Hun Ruatna (26.09.10)

S.S Tantu : Pi Lalfakawmi

KOHHRAN

Vawiin Pathianni (26.09.2010)

Zirtur : "Juda-te leh Jerusalem chunga Pathian rorel"

Tantu : Pi PC Lalrinliani

Thupui :"Inneihna hi damchhung thil a ni"

Sawitu : Pu Lalhmuaka

Thupui : "Nupa Inthen pawi zia"

Zan

Thusawitu : Upa H.Roenga

Inrinni (02.10.2010)
Tantu : Pu K Lalchhanhima
Thusawitu : Pi Lalkhumtiri

S.S Tantu : Pi Lalsawiveli

Zirtur : "Grape huan hla leh Israel-te sualna"

Chawhnu

Tantu : Pu PC Lalrinenga

Thusawitu : Pu Laldawla

Thusawitu : Pu A Chalthuama

Zan

October thla chanvo neite :Chairman : Upa Vanlallawma
Zai hruaitu turte (Ni 1-15) :
1) Pu Ralkapthanga
2) Pu Samuel Lalzarmawia

Beihrual Programme

27.9.10(Thawhtanni)

28.9.10(Thawhlehni)

Tantu : Tv Vanlalzuata Hnamte

Thupui : "Chhungkaw inlaichinna tha"

Hawngtu: Pi Thanghlupuii

29.9.10(Nilaini)

Tantu : Nl Laltlanthangi

Thupui : "Hnamdangte nena inlaichinna tha"

Hawngtu: Pu Vanlalnghaka

30.9.10 (Ningani)

Tantu : Nl Helen Vanlalruati

BEIHRUAL KHARNA - RILRU SAWI

Tantu : Tv Lalremsiama

Thupui : "Kristian chhungkua leh hnathawh"

Hawngtu: Pu PC Zoramliana

Pathianni (03.10.2010)

Sept.Pathian Ram ip

September Pathian Ram Ip

Pathian Ram    :
Ramthar          :
Tualchhung     :
Biak Insakna   :
Chawmna       :
Krismas          :
Buh tham       :
Total             : ` 65,830 /-` 44,860 /-` 35,570 /-` 1,59,180 /-` 21,000 /-` 6260 /-` 18620 /-` 345060 /- ` (+) 1,02,808/-Ip lut zat         : 165/205 (80.48%)

August khumna/phak lohna (+/-)

1) Ip lut    : (+)3

2) Pawisa :

Editorial (26.09.10)

      Zoram pumah Presbyterian Kohhran mai bakah Kohhran hrang hrangten Beihrual kan hman mek chu a hmawr kan bawk hnai ta hle mai. Kum kal tawhte leh kumina kan thupui zir mek te han thlir pawh hian Zoram-a Kohhran lian ber Beihrual thupui leh thu ken te hian Zoram mipuite, rinna kawngah te, kan nitin nunah hmasawnna min chhawpchhuah sak thin hle. Zoram mipui nun leh sukthlek her danglam tir bawih theitu a lo ni thin reng a ni.

      Kumin-ah pawh Chanchintha hril tura Isuan thu min pek avanga hril ngei tur kan nihna atangin, hril dan hrang hrang, ringtu zawng zawng ten kan awmhmuna a tanga kan hmasawnna tur thlenga zirin, Pathian thlarau pawlna leh a puihna hi kan hmachhuan ber tur a nih laiin mawlmang lutuka rawngbawl erawh ring lo mite karah chuan a him lova, kan kristianna hum thei tura ringlo mithiam tak tak te cho phaka kan thiam ve a tul thu te, chumi thiamna ka puakchhuah ngei theihna tura atan zirna kan tih hmasawn dan tur thlengin.

      Tin, Kristian chhungkaw hapta-ah lah, Chhungkaw pawimawhna hrang hrang leh inneih sawngbawl dan leh Kawppui zawn thlengin kan haidarh tlang a,Khawtlang a lo thianghlima Kohhran a lo ngelngheh deuh deuh theih nan chhungkua a bul tan a tul thu te nen, Kohhran ho, a te ber atanga lian ber, hausa ber leh rethei ber, Zawnglai te leh kawppui nei tawh te tan pawha tangkai hmasawnna tur hlir kan zir mek hian kan Kohhran -ah hian awmzia nei ve ngei se tih hi zirtu zawng zawng ten kan tawngtaina ni thei se...

Article (26.09.10)

INCHEINA HI

: C. Lalhmingmawii

      ‘Incheina’ han tih hian thenkhat chuan kan ngaihven nghal viau mai thei e. Tunlai khawvelah incheina hian mihring nun hi a luah hneh ta em em mai hi chu a chang chuan a buaithlak deuh thin chu a ni. Hmeichhe ho phei hi chu kan buai zual a, programme eng emaw hlek a awm dawn te hian inchei dan tur rilruah a lo lang hmasa thin. ‘Engtin nge ka perform ang?’ tih lam ai chuan ‘Engtin nge ka inchei ang aw?’ ti hmasa thin hi atam zawk kan ni mai thei. Engpawh ni sela kan incheina hian engmaw chenah kan nun a kaihruai thin tih hi chu hriat reng a pawimawh khawp mai.

        ‘Chhungril nun mawi hi kan incheina tur dik tak chu a ni’ an ti fo thin a. A dik ka ti khawp mai. Chhungril nun mawi chu a hai thei loh reng reng. ‘Mitmeng in dawt a sawi ngai lo’ an ti thin a, mi rilru tha chu an mitmengah kan thla a muang nghal thin. Tunlai hian mahni nihna lo ang taka inchei ching a bikin hmeichhiate zingah kan awm ta zauh zauh mai hi pawi ka ti! Hmeichhe thenkhat chu nu hmel tak a inchei, a ruka lo intipa tlat an awm thin tih thian thenkhatte hnen atangin ka hria a, a pawi ka ti ngawt mai! Two wheeler kan uar em em tak hnu phei hi chuan a hluar lehzual ni awm tak a ni. Incheina hmanga midangte bum chu Pathian huat zawng tak a nih a rinawm. Hmeichhia nih chuan hmeichhe rilru dik tak pu chunga inchei thin hi Siamtu chawimawina pakhat a nih ka ring a. Tin, mipa lam pawh mipa inchei dan tur pangngai ang a inchei mai kha a tawk em em a, a zahawm a ni.

        Tunlai khawvelah incheina hian min chiah hneh ta lutuk deuh em aw ka ti thin. Saruaka awm tur tihna lam chu a ni lova. Amaherawh chu nalh loh hi kan hlau ta lutuk deuh lo maw. Mi thenkhatte thiam taka a inhmeh lai tur zawng zawng inmil thlap a an han inchei hi chu hmuh an nuam thin ngawt mai. Nitin matching thlap thlapa inchei ziah tur chuan a hautak khawp ang a, mahse mi tam zawk te hi chuan kan tum tlat bawk si. A chang phei chuan sum neihin a daih lova a ba ten kan la leh mai bawk a. Tin, bat tur lah a lo awm ve leh zel bawk nen. A duh special zualte phei chuan sum siamna awlsam leh hlawk zawkte an ngaihtuah phah ta mai thin erawh hi chu a pawi ta deuh a ni. Thawh chhuahin a daih tawh miau si lova, mawi duh vangin Pathian pawi sawite pawh an lo awm phah ta hial a ni! Chantawk a lungawi a van tul tak em. Lalpan min dahna theuh hi kan tan a tha a ni tih hi chhut chian a van pawimawh em.

      Midangte ngaihsak chunga inchei thiam hi a pawimawh hle in ka hre ve a. Neih em vanga englai pawha nalh reng mai hi chuan kan bula awm nalh ve reng thei lo te rilru a hliam thei a ni tih hre reng chungin a hun leh hmun kan thliar thiam a pawimawh khawp mai. Missonary-te pawh an awmna rama mite inchei dan anga an inchei chuan a dan a dang sawt thin ang deuh hian keini ringtu / rawngbawltute pawh hian kan thian dangte milpui deuhva kan inchei thin a tha ngawtin ka ring. Kohhran leh thalai a inhmang ve chak tak takte kan lo ti inthlahrung palh a nih chuan a pawi dawn em mai.

      Aw le, keini vengah hi chuan buaipui ngai khawp leh sawizui rauh rauh tur khawp a inchei chu kan awm pawh ka hre ngai chiah lova. Amaherawh chu tun atanga kan in en erawh chu a tulin ka hria. Mizo kan ni a Christian kan ni bawk si. Engpawhnisela, chantawka lungawi thiam hi pawimawh ka ti a., Tin, mi dang teh chunga rawngbawl lovin. A rawng kan bawl Isua en chungin engkim ti thin ila, chu chu kan incheina mawi tak alo ni ngei ang. ‘Lal Isua nen engkim a ropui’ kan ti thin a ni lawm ni? Amah en chungin kan nitin hun hmang ila tichuan engkim a lo fel mai dawn a ni..

Sermon (26.09.10)

CHHUNGKUAA LALPA TIH- HNAM DAMNA

(Josua 24:14-15, II Tim. 1:3-5)

: Upa H.Roenga

     Mizoram hi Kristian Ram kan inti a. Kan vantlang nih hona pawh kan ti Kristian thiam viau mai. Pawl tin hian Committee leh tihho pawimawh kan neihin, a bul tan nan Pathian hnenah kan inkawltir thin. A tha khawp mai. Pathianniah mahni hnathawh chawlhsanin Biak In lam kan pan sung sung a, a mawiin a ropuii hle. Mahse Chhungkaw tin hi han inbih chiang ila, chhungkaw tha chu kan lo ni vek si lo. Chhungkaw suala insawi chu tuman kan duh bawk si lo. Kristian chhungkaw tha chu ni vek ila, kan vantlang leh hnam dam lohna hi kiang deuh duak awm tak le ! Mahse a ni si lo.

        Chhungkuaa Kristiana inpek hi chu a sam khawp mai; Kristian Chhungkua tak erawh kan ni vek si lo. Pathian rawngbawltu chhungkua te hi chu that deuh awl bik awm takin a ngaih theih, chu pawh chu a ni thei chiah bawk si lo. Kristian Chhungkaw chungchang hi kan zir tam viau va, zir zawh sen leh zir hriata tawk mai a lo ni bawk si lo.

        1. CHHUNGKAW THA CHUAN PATHIAN AN TIH:Josua chuan chhungkaw pa ber a nihna dinhmun luah zovin, "Kei leh ka chhungte erawh chuan Lalpa rawng a nia kan bawl dawn ni" tiin a puang thei a.Chhungkaw nih dan tur kha a puangtu tur pawh a ni reng a ni. (Jos. 24:15)

Davida chuan, "Ka in chhungah thinlung tha famkim puin ka awm ang a, thil tha lo reng reng ka mit hmuhah ka dah lo vang" a ti (Sam 101:2-3). A duh vang ni hauh lovin an chhungkuaah thil tha lo tak tak a thleng thin ve tho mai; mahse Pathian hnenah a tlu lut zel a. Ama theihna rinchhan lovin, Pathian a rinchhan tlat zel thin.

       Abrahama chu koh a nihin, a thlen tur a hria a. A kalkawng erawh a hre bik lo. A kotu a ringhlel lo va, a kal mai a ni.

       Keini pawh Pathian chhungte (Kristian chhungkua) ni tura Lalpan min kohvin, min kotu kan hria a, kan thlen chin tur Vanram kan hria a. Kan kalkawng tur chu kan hre lawk lo. Chhungkuaah harsatna awm thei hre lawk lo mah ila, Lalpa kuta kan inpek luh ngam phawt chuan kan chhungkua Lalpan min hruai ang.

      Beidawnnain min hneh mai tur a ni lo.Kohhrana Hmeichiate leh Kohhranpui hmalaknain kum 40 lai Kristian chhungkaw thu hi kan zir tawh; vawiin thleng hian kan beisei angin a sawtna kan hmu lo mai thei. A sawt chin chu a awm ngei ang. Mizote zinga hmeichhe lam hmasawnna heti taka a thang chak pawh hi Lalpa lawm zawng hna an thawh avangin Pathianin hmeichhiate chungah malsawmna a thlen niin ka ring thin.

Heng zawhnate atang hian mahni chhungkua theuh i inen fiah dawn teh ang le!

 (1) Kan chhungkua kan hlim tlang em ?

(2) Kan ina thutna nuam tak te aiin hmun dang nuam lo zawka thu tam zawk kan chhungkuaah an awm em?

(3) Kan ina ei tur tha leh tui zawk ei aiin, chaw ei mumal lova hmun danga awm thin kan chhungkuaah kan awm em?

(4) Mutna kan nei nuam sawt hle laiin kan mut a tui ta sawt em?

Unaute inngeih dial diala awm khawm hi a va hlu-in a va nuam em! (Sam 133:1)

      2. CHHUNGKAW THA BELH KHAWM- HNAM DAMNA

Kan Mizo hnam dam nan leh din chhuah nan kawng hrang hrangin tan ka la thin hi a tha e. British Sorkarin kum 1875-a ILR/ILP min lo siam sak te hi hman thiam chuan a tha e. Politics atangin thenkhatin tan an la a; thenkhatin Economics lam atangin; thenkhatin hlemhletna dozawngin; Ruih theih thil chi hrang hrang do zawngin thenkhatin tan an la- a tha vek mai. Mahse kan hnam hi a dam chuang si lo. Hmeichhe awmkhawlo (KS) thenkhatte hi chu chenna tur pawh nei lo, hawna tur mumal nei lo te niin an sawi- rilru a na ngawt mai ! Mipat-Hmeichhiatna (sex) hman duhdah vangin HIV/AIDS a pung chak tihte hian rilru a ti na. He kan hnam hi a dam lo a ni. Heng kan hnam dam lohna chi hrang hrang – ruihhlo vanga tawrhna te, sex hman dik lovin a nghawng tha lo tak tak te, rukruk te, tual thah te, mahni intihhlum, adt hi amah tak luh chilh zawnga tihreh tum te hi a tha tho ve.

      Ngaihdan ka neih ve reng thin chu- Chhungkaw tinte hian kan chhungkaw nun hneh khawpin Lalpa tihna (Chanchin Tha ) hi kan in chhung khurah kan lakluh tak tak loh chuan kan hnam hi a dam lovang tih ka ring thin.

       Biak Ina inkhawm fo thin siin, Pathian hnena thilpek pe reng tho siin, Buhfai tham tham reng tho siin Kristian Chhungkaw tha kan ni thei chuang si lo. Chhungkaw member tin hi Krista Lalnain min thunun se, Chhungkaw tinah Krista Lalber zel se. Paulan, "In awm dan chu Krsta Chanchin Tha nen inmawi phawt rawh se" a tih hi kan nun dan phung a nih hunah kan hnam damna a lo thleng ang. Kan vantlang nuna thil tha lo kan sawi kan swi a, kan nin em em te hi amah dova beih hi a sawtna chin chu a awm ve bawk ang. Kan hnam hi Chanchin Thain a zawn chhuah a, a tun dina a chenchilh a nih avang hian Chanchin Tha (Lalpa tihna) avang lo chuan a dam tak tak lovang. Chhungkaw tin hi Krista lalna chhungkua kan lo nih a, Member tinte Krista chanchin Tha nen inrema a kal dik hunah chuan Politics a kal dik ang a, kan society a kal dik ang a; jail awm a ngai tawh lo vang a, Police Department hna a tlem sawt ang a; VDP awm a ngai lo vang a, YMA hna a hahdam sawt tawh ang. Kristian chhungkaw tha ni vek ila MLTP Act a awm a tul lovang a; Sorkar sum hi ram tana hna tha atan hman vek a lo ni ang a. Kan hnam hi a lo dam tawh ang a. Mizoram hi Krista Lalna ram a lo ni tawh ang a; a va nuam dawn em!

  

Hun Ruatna (19.09.2010)

KOHHRAN

Vawiin Pathianni (19.09.2010)

 

S.S Tantu : Pi Lalchuailovi

Zirtur : “Kumkhua-a inremna leh Lalpa Ni”

ChawhnuTantu : Pi Laltlanhlui

Thupui : “Taimak hi hlawhtlinna bul a ni”

Sawitu : Pu Zahlira

ZanThupui: “Thih thlenga rinawm”

Thusawitu : Upa Vanlallawma

Pathianni (26.09.2010)

S.S Tantu : Pi Lalfakawmi

Zirtur : “Juda-te leh Jerusalem chunga Pathian rorel”

ChawhnuTantu : Pi PC Lalrinliani

Thupui : “Inneihna hi damchhung thil a ni”

Sawitu : Pu Lalhmuaka

ZanThupui: “Nupa inthen pawizia”

Thusawitu : Upa H Roenga

KRISTIAN THALAI PAWL 

Vawiin Fellowship (19.09.10)

Hruaitu : Pu TC Ramdinmawia, C/M

Tantu : Pu F.Vanlalfela, Elija Gr.

Hun hmandan : Sharing & Zaiho

Reports : Pu H.Lalfakawma, C/M

Tawngtairual:Missionary & Ringthar te tan

 

Editorial (19.09.2010)

      Ringtute chu engtiklai pawha inchhemalh tawn tur kan nih mek laiin, kan thei reng lem lova, Kohhrana kan thahnemngaih chen pawh a in thlau va, kan tangkai dan pawh a in chen hauh lo.

     Thahnemngaihna kawng hrang hrang han sawi nikhua pawhin thahnemngaih luatah thahnemngai theuh theuh thu a inhmu lo chawk a. Tin, hmalatute hmalakna han sel nak nak chang pawh atam khawp mai. Sel leh thurawn pawh tlin taka dawng zo, hnehtaka a tul anga insiamrem thei hotu kan neih pawh a tul hle bawk. Kan zavaia lawmna tur chu rel chhuah a harsa ngei ang, mahse, kan zavaia tana kawngtha erawh kan rel chhuah ngei atul tlat si...

     Mahse....engpawh sel ringawt chin zawng a fuh lova , ‘Kan tan thlarau thianghlimin kan Kohhran kawngkhar a rawn kik hunah meuh pawh a kawngkhar kik ri chu a ring mah mah a nih chu’ tiin kan lo sel hmanhmawh ang tih a hlauhawm hlel love. Kan fimkhur tlan a tul hle a ni. !!!

     Tin, kawng engkimah thurawn zawmtu nun chu a parchhuak fo thin a, mahse kan mi rin zawng takte thurawn pawh nise zirchian hmasak phawt a him thung, Kohhran ho zawng zawng te kaldan tur a nih dawn tlat avangin. Kawih thlek mai mai theih, kawhkawi mai mai theih hruaitu nih aiin thu nghet leh zuk lova dinngheh thin erawh a tul fo.

Sermon (19.09.2010)

Tawngtai

: Lalnunthara Sailo
Chanmari ‘W’

"Gilead-ah thinghnai damdawi a awm lawm ni le?

Chutah chuan tidamtu a awm na nge?

Engati nge ka mite, ka fanu a hrisel theih loh?"

Jeremia 8:22.

Nimahsela, Petera chuan an zain a chhuahtir vek a, a thingthi a, tawngtai ta a; tin, a ruang lam a hawi a, "Tabith, tho rawh," a ti a. Tichuan, a mit a han meng a, Petera chu a hmuh veleh a thu ta hlawl a. Tirh. 9:40. Petera chuan chawplehchilhin a tawngtai chhanna a hmu a, mitthi a kai tho tih kan hmu a. Lal Isua Khawvela a lo len lai khan ramhuai hnawh chhuah, thilmak chi hrang hrang a tih leh dam lo a tihdamte kha chawplehchilha thleng a ni vek a, damlo a tihdamte pawh damkawr nei lo an ni hlawm. Chumi hnuah Tirhkohten Pathian hnenah an mamawh leh an duh tawngtaiin an dil a, chhanna an hmu nghal zel. Mizo Kristiante hian chawplehchilhin damkawr nei lovin dam lo eng zat nge kan tawngtai dam ve tawh. Pathian hnena kan tawngtai avangin mitthi pakhat tal an nung leh em?

     "Tin, engkim ring chunga tawngtaia in dil apiang chu in hmu ang," Mathaia 21:22 -ah kan hmu a, chumi ring chuan Chanchin \ha darh zelna turte, damlo dam nan te, Kohhran chak nan te, mimal leh chhungkaw harsatna hrang hrang chin fel nan te, kan ram sualna leh dik lohna a reh nan te leh thil chi hrang hrang dilin mimal, chhungkua leh Kohhran kan tawngtai thin. Pathian chhanna hmu miah lo chu kan ni hauh lo va, mahse, kan nunphung tidanglam lawih khawp Pathian chhanna kan hmu khat hle. Inhnem nan kan Pathian chu a tawpah a che chauh thin. Mihring kan beidawn hnuah a che chauh \hin kan ti a, chuvang chuan thenkhat chuan "Kan dil apiang min pek te chuan kan ‘Peon’ emaw kan ti ang a sin," an ti. Mahse, a peon tih lam ni lovin Baibulah chuan amah ringa diltu chu a pe mai \hin tih kan hmu si.

     Kan mamawhte dila kan tawngtai theihna chhan hi Lal Isua vang a ni a, chumi avang chuan kan tawngtai dawnin heng Bible chang Tin, engkim ring chunga tawngtaia in dil apiang chu in hmu ang,"Mathaia 21:22. Chuvngin ka ti a che u, engkim in tawngtaia in dil apiang chu hmu tawhah inngai ula, tichuan in hmu ang.Marka 11:24. Engah mah mangang suh u; engkimah tawngtai leh dilin, lawmthu hril tel zelin, in duhnate chu Pathian hnenah hriattirin awm zawk rawh se.Philipi 4:6 tihte hi hre reng leh awih chungin Lal Isua hmingin kan dilin kan tawngtai thin. Kan dil apiang kan hmu lo va, hmu tawhah inngai ula a tih phei hi chu kan hlat hlawm hle. Hetiang kan nih avang hian a nawlpui aia tawngtai chhanna hmu thei deuh nia kan hriat chu thlarau dik chang a nih leh nih loh pawh thlu hman lovin kan pan lawp lawp mai hlawm zawng a nih hi maw le.

     Tin, heng chhinchhiahnate hian ringtute chu a zui zel ang: Ka hmingin ramhuaite an hnawt chhuak ang a, tawng thartein an tawng ang a; rulte kutin an la ang a; thihna tur engpawh in mah sela engmah an ti lo vang a; damlote chungah an kut an nghat ang a, an dam zel ang," Marka 16:17-18 thuah a ti a. He thu hi ringtute nih dan tur Baibulin min hrilh a ni a, amaherawh chu Mizote hi Lal Isua hminga ramhuai hnawtchhuak thei lo deuh vek kan ni a. Chanchin tha avangin tawng tharin kan tawng lo deuh vek a. Rinna avanga rul chukna mi man ngam lo kan ni deuh vek bawk. Thihna tur in ngam lo kan la ni ta deuh deuh a. Damlote chunga kut nghata tidam thei zat zat kan ni lo vek bawk. Chhinchhiahna ringtute zui zel tura Bible-in min tiam nei lo Kristian kan nihna chhan hi eng vang nge ni ang. tawngtai chhanna hmu khat tak ringtu kan nihna chhan hi eng vang nge. Lal Isuan amah ringtute a chhinchhiahna zuitu tur a a tiam nei lo ringtu nih hi a him em, a tha em?

     "Chutiang bawkin Thlarau chuan kan chak lohnate a pui thin a; engtia tawngtai tur nge tih kan hre si lo va; nimahsela Thlarau chuan rum sawi hleih theih lovin min tawngtaisak thin." Rom 8:26 - ah kan hmu a. Chutiang a lo nih takah chuan ringtu inti-senior ve tawh takte leh piangthar hlim hlawlte tawngtai chhana a awm loh thin chhan hi engtia tawngtai tur nge tih kan hriat loh vang hi a ni ang. Hria nia kan inhriat lai hian kan hre lo tihna a ni.

     "In dil a, in dil dik loh avangin in hmu lo, in nawmsak nan hman in tum si a."Jakoba 4:3-ah tih kan hmu leh a. Kan tawngtaia kan dil kan hmuh loh chuan kan dil dik lo tihna a ni. Kum 100 chuang Kristian ni tawh Mizote hian tawngtai dan dik hi kan la thiam lo tihna a ni a. Chuvang chuan ngun taka ngaihtuahin, Pathian hnenah tawngtai dan dik kan hriat theih nan kan dil a va’n pawimawh em! Pathian hnena tawngtai dan dik kan hriat hunah chuan damlo chungah kut kan nghat ang a, an dam zel ang a. Ramhuai kan hnawt chhuak thei ang a, tawng thartein kan tawng ve ang a, rulte kan man mai mai thei tawh ang. Thihna tur engpawh in mah ila engmah kan ti lo vang. Kan ram sualna pawh hi a reh ang.     Heti hian ngaihtuah chhunzawm ila ‘Kristiante hnenah hian damna a awm na nge? Kan tawngtai a, an dam si lo. Kan ram sualnate tawngtaiin Pathian hnenah kan thlen a, kan fel chuang si lo. Lal Isua ringtu intite tawngtaina hi eng vangin nge chhan a nih loh?’

Article (19.09.2010)

THALFAVANG  OLIMPIC

      Kan pi leh pute chuan Favang awllen lai chuhin hun hlimawm tak an lo hmang ve thin fa hmiang? Keini erawh chuan awl leh hman vang pawh ni hauh lovin thalaite tisa leh thlarauah kan lo chak thar leh zualna atan hman lo chung chungin inpe tak chung siin am taka hmang turin kan in sawm hmasa ni se.

      Rual ute leh nu leh pa te’n K.T.P member te hi in tihhlim ngawt in ngaihtuah te pawh in ti mai thei e !! Mahse...Thalai kan ni miau va, kan tha chakna kan rilru chakna hi up beh mai chi a ni lova kan tha chakna milin, Lal Isua hrereng chunga kan chakna kan thalai puite hmuha han show hi Pathian min siam phung a ni tlat a lawm. Show vel pawh kan chak tur a ni. Pu Maruata leh Tv Remliana te tan tharum zawng chuan thiam thil show tur a vang viau na a, Pu VMSA (of Pate-a) te tan erawh chuan inzaisiak a nih loh chuan a phurawm thei hle thung ang.

      Kan Branch Leader in ka tha lutuk emaw ka thiam lutuk emaw a tih tawhnaah hi chuan rin ngam tak tak a har vang pawh nichuang lovin, Eliza Group Leader in Top Scorrer a nihna vawn him a tum lutuk avanga Football khelh ngei a tum tur han suangtuah chuan nuih te pawh a za lawk rum rum mai. A chhan chu a khelh ve vaih chuan an Group an chhiat phah dawn tih chu Pu Current-a, Isaia Group Leader ten an hai der silova, teltir dan mawlh an ngaihtuah ngeiin a rinawm. Tin, tun tum chu ‘a thiam thiam in Football khelhtur a nih hmel e,’ tih avangin Pu Rintluanga, Jeremia Group Leader-in in lak fit a tum nasa lutuk hian kan hmuhchak Football game min hmuhtir ngei te pawh a beisei awm hle in ka hria. Hetiang hi kan Group hruaitute han in hrosak dan leh he hun an lo thlir lawk dante a nih avang hian, chan loh lamah boruak te hi asang viau ang tih ka hlau hlel lo e. Amaherawh, chutiang em chu thleng lo turah ngai ila, boruak tha tak hnuaiah infiamna hlimawm tak hmang ngei turin in buatsaih ila a duhawm hle ang.

       Khuangchawi Thla, Pu Mahatma Gandhi a piancham a lo thlen hunah chuan Commandant Saheeb, Pu Valtea pawh a vawk lal lenna hmun, Mualpui hmun ngeiah cho chikima cho tur an kat nuk mai. Horeb chanchinbu Cirulation manager Nl. Tluangpuii pawhin ‘scooty intlansiak awm se’ a ti vawng vawng a ni awm e. Nikum lam atanga Commandant sipai rinawm Lalmuana (Elija Group) pawh Tin Jubilee marathon-a a champion kha duhtawk mai lovin, zingkarah Zemabawk vawi thum tal a tlan thleng ziah tawh tih report kan dawng bawk. Jeremia Group leh Isaia Group defence-te chil pherh hle a tum a nih hmel.

      Tun Thalfang Olympic ah meuh chuan Tv. Engte-a te pawh mawng sawh dawpa an tluk tawh loh kan beisei. Mahni phak tawka Keeper tha inti ve tak Pu Mabiaka pawh a thiam thiam an tih dawn tak avangin a kotlang ‘C’ team-ah a thut ve ngei a ngai ang le! Kan Branch KTP ka chhuan ve em emna chu mitin mai hi mahni phak tawk ah leh thiamna zawng zawng ah hian kan phur ve hrim hrim hi a ni. He Olympic ti ropui em em na chhan tur zinga pakhat chu Una Voce Group te thiam nei miah lovin rawn inhak ‘pawl’ an tum leh hle niin kan hria. He kan Olympic-ah hi chuan kan Branch Leader pawh football ham tur chuan a tling zo ta meuh lo a ni e, eng pawh nise a dam han hauh phawt ila ti raw u!

        Intihhlimna atan Group hrang hrangte kan inel leh dawn ta a ni a. Inelna a nih tawh hi chuan chak zawk, chak ber nih hi a chakawm a. Kan tum ber pawh a ni reng a ni. Mahse kan tan luatah hian mi dang pawisawina hunah he hun hi hman palh a hlauhawm a. Group hruaitute pawn chak loh pawh huam a, theihtawp chhuah chunga tan lak a pawimawh khawp ang.

     A hlimawm tur zawnga ngaihtuah chuan a chakawm tawhin a phurawm khawp mai. Mahse he programme hi engvanga lo chhuak nge? Kan hlim leh kan lawmna hi tisa tan hian a ral mai ang em le? He ‘Thalfavang Olympic’ hi Kumpuan thupui - ‘Member hlate hnuhhnaih’ tih bawhzuina atana buatsaih a ni. Chutihrual chuan member zawng zawngte huapa intih hlimna hun atan hman tangkai theih chuan a lawmawm ngawt ang. Vawksa ringawt ei char char laia arsa han ei ve zauh thin pawh hi a nuam ve tho mai.

•       Huau huau hi a nuam a, Kristian rilru pu tak chunga, sual tel miah lo a huau huau phei chu a tangkai ngawt ang le. Mahse eng rilru puin nge he hun hi kan lo thlir lawk ve le? Tu nge he hunah hian langsar dawn? Kan chak zawng leh phurna zawng hi hmanruaa hmangin hruai boin kan awm phah thin. He hunah hi chuan Pathian ropui ber thei se chuan kan hun hman hi a hlwhtlin dan a thuahhnih ngawt ang.

Hun ruatna (12.09.10)

KOHHRAN

Vawiin Pathianni (12.09.2010)
Chawhma : Naupang Sunday School Inkhawmpui

Chawhnu

Tantu : Pi Lalnundiki
Thupui :“Hla hmanga rawngbawlna”
Sawitu : Pu C. Zaidanga

Zan

Thupui:“Thuziak hmanga rawngbawlna”
Thusawitu : Upa R. Lalrinawma

Pathianni (19.09.2010)

S.S Tantu : Pi Lalchuailovi
Zirtur : “Kumkhua-a inremna leh Lalpa Ni”

Chawhnu

Tantu : Pi Laltlanhlui
Thupui : “Taimak hi hlawhtlinna bul a ni”
Sawitu : Pu Zahlira

Zan

Thupui: “Thih thlenga rinawm”
Thusawitu : Upa Vanlallawma

BEIHRUAL PROGRAMME


13.9.10(Thawhtanni)

Tantu : Pu R.Laltlanliana
Thupui : “India rama zirna leh Kristiante”
Hawngtu : Pu Samuel Lalzarmawia

14.9.10(Thawhlehni)

Tantu : Nl K.Lalnunsangi
Thupui : “Zir thiamna leh Chanchin Tha”
Hawngtu : Pu R.Lalduhawma

15.9.10 (Nilaini)

Tantu : Nl Zodinsangi
Thupui : “Kristian chhungkua leh zirna”
Hawngtu: Pi R.Zochhuani

16.9.10 (Ningani)

Tantu : Nl C.Laldangliani
Thupui : “Thiamna tak tak pe chhuak zirna”
Hawngtu: Pu V.Zathuama

17.9.10 (Zirtawpni)

Tantu : Nl PC Lalhriatpuii
Thupui : “Zirna hmun tha”
Hawngtu: Pu F.Biaksanga

18.9.10(Inrinni)

Tantu : Nl Lalsangzeli
Thupui : “Zirna tih hmasawn dan tur”
Hawngtu: Pu PC Zairemmawia

Article (12.09.10)

NAUPANG INKHAWMPUI

:R. Lalduhawma

Editor

       Kumtinin Sunday School Naupang Inkhawmpui kan hmachhawn ziah thin a. Mahse he Inkhawmpui hi MSSU (Mizo Sunday School Union) hmalaknaah a pawm theih chiah loh na a awm. A chhan chu inrelbawldan leh kaihhruai dan zawng zawng hi Bial Sunday School Committee kuta awm anih vek vang a ni. A tirah chuan naupang Inkhawmpui hi Missionary-te thahnemngaihna avanga neih tan a ni a. Kum 1931 kha neih hmasak ber kum a ni a, he Inkhawmpui hmasa ber hi Aizawl Tlangnuam Kohhranah neih a ni nghe nghe.

      Naupang Inkhawmpuiah hian Sunday School naupangte chu Pathian thu chang sawirualah te, hla sakah te, thu inchhang sawiah te in elna neiin inelna nilovin Item naupangte atangin beisei a ni bawk thin. Hei hi Zoram pum kan kalphung a ni a, titha lawmman te leh kaltha lawmman semin, mimal Item nei te hnenah pawh lawmman pek thin an ni bawk. A dintirh lamah chuan lawmman tur hi Missionary-ten an thawhkhawm mai thin a, hun a lo kal zel a, Pastor Bial Sunday School Committee ten anmahni bial theuh tan lawmman tur chu an ngaihtuah ta zel a ni.

       Tin, Naupang Inkhawmpui bakah Senior Department Inkhawmpui buatsaih thin a ni bawk a. Bial Sunday School Committee kut anih avangin Bial hrang hrang te kalpui dan erawh a dang deuh hret hret hlawm. Bial thenkhatah intihsiak anga kalpui anih laiin, thenkhatah chuan Speaker te sawma intawhkhawm anga hmangin, Kohhran tin ten Item an nei thliah thliah bawk, Speaker nei lem lova, Intawhkhawm anga hmang pawh an awm thin bawk.

       Mizo Sunday School Union (MSSU) chuan Sunday School pumpui rawngbawlna pawimawh tak anih avangin a ngaihsak hle a, Bial kutah engkim awm anih thing avangin a hun thu ah pawh Bial ten an ruahman hun ah an ruahman mai thin. Mahse tun hnai deuh atang khan Bial tinte tan kalrual theih nan MSSU chuan Sunday School Zirlai Syllabus-ah naupang leh Senior Inkhawmpui hun tur an zep tel ve ta a ni. Tunah hi chuan Bial tam zawk chuan MSSU Syllabus-rawn siam hi kan zui ta a ni.

       A tobul tlem leh kalpui anih dan kan han tarlang ta a, engtin nge he Inkhawmpui hi nu leh pa leh Sunday School naupang leh Senior Department te hian kan lo hmachhawn thin aw! tiang hian tlem in umzui lawk teh ang.

       1) INPUAHCHAH : Inpuahchah hi a tul thin hle mai, Kohhran aiawha naupang fehchhuak tur te hi Kohhran hmel lanna pakhat a ni a. Tin, Pathian thu leh fakna hla te an hriatna leh an puitlin thleng pawha Pathian rawngbawlna atana hmanraw tangkai atana an la hman tur anih dawn avangin inpuahchah that a tul hle bawk. Tin, heng thu leh hla kan zir thin te hi, an nun khalhngiltu hmanrua ala nih dawn tlat avangin a pawimawh hle bawk a ni. Mahse hetiang khawpa pawimawh leh tul anihna hi Kohhran nu leh pa ten kan hmuhhmaih fo mai erawh zirtur kan nei tlang in a lang. Kan fa kan tute chang zir huna thahnemngai taka tirh tum lo nu leh pa, pi leh pu kan awm thluah mai. Pathian thu zir aia kawrthar, thil thar etc. lo ngaipawimawh zawk nu leh pa kan awm mek bawk.

       Inpuahchahna atan hian Kohhran a inhawn a tul hle a, sum leh pai insen a tul pawhin insen huam a tul hle. (Keini Kohhran chuan kan tlin). Tin, Zirtirtu te pawh thawhhona tha kan neih a tul tak meuh meuh, kan thawhpui te kuta dah vek mai lovin, Inkhawmpuina ah kan kaihruai dawn lo a nih pawhin, Inkhawmpui tur atan kan theihna leh thiamna naupang te ang bawka kan lantir loh chuan hma kan sawn thei lovang.

       2. KAWRMAWI PART - I : Intihsiak zinga a tawp ber nih pawh hlau hauh lo, mahse, thawmhnaw thar neih loh erawh hlau viau in a awm theih. Tin, chang zir leh Inkhawmpui atana an thiamna leh an dinhmun tur thlira theihtawp chhuahpui ai mahin, he hun atana thawmhnaw thar neih sak / lei sak loh ngawt hlau nu leh pa te pawh a awm theih, faten an sawi lem loh pawn nu leh pate zawk hian harsa deuh chung pawh hian kan ngaihtuah zawk fo, mawi lo leh nalh lo bika an kal kan hlauh ang hian an tihthat loh bik hlau tlang ilang chuan hma kan sawn ngei ang. Kan fate kan rualawh pui lutuk na hian kan ban phak loh thlengin min la hnuk lut thei tlat a ni. Kan neih sumin a thin a, an mamawh anih bawk chuan Inkhawmpui ruala kawrmawi han lei hi chu a inhmeh hle mahse, neive thei lote tan erawh inkhawmpui hrehawm ti takin a hmachhawn / chak loh phah ve theih bawk a ni. Kan neih vang leh an mamawh vang pawh ni lovin nu leh pa tam tak chuan fate rualawh pui leh ngen avang ngawtin puk chawp pawn kan ngaihtuah hreh lo erawh sim a tul.

       3. KAWRMAWI PART - II : Sunday School naupang leh Senior Dept. tleirawl Inkhawmpui dawn avanga Kawrmawi lei ngen an tam an ti !!! Kan duhtak thawmhnaw thar neih tluka nuam hi puitlin hnu thleng pawhin a tam vak lo. Mahse hunpui leh Naupang Inkhawmpui dawn avanga mamawh si lovin, kan ngen tlat te, thiante neih theih avanga ngen ve ngawt chin hian, kan nu leh pate luhaina kan thlen a, Inkhawmpui hi phurrit thlentu a nih phah thei. “Inkhawmpui thawmhnaw ka neih loh chuan ka Inkhawmpui dawn lo reng reng,” tih thu hmanga chhungte kar mai pawh tleirawl tam tak chin fo a ni. Inkhawmpui hi advantage a hman chi a ni lova, nu leh pate karna hmanrua atana hman pawh a rem hek lo. Naupang Inkhawmpui leh Senior Inkhawmpui hi Kawrthar neih ngei ngeina tur atan a duan a ni lova. Kristian naupang leh tleirawlte, Pathian thu leh hla hmanga inelna thianghlim hmachhawnna, Pathian chawimawi tur a kal khawm kan nihna zawk hi kan hriatchian a tul hle.

       ZIRTIRTUTE LAM HI ? : Pathian thu leh hla hriatna tuh ngei tum chungin, dinhmun sang ber beisei bawkin, Department tinte intihsiakna hmachhawn tur hian kan inpuahchah thin; Inkhawmpui kan han hmachhawn ta ngei a, kan beisei leh kan lo ngaihthlak dan aia kan dinhmun a hniam changin sawi leh sel tur zawn mai a awl fo. Pathian thu leh hla hmanga kan inelna thianghlim tibawrhbang zawnga tan ulh teuh awm theiah insum hram hram a pawimawh. Endik tura ruatte fel famkim leh thiam chungchuang an ni bik lo a ni tih hre chungin kan dinhmun theuh hi Pathian remruatah ngai thlap thei ila a hahdamthlak in a Pathian thu ngawt ang..

Editorial (12.09.10)

A thak avangin kan hiat a, amaherawhchu a thak ka tih avanga kan hiah hian a thak lai chiah erawh kan hiat si lo. Rawngbawlna kawng hrang hrangah theihtawkin hma kan la a, kan rawngbawlna zawng zawng hi rawng kan bawl chhan ber Pathian tan hian a ni ang em le?


A tha hriat a awl a, a dik ber erawh hriat a har thin. Hmasawn kan tumna kawngah hian kan phak loh leh kan tlin loh tur hi kan hmu hma viau em? Kalphung ngai reng leh tihdan ngai renga kan kal chuan hmasawn a har ngawt ang le. Chutihrual chuan Kohhran/Branch huang chhunga mi pahnih/khatin an tihhlawhtlin theih ringawt hi chu a pumpui hmasawnna atana chhiar a har tho mai!!

Tihtur kan hriat rual hian tih loh tur pawh kan hre theuh a. Rawngbawlna kawngah hian tu nge kan thlir thin le? Mahni leh Pathian lam thlir tur kan nih rual hian thenkhat hi chuan kan rawngbawlpuite hi thlir nuam kan ti mah mah thin ni hian a lang.

Theihtawp kan chhuah reng vang emaw kan inpek anga mi dang paw’n rawn ti ve kher tura kan phut a, anmahni kan sawisel phah anih chuan mahni pawh inenfiah kan ngai ve tho mai. Ka inpekna avanga mi dang sawisel phah nana ka hman chuan, ka inpekna kha eng nge awmzia awm ang le? Ngawi renga kan thawk kep thei anih chuan A malsawmna kan dawn hi kan ngaihtuah thiam ang em?

Article (05.09.2010)

HOMOSEXUALITY

-Rev. Dr. Lawmsanga, ATC

( He thuziak hi Seminar on Kristian Hmachhawn mek harsatna" ni 28.08.10 - a ATC in a buatsaiha paper present lakchhawn a ni.)

1. Homosexuality chu eng nge ni?

Homosexuality chu mahni anpui nena chakna inhrik thlak tawnna ti ila a chiang mai awm e. A tawngkam lo chhuahna chu Greek tawng Homos tih a ni a, chumi awmzia chu ‘inang’ emaw ‘thuhmun’ emaw tihna a ni. Mizo chuan mawngkawhur tiin kan sawi tlangpui awm e. Lesbian tih hi hmeichhia leh hmeichhia inkawp sawi nan hman a ni tlangpui a. Gay tih hian mipa leh mipa inkawp sawi nan hman a ni. Third Sex tih te, emerging sex tih te pawhin an sawi bawk thin. He thu ziakah hian heng tawngkam hrang hrang hi kan hman pawlh nawk nawk dawn a ni.

2. Homosexuality in thlahchhawn theih ani em?

Mi thenkhatin homosexuality hi Pathianin mihringte a siam dan ni chiah lo mah se, inthlahchhawn theih thil niin an sawi thin a, hei hi a dik reng em? Entirnan Tuai leh Patil kan tih ang te hi mihring a mipa emaw hmeichhe nihna (gene) awm tur ang awm lo emaw intam hleih emaw tlem hleih vang emaw niin an sawi bawk thin a. Hemi chungchang hi 1963 daih tawh khan damdawi lam thiam te, rilru lam daktawr te dan lam thiam te, mihring khawsak phung lam thiam te leh Pathian thu thiam ten an lo sawi lawk tawh a. Chung ho thu tluk na chu Homosexuality hi inthlah chhawn theih a ni lo tih hi a ni. (Lehman Staruss, Homosexuality: The Christian Perspective). Inthlahchhawn atanga awm nise inthlahchhawn nana pawimawh gene hi mihring in a tidanglam thei a ni si lova. Homogene nei thlah kal zelte chu an khawngaih thlak hle dawn a ni. Chuvangin he ngaihdan in thlahchhawn thil anga ngaihna hi chu pawm hauh loh tur a ni an ti. Mihring tumah hi homosexual-a piang kan awm lova, Pathian in mitin hi mipa leh hmeichhia ah a siam tih hi rin mai tur a ni.

3. Homosexuality hi sual a ni reng em?

He zawhna hi a chhangtu a zirin chhanna a inang lo viau mai thei e. Christian-te erawh chuan Christian sakhua thlirna atanga zirturah kan in ngai ang a, homosexuality hi Bible-in eng ang chiahin nge min zirtir tih hi kan entur a ni ang. A chhan chu Bible hi tehna tluantling leh tha ziktluak, Christian-te chuan mihring nun chevel teh nana hmantlak a kan pawm leh Pathian min pek ah kan ngai a. Homosexuality chungchanga Bible zirtir dan thenkhat lo en dawn ila. Chumi hmain homosexuality hi engtianga lo hman tan nge a nih tih ilo en lawk ang.

Homosexuality hi mihringin an lo hman chhanna tam tak a awm thei ang a, chung zinga a chhan langsar tak pakhat chu mihringin puitling dinhmun a rawn luah chiah hian mipa in hmeichhe duhna a rawn nei a , chutiang bawkin hmeichhia pawhin mipa duhna a nei bawk. Chu chu Pathianin mihring a siam dan pangngai a ni reng a.. Mipa in a mamawh hmeichhe hun rei tak nei thei lova khung hranna hmun, lungin ang chi ah te hian mahni anpui nena sex hman na hi a lo ching thin a ni. Chutiang zel chuan hmeichhe awmkhawmna ah pawh hmeichhiatpui kawp hi an tam duh bik niin mithiamte chuan an sawi bawk.

Hmuh dan dang leh ah chuan homosexuality hi chhungkaw kehchhia, mipa fa in a pa hmangaihna a dawn tur ang a dawn loh vang emaw hmeichhe fa in nu hmangaihna a dawn tur ang a dawn lohnaah intan duh bik nia hriat a ni. A tir ah chuan engmah hetiang lam hi awm lo mah se, hun lo kal zel ah innelna tha lo hi a hring thei a, chuvangin mi tam tak chu gay emaw lesbian emaw an lo nih phah hial thin.

4. Bible-in homosexuality chungchang a zirtir dan.

Thuthlung hluiah Sodom leh Gomora mite khan vantirhkoh mipa, Lota mikhualte kha pawl an duh a chu chu Pathianin a haw hle tih kan hmu a. An chakna sual avanga Pathian hremna rapthlak tak kan hmu zui nghe nghe anih kha (Genesis 19:6, 24 &25). Gibia khua a mite pawhin mikhual pa pakhat chu pawl tumin a thlen in pa an dil a, mahse a thlen in pa chuan a phal lo tih kan hmu a (Roreltu 19:22). Chu a hur sual avang chuan Pathianin nasa takin a hrem thu kan hmu bawk ani (Roreltu 20). Thuthlung hluiah hian homosexuality hi hurna sual Pathianin a khap tlat a ni. Leviticus 18:22 ah chuan, ‘Hmeichhia angin mipa i pawl tur a ni lo, thil tenawm tawpkhawk a ni,’ tih thu kan hmu. Miin hmeichhia a mutpui anga mipa a mutpui chuan an pahnihin thil tenawm tak an ti ve ve a, tihhlum ngei tur an ni a, an thisen mawh pawh an chungah a awm tur a ni (Lev. 20:13) Bible ram mite hi Mizo ang bawka chhungkua leh khawtlanga mipa lalna hnam an ni a. Chuvangin Bible pawh hian mipate chungchang chipchiar taka a sawi chang pawhin hmeichhiate chungchang a sawi tel lo fo thin. Hetiang hi anih avangin hmeichhe inkawp te hremna dan pawh hi mipa te hremna Bible a kan hmuh hian a huam tel nghal ah ngaih theih a nih hmel a, hmeichhiat mutpuitu te chu an pahniha den hlum ve tho tur an nih a rinawm hle

Homosexuality hi Bible chuan Pathian huat zawng, a duh loh sual a ni a, hetiang tih ching chu hrem ngei tur a ni tih min hrilh chiang hle mai. Tunlai khawvelah mawngkaw hur te an lo zalen ta in ualau takin an nihna te pawh an rawn tarlang ta a, khawtlangah mai nilovin kohhran huang chhungah ngei pawh ngaihdan hrang a rawn hring chhuak ta mek a ni.

Hun ruatna (05.09.2010)

KOHHRAN

Vawiin Pathianni (05.09.2010)


S.S Tantu : Pi Zopari
Zirtur :“Rawngbawl turin Isaia koh a ni”

Chawhnu

Tantu : Pi V.Lalthlamuani
Thupui : “Awih awm taka hrilh”
Sawitu : Pastor B.Sangthanga

Zan

Thupui:“Inremna rawngbawl hna”
Thusawitu : Pastor B.Sangthanga

Pathianni (12.09.2010)

S.S Tantu : Pi Lalringliani
Zirtur :“Jada te thluthlung bawhchhiatna”

Chawhnu

Tantu : Pi Lalnundiki
Thupui :“Hla hmanga rawngbawlna”
Sawitu : Pu C. Zaidanga

Zan


Thupui:“Thuziak hmanga rawngbawlna”
Thusawitu : Upa R. Lalrinawma

BEIHRUAL PROGRAMME


06.09.10(Thawhtanni)

Tantu :Pi C.Lalhmingmawii
Thupui : “Chanchintha hlut zia.” Hawngtu: Pu LZ Pazawna

07.09.10(Thawhlehni)

Tantu : Pi Lalbuatsaihi
Thupui : “Nun leh thiltiha hril”
Hawngtu: Pu Lalthanga

08.09.10(Nilaini)

Tantu : Pi Thanchungnungi
Thupui : “Zirna pawimawh zia”
Hawngtu: Pu C.Lalrinkima

09.09.10(Ningani)
Tantu : Pi Lalthlahlovi
Thupui : “Mizorama zirna lo intan dan”
Hawngtu: Tv Lalramsanga

10.09.10(Zirtawpni)

Tantu : Pu TC Ramdinmawia
Thupui : “Mizoram Kohhran leh Zirna”
Hawngtu: Pu Lalremtluanga Varte

11.09.10(Inrinni)
Tantu : Pu R.Lalengpuia
Thupui : “Tunlai khawvela zirna sang chanchin”
Hawngtu: Pu Lalremruata Ralte 

KRISTIAN THALAI PAWL

Vawiin Fellowship

Hruaitu : Nl. Elizabeth Lalkhawngaihi   Fin. Sec Isaia Gr.
Tantu : Tv Lalhnehkima Elija Gr.
Spl. Item : Pu Lallawmkima & Pu R. Lalengpuia
T.T Rual: Missionary & Beihrual kan hman mek tan

Sermon (05.09.2010)

CHANCHINTHA HI HRIL RAWH U.

( Marka 16:15)

- R.Hrangdawla

 

Chanchintha awmzia sawi ka tum lova, keimahniin kan au chhuahpui (kan hril) kher lam hi ka sawi tum a ni ber hek lo. Ka sawi tum lam chu, kan nun leh chetzia leh inpeknain chanchintha a hril dan lam hi a ni

A hmasa ber atan chuan.... “Engpawhnise in awm dan chu Krista Chanchintha nen in mawi phawt rawh se,” tih kan Pathian thu in a ti a (Phillipi 1:27) Kan nundan leh chetziate hi kan ngaihtuah ngai em? Ringtu inti siin, mahni hlawkna tur a nih chuan mi chan lam kan ngaihtuah tawh lo, mahni in haivurna in kan khat zo ta. Hetiang nun neitu chuan chanchintha nilovin, chanchin chhia a hril a ni. II Timothea 4:2 ah chuan, “Thu chu hril rawh, a hunah te, a hun lo ah te pawh bei zel rawh,” a ti. Engtin nge a hun loah te thu kan hril ang? Kan nun leh chetzia in a hril tur a ni dawn lo’m ni? Kan nunah Krista nunze mawi tak alang chhuak ang a, chu nun chuan mahni hma a sial lova, midangte thatna tur a ngaihtuah thin a, chu chuan mite tan malsawmna a thlen thin. Nang malsawmna ni ang che, tih ziak hi atakin a zawh dik reng a lo ni a. Chutiang nun neitu chuan chanchintha hi engtiklai pawhin a hril thin a lo ni reng mai.

Kan rin, Lal Isua hian chanchintha hril hi a dah pawimawh hle a. Vana a lawn dawn khan a thuchah hnuhnung ber chu chanchintha hril hi a ni. A zirtirte hnenah khan, “Khawvel zawng zawngah kal ula, chanchintha hi hril rawh u,” a ti a. Chu hna pawimawh tak chu keini amah ringtute, a Kohhran hote hian kan tih tur hna tul ber leh kan kova a nghah chu a ni.

Kan Lal Isua thusawi hi tawitein han umzui dawn ila. Engtin nge Khawvel zawng zawngah kan kal ang a, chanchintha hi kan hril ang? Mithiam zawkte chuan, heta Lal Isua’n Khawvel a tih hi ‘Mihring’ a sawina a ni e, an ti a. Tin, Mathaia 28:19,20 ah chuan, ‘Chutichuan kal ula, chitin hnamtin a mi zirtirah te siam ula, Pa leh Fapa leh Thlarau thianghlimah chuan Baptist ula, thu ka pek zawng zawng che u pawm turin zirtir rawh u,’ a ti bawk a ni.

Aw le, keini lei mihringte, bawhchhiatna avanga thiam loh chang, mahni pawh inchhandam zo lote hnenah hian chanchintha hi i hril ang u. Engtin nge kan hril ang? kan ti a ni mai thei e. Ramthim ramrova kal chhuah a va hril kher lo pawh in chanchintha hi a hril theih a ni. Fakna hla siamtu chuan, “Kal chhuak thei lote pawhin mawhphurhna lian tak kan nei, Thilpeka rawngbawl turin Lalpa’n min ko”, a ti a ni. Kan nun leh chetzia bakah, kan In lum atang pawhin thilpek hmangin chanchintha kan hril thei a nih chu!! Lal Isua la hre lo leh la hmu lote hnen a chanchintha hril turin engangin nge ke i pen ve dawn le ? Unau duhtak, thlarau chhiar sen loh boral tur hi i hmangaih lo em ni ? ‘Pakhat tal rawn hruai rawh,’ ti a ngenna hi i chhang dawn nge? I hnawl zel zawk dawn?

A tawp ber atan chuan, kan chanchintha hrilin awmzia a neih a, hma a sawn theihna tur chuan..... a ma tana kan inpekna (inhlanna tak tak) neih a ngai a ni. Kan Pathian thu chuan he ti hian a ti, Rom 12:1 ah, “Chutichuan unaute u, Pathian khawngaihna avang hian inthawina nung leh thianghlim leh Pathian lawm tlak niturin in taksa chu inhlanah ka ngen a che u. Chu chu in rawngbawln awm reng a ni, ati a. Kan taksa hi Pathian in a duh anga a hman atan kan pek a ngai a nih chu. Keimahni in tha kan tih anga rawngbawl lovin ama duh dan anga rawngbawl turin, a duh anga a chanchintha hril turin, inhlanna tak tak neih a ngai a ni. Chu chu kan rawngbawl dan tur a ni a, chanchintha kan hril dan tur chu a ni e.

Lalpa’n a thu malsawm rawh se.

Editorial (05.09.2010)

       Khawvel thufing pakhat chuan “ Chawhmeh tha ber chu riltam a ni.”a ti. Kan riltam viau laia eitur kan duhzawng-tak ni lem lo leh kan la ei ngai reng reng loh te pawh tui titakin kan ei bawrh bawrh fo thin.

     Mahse..... Kristian, ringtu ka ni, kan in tih ve na kawngah hian kan riltamna tur diktakah kan riltam lo thin hle mai, kan nuam tih zawng leh khawvel thilah kan riltam huam huam hlawm a, Pathian thlarau leh a hnathawh-a puarsa ang mai hian kan tha awm thluah hlawm ringawt ni te pawn a lang. Chawhmeh tha dawng tur hian kan nun hi a riltam mawlh lo hlawm zawng a nih hi.

     Pastor-te,Upate leh Kohhrana thuhril kawnga rawngbawltute hian kan Kohhran huangah hian ka riltamna phuhru tur khawp eitur chaw tha min chhawp chhuah sak thin a, mahse.. heng chawhmeh tha min fah reng chung hian Kohran mipuiten riltam reng kan thlang a, kan riltamna atanga puar turin chawhmeh tha ei kan tum hlawm si lo a nih hi maw!!!