a. —— Scott Quinn
Venezuela-a missionary tura lak thar sap tlangval pakhat hi a awm a. An hnam tawng a la thiam lo hle a, thil kalphung hriatthiam loh a la ngah hle a.Vawikhat chu kohhran pakhat hi tlawh a tum a, a kawng a bo hlauh mai a. engtin tin emaw chuan Biak In chu a va thleng ve hlawl mai a. Amaherawhchu, inkhawm chu an lo tan tawh avangin mipui an lo khat hmur tawh mai a. Thutna awl awmchhun, tlar hmasa ber chu a pan chawt a.Tawng te a la hriatchian loh avangin, mite nuihzat a hlawh hlauvin a bul hnaia thu pa pakhat tihdan ang apianga tih a that mai a ring ta a. A bula mi chu a zai leh a zai a, tawngtai tura a din leh a ding ve a, a thut leh a thu ve zel a.
No comments:
Post a Comment