Sermon

Fuihna Thu A? Engnge Kan Sawi Tak Ang Le?

- Lalremruata Ralte,

Leader, Branch KTP

.

"Engnge kan sawi tak ang le, Khawngaihna chu a pun lehzual theihnan sualin kan awm reng dawn em ni" (Rom 6:1)

     Kum a thar a, taksa a upa sawt a, rilru lam hmasawnna erawh puak chhuah a har hle a. Thinlung lam chuan hmasawn ngaihna lai a dap hmu zung zung a, taksaa umzui erawh a harsat dan a ngai reng si a. Calendar-in hun bi thar min chuankaipui hi taksa sana chuan ‘thil thar’ angin a hre ve mang lova, a upat belh sawt tih chauh a lo ni thin. Amah Lal Isua bawkin a hre chiang a niang e, "....thlarau zawngin a peih a, tisa erawh chu a chak lo a ni"(Mat. 26:41) tiin a lo sawi diam mai.

Hetiang hunah hian kan chanchinbu enkawltuten fuihna thu min beisei chu a nia le! A harsa thin mange!

     Thil tha leh tihtur tha, awmdan mawi zawk leh kan tih awm te, hruaitu nih awmzia leh tlawmngaihnain a ken tel tam tak te hi inhrilh nawn tu mah kan ngai lo va, peih lohna avang te, tul dang kan ngah thin em avang te, midang rin nuam kan tih zawk vang te, thawh chhuah aia mahni leh mahni inthiam chawp chunga awl te hi a nawm zawk thin avang te hian ‘chak lo’ nih kan hlawh mai thin a lo ni zawk. Ngaihtuahna seng chiam lova pen khat lek pen belhin kan tihtur hlen mai tur kan nih lai hian kan rilruin kan ching let ta chiam thin emaw ni - tihtur tul dang leh taksa nawmsam loh deuh te chu a langsar zawk duh hle mai thin zawng a ni. Tu mah hi kan bang chuang lo ve! Kan hriat hnu vek a nih lai hian infuih thar kan lo ngai reng a, he thu ziaktu ngei pawh hian midang aiin a mamawh lo chuang lo mai ni lovin, a mamawh zaw ber awm asin!

     1. Chanvo tihhlawhtlin chauh a tawk lo : Nem takin bul kan tan a, na takin intur hmasa si teh ang. Rawngbawltu tan mahni ko-a chanvo tla chu phurh zawh tum hram tur a nih laiin, kan ko-a chanvo tla chauha duh tawk ta mai hi kohhranah leh a hnuaia Sub-Committee hrang hrangah kan awm ta fo niin a hriat theih a, KTP-ah pawh kan bang hauh lo mai.

     Branch KTP hnuaiah pawh Group leh Sub-Committee hrang hrangah kan tel leh thliah ang. Chungah chuan kan telna leh mawhphurhna san bikna lai chu a awm ngei a, ngaih pawimawh hmasaka kan neih pawh a dik ang. Nimahsela, kohhran inkhawm leh programme dang te, Branch KTP-in activity dang tam tak a neihte laka ralban phah nan chuan hman hauh tur a ni ngai lo ve - hei hi a bikin Branch leh Group Committee chin phei chuan hriat hram hram i tum tlang ang u. Committee-in hmalakna tur a chhawp tihhlawhtlin kawngah chuan kan zavaiin mawh kan phur tlang vek thin anih kha. Tlai deuh bik thin pawl nih reng mai te, thian kawp bikte nena hnufual deuh leh a inbawl hrang deuha khawsak te hi hruaitu nihna tihhlawhtlin dan letling zawk a ni tih hriat nawn kan mamawh ta niin a lang.

     2. I sulhnu hnutchhiah chiah hi i naute leh i faten an la rawn zui dawn : He thupui hi chhiar nawn leh la, ngaihtuah nawn leh teh. Mahni infuihthar nana ngaihtuah tul tak, engtik lai pawha pawimawh, eng hnam tan pawha dik, mihring zawng zawng kalphung atana Pathian remruat a nia sin! Sawi zui tam pawh a ngai lo ve, a kawh tum chu a chiang nghal em em mai. Mi inpe chuan entawn tur a hnutchhiah tam a, mi dawngdah chuan hnungzuitu tlak a hnutchhiah lo mai ni lovin, a hnungzuitu tur thlah sawi tur a nei lo fo zawk thin. Tuna kan rawngbawl dan hi kan naute leh fate rawn entawn atana tha tawkah kan ngai em le? Kan tih ang chiah hian rawn chhunzawm ta se kan lawm ang nge kan duhkhawp lovang? Tuna rawngbawlna ka kalpui dan hi kan kohhran leh Branch KTP kal zel dan tur atan tha ka ti tawk em? Inenfiahna tur a tam hle mai! I tih, i sawi, i ngaihtuah dan phung kha i fate kalphung rawn zui tur a lo ni e.

     3. Kalvari-a inpe kha i tana inpe a ni : Kalvari Kraws-a thih thlenga tuarsaktu che Isua kha i rawngbawl hna hmangin i chhang let thei a, a tana i inpek theihna kawng tam tak zinga langsar leh pawimawh ber chu kohhran leh KTP kaltlanga a rawng i bawlsak danah a innghat. Rawngbawl hnaa peih loh leh chhuanlam ngah viau te hian an thinlung khawih tak Thlarau pawlna leh lawmna thar an dawng khat khawp asin! A thawk tam tam hian lawmna an chhar tam a, an kalsan tak tul dang tam tak kha an aiawha thi khan a lo chinfelsak tam zawk daih zel zuk nia.

     Rulh zawh sen chi emaw thiltih hmanga kan chatuan nunna chu sual chhuah lam zawng kan sawi lo ve, kan rul zo ngai lovanga, kan chhandamna sual chhuah ve lah a tina tin chhin chi a ni hek lo. Kan Bible chang thlana Tirhkoh Paul-a sawi ang deuhin khawngaihna tawp thei lo hian sual eng pawh a ngaidam thei a, sual leh thin mahse sim apianga lo ngaidam leh thin tur khawpa khawngaihna nasa a ni. Nimahsela chu chuan khawngaihna leh ngaihdamna a awm zel theih nana sual zual zel lam chu a kawk lovang. Hmangaihna chhan let dan tur a ni dawn em ni? I hmangaih chuan hnar zel che sela engtianga na nge i tawrh ang? I tana inpe chu dawngdah takin a rawng i bawlsak dawn em ni?

     I nu leh pa leh i unauten an ngaidam lehin an khawngaih leh dawn tho che tih hriain i sual chhunzawm zel dawn em ni? Nge ni dawn a, an hmangaihna che chhang let turin chhungkaw tan theihtawp i chhuah ve tawh dawn? Lungngaia lawm thin thinlung nei Pa Pathian, kan aiawha inpe zo vek Fapa Isua leh englai pawha min pui tura inring reng Thlarau Thianghlim tan hian inpekna thar nen he kum thar hi i hmachhawn tlang ang u.