Sermon (29.08.2010)

‘Chanchintha Hril’


- Ramherliani

(Mat. 16: 13-19)



Kohhran hna pui ber chu ‘Chanchin tha hril a, khawvel tihen’ a ni. Chu mawhphurhna leh thu neihna chu Lal Isuan a Kohhran hnenah a hlan a ni.

Kum 1972 Synod inkhawmpuiin a rel angin, August 31 hi ‘Ramthar Ni’ atan hman thin a ni a. Kuminah pawh a vawi 38-na kan lo thleng leh dawn ta. He ni hi nilenga Kohhran inkhawm emaw zan hun emaw chauh pawh ni se, Kohhran hoten rawngbawlna zau zawk atana kan rilru kan siamthar lehna hun atan hmang thei ila a duhawm hle ang.

Tunlai Khawvel buaina leh harsatna hrang hrang karah, mahni Sakhua humhalh leh thehdarh tumin sakhaw hrang hrang leh sawrkarte pawhin tan nasa takin an la a. Sapho leh hnam dang tana rawngbawl a harsat mek lain, keini Mizote tana chi leh vun rawng, hmel avangte a harsatna em em awm loin rawng kan la bawl thei a. Pathian malsawmna zarah rawngbawlna chanchin ngaihnawm tak tak hriattur kan la nei thei zel zawk a ni.

Tunah hian kan Kohhran (Synod Mission Board) chuan hmasawn zelin, Mission Field 16 kan nei tawhin, Pathian tana mi inpe pawh an pung zel a. Hetiang hi thawktu dinhmun a ni:

1. Missionary (SMB) : 605
2. Field Worker (Native) : 621
3. Contract/Short Term Missionary : 485
4. Headquarters/Office, Trainees, etc : 47

Mission Field kan neih mekah hian thawktute thawhrimna leh Kohhranhote thahnemngaihna Pathianin mal a sawm zel a. Kohhran din leh a ram mite chher kawngah pawh hlawhtling hle a. Kumin chhungin, June 2010 thleng khan, ringthar mi 3629 Pathianin min pe a. Kohhran-ah pwh hmasawn zelin hetiang hi kan dinhmun chu a ni:

1. Presbytery - 5
2. Pastor Bial - 92
3. Kohhran - 341
4. Preaching Station - 411
5. Kohhran Member - 81,763

Tin, heng bakah hian Kohran pawl dang engemaw zat an la awm bawk a. Mahse heti chung hian Lal Isua la hre lo, thima thu mi nuai tam tak an la awm reng bawk a, thawh tur a la tam hle. Mother Teressa in a rawngbawlna a tehkhinna, “ Tuifinriat tui tam tak zinga tui mal far khat ang,” a tih kha kan la ni tho mai.

Tin, sakhaw dangte lo harh chhuak chho ve in , an sakhaw humhalh leh thehdarh tumin tan an la nasa ve em em bawk a. Chanchintha hril a, thima thute enna pe tur leh Lal Isua Krista lalna rama siam tur hian tun aia nasaa kan tan lehzual hi a ngai hle a ni. Hun tha leh hun remchang hi kan bawhpelh mai ang tih a hlauhawm.

Lal Isuan, Khawvel zawng zawngah kal a, chanchintha hril turin thu min pe a. Hna a tamin kan thawh thuai thuai hi a ngai a ni. A tlansa, thim hnuaia la thu mekte hi hmangaihtu Pathian tan chuan eng ang taka chanchhuah tul leh hmanhmawh thlak ni ang maw?

Kohhran hnapui ber chu ‘Chanchinth hril’ a ni a. Lal Isuan mawhphurhna a hlan a ni. Chuvangin Kohhran hian hlim emaw, bungraw changkang leh tha te, Biak In ropui leh mawite aiin chanchintha puandarh hi a ngai pawimawh ber tur a ni. Chanchintha puandarh a hlamchhiah a, hnapui bera a neih loh chuan a din chhan a hai a ni a, insiamthat a ngai tihna a ni. Member kan tlem emaw tam emaw, kan retheih emaw hausak emaw avanga thawk a thawk lo tur kan ni lo va. Lal Isua thupek leh a dinchhan a nih avang zawkin hnapui berah a neih a tul a ni.

He hna hi Pathianin tumah dang hnenah a hlan lova. Kristian, Amah ringtu tupawh, a lian a te, fing leh mawl pawh, rethei leh hausa, tupawh a ruatin kan mawhphurhnaah a nghat a ni. Pathianin thim ti-engtu atana a ruat Isua Krista hna chu a taksa, Kohhranho, Pathian chhungte mawhphurhna leh hnapui ber a ni.

Johana 3:16, “Pathianin khawvel a hmangih em em a, chutichuan a fapa mal neih chhun a pe a,” tih te, I Kor. 9:16-ah Paula chuan, “Chanchintha hril mah ila, chhuantur reng ka nei si lo, tihmakmawh ka chungah a innghat a ni si a; Chanchintha hril suh ila ka chung a pik dawn si a.” tih kan hmu a. Hetiang tak hian kan Pathian chuan chanchintha puandarh a, khawvel tihen a ngai pawimawh a ni. Keini ringtute, vawiina Kohhranhote, Kristian Thalai Pawl member-te hian eng hi nge kan ngaih pawimawh a? Khawilam nge kan hawi le?

He chanchintha puandarh hna thawk tur hian kan zain mawhphurhna kan nei theuh a. Kan theih tawk theuh a kan thawh hi Pathian duhzawng a ni a. Chuavangin theihtawp chhuaha hma lam pan chung zelin tan ila thar ang u. Chutiang taka kan thawh theihnan Pathianin malsawm rawh se. Amen