Sermon (22.08.2010)

Tiamchin lam pana tlan/thlen chin atanga hmasawn

Hebrai - 12:1,2, Phillipi 3:14

-P.C Lalrintluanga

         Thalai ringtute tana goal pawimawh ber chu Vanram hi a ni a. Vanram chang tur chuan he khawvelah thalaite, keimahni theuh hi eng dinhmunah nge kan din tih kan in en a tul hle mai. Vanram chang tur hian engangin nge rawng ka bawl ve a, engtia nasa in nge Pathian tan ka inserh hran ve le? Thianten min hriatpui tam lova, Pathian engkim hretu erawh chuan min hriatsak vek a, keimahni leh keimahni kan inhre chiang viau bawk awm e.
         Mizo ringtu intite zingah hian ‘I piangthar tawh em?’ tiin inzawt ila, Piangthar tawh inti vek kan ni hial ang. Mahse piangthar kan intih ve ngawt hi a tawk lova, Tirhkoh Paula’n “Nung turin nitin ka thi thin” a tih ang khan, chatuan nunna chang turin nitin sual kalsanin Pathian tana kan nun a tul ta takzet a ni. Piangthar han intih mai hi chu a awlsam viau va, mahse, Krista hnung zui turin sual leh kan duh zawng thihsan erawh a harsa hle mai. Isua ka ring kan tih mai rual hian, a hnungzuia inserhhranna tak tak erawh kan nei ngam lo fo. Hetiang mai a ringtu kan nih chuan Piangthar kan inti ngam dawn em ni le!
         Mihring kan nih chhung hian kawng hnih duhthlan tur kan nei a, “Chatuan nunna kawng leh Chatuana boralna kawng a ni.” Kan zawh zawk lam kawng chu kan inhre vek awm e. Eng dinhmunah nge kan din ve le? Pathian min dinchhan hi amah faka, amah chawimawi tur kan nih mek lai hian. Lal Isua Krista chawimawi lova, mahni duhdan leh châk zawng zawnga tlan mai mai kan va tam tehlul em! Kan unaute, kan memberpui suala tlu mekte chhanchhuak tur hian mawh kan phur a ni. Kuminah KTP kumpuan “Member hlate hnuhhnaih” kan kalpui mek hi tute thawh turah nge kan ngaih. hruaitute chauh em ni? Member zawng zawngte mawh a ni. An tan kan tha leh zung hun seng thei lo mah ila, kan nunin Pathian thu an hmuhah kan hril thei a ni. Member hlate hmuh leh benghriatah ringtute nun nawmzia leh mawizia hi awhawm khawpin kan nunin tarlang zel ang u.
KTP thiltum hmang hian tlem azawng in umzui teh ang.
1) Isua Krista rinna leh anna kawnga Thalai te hruai : Sualin a hman tangkai mek nge ka nih a, Lal Isua Krista tana pasal tha le? Lal Isua Krista hnen thleng pha hauh lo hruaitu /chanvo nei ka ni em? He lei kohhrana chanvo bel chawp mai nge kan nih Lal Isua hriatpui le? Lal Isua hmangaihna tak tak nena rawngbawla, midangte hruai thintu kan ni em? Thinlung tak tak a kan member-te Krista rinna leh anna kawnga kaihhruaitu leh kawhhhmuhtu kan zavaia kan nih thar a tul leh zual hle a ni.
2) Thalaite Kohhran kut leh ke ni tura buatsaih : Hruaitute mawh veka dah mai awl tak anih rualin, member kan nih phat atang hian Kohhran kutke ni tura kan inzira kan inbuatsaih hi kan tih tur a ni. Member naupang zawkte kaihhruai chu Hruaitute mawh a ni, pawh kan ti thei awm e. Kohhran kut ke, ban pawimawh ni chho zel tur hian a bul tan that a tul a, chuvangin KTP member naupang zawk te pawhin hei hi kan hriat atan leh kan zir atan a tha hle mai.
Chanvo hrang hrang inbelin kan kal ve mek a, heng chanvoah hian te bik leh ropui bik a awm hauh lova, kan nihna theuh hi Pathian min ruat a ni tih hre thar ila, kan dinna theuh atang hian Kohhran kutke pawimawh tak ni turin ke i pen theuh ang u.
3) Kohhran hnathawh tihpuitlin : Thalaite tan lak kan ngai hle mai, kan Kohhran ngei pawhin hna kan ngah hle mai a, kan remchan hun leh theih hun hun a thawh chhuah hi kan mawh a ni. Thalai chak zawk kan ni a. Kan chakna te midangte tana hnawksak ah chang lo sela, midangte tana tangkai zawk a hman thiam zir a tul hle mai. Kohhran hna leh tul hrang hrang khawih thei tur atana hmantlaka kan inchher a tul tak meuh meuh bawk a ni.
       Mahse, tangkai taka thawk thin ten, thawk ve hman lo leh thawk thei lo te hmai kan hmuh mawk bik erawh a ringtu zia bik hauh lovang, kan inzir tlan a tul hle.
4) Krista Chanchintha puandarh : Lalpa tana hun pum pe in, kan Branch atangin Nula lam an han chhuak khap khap a. Thalai mipa lam pawhin helam kan hawi hi a pawimawh awm e. He kan awmhmunah ngawt hi chuan tluk chang te, chauh changte a awm hma bik niin a lang fo, chuvang chuan hun puma Lalpa tana inpek hi a pawimawh hle a ni. Hetianga pen chhuak tur hian member-te kan inpuahchan thar a tul hle a ni.
           Hebrai 4:12 ah “Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruh tuah leh thling phel hrang khawp hialin a chhun thei a, thinlunga ngaihtuahna leh tumte hi a hre nghal thei a ni” tiin min kawhhmuh a. Chu Pathian thu nung ngei mai chu kan nunah hian engtin nge a nun ve le? Miten kan nun chhe lai leh dik lo hlir, zirtur awm hauh lo hlir hi em ni kan pho lan? Kan chhehvela mi hlate leh ring lo mite hmuhah ennawm ringtu nun i pho lang thin ang u.
         Tin, Phil. 2:3 “Mitinin inngaitlawm takin mahni aiin mi dang tha zawkah ruat theuh rawh se”. Keini aia sual leh tling lo te sualna hmuh sak fo thin lam aiin kan tlin lohna hmuh ve theih a hun ta hle mai. Mite tana tha tak tak au puia zawm bik si lo te kan awm fo thin. Hei hian impumkhatna leh thawhhona tha aiin inkar kak a siam tlat thin. Chuvangin, Thalai, Kohhran thleng pawhin, mahni chanlam dah vawng lovin, midangte tan iti ngam ang u.
         A tawp berah chuan, tuna kan dinhmun mek atang hian engtin nge hma kan sawn theuh theih ang. Branch hruaitu, Group hruaitu, Kohhran Zaipawl, Bial Zaipawl member te kan ni a. He kan dinhmun mek atang hian engemaw kawng tala member-te hmasawn theuh turin kan insawm a. Tin, ringtu kan nihna kawngah hian kan tiamchin lampan tur hian khawvel ropuina leh min tibuai theitu zawng zawngte paihthla in Lal Isua Krista tan inpe tharin, kan thlen chin atanga hmasawn zel turin i inbuatsaih sauh sauh ang u.